ජනාධිපතිවරයා විසින් රට තුල නිර්මාණය කරන ලද දේශපාලන අර්බුදය විසඳීමට කැඳවු සර්ව පාක්ෂික හමුව කිසිඳු අවසන් එකඟතාවයකට නොපැමිණ අවසන්ව තිබේ.
එම හමුවේදී මන්ත්‍රී විමල් වීරවංශ කරන ලද අභියෝගයකට අනුව 19 සඳුදා උදෑසන තම බහුතරය පෙන්වීමට ජනාධිපතිවරයාට දැනුම් දුන්නද එයට යහපත් ප්‍රතිචාරයක් නොලැබුණ බවයි එක්සත් ජාතික පක්ෂය පවසන්නේ.
“විමල් වීරවංශ මත්තයා යෝජනා කලා 113 පෙන්වන්න කියලා. අපි හෙට උදෑසන 10ට එම මන්ත්‍රීවරුන් 113 ට වැඩි පිරිසක් ඔවුන්ගේ දිවුරුම් ප්‍රකාශ සමඟ ජනාධිපතිතුමා වෙත පැමිණෙන්න සුදානම් බව දැනුම් දුන්නා. නමුත් ජනාධිපතිතුමා එතරම් ඒකට සතුටක් දැක්වුවේ නැහැ මම හිතනවා අද රාත්‍රියේ එතුමා කල්පනා කරලා හෙට උදේ වෙනකොට දැනුම් දෙයි කියලා.” යි අජිත් පී පෙරේරා මන්ත්‍රීවරයා සර්ව පාක්ෂික හමුව අවසන් වී මාධ්‍ය වෙත කියා සිටියේය.
ජනාධිපතිවරයා එම හමුවේදී කුමක් ප්‍රකාශ කලාද යන්න මාධ්‍යවේදීන් ප්‍රශ්න කල සිටියද “ජනාධිපතිතුමා කියපු දේ අපි කියන්න යන්නෙ නැහැ.” යි මන්ත්‍රීවරයා එය බැහැර කළේය.
රට තුල මේ වන විට අගමැතිවරයෙකු හෝ ආණ්ඩුවක් නොමැති වීම රටට අහිතකර බවට ජනාධිපති මෛත්‍රීපාල සිරිසේන හට පෙන්වා දුන් බවයි අජිත් පී පෙරේරා මාධ්‍ය වෙත කියා සිටියේ.
පාර්ලිමේන්තුවේදී ගන්නා ලද තීන්දුවක් සම්බන්ධව කතානායකවරයාගේ තීරණය අවසන් තීරණය වන බැවින් එය අභියෝගයකට ලක් කිරීමට ජනපතිට හෝ අධිකරණයට හැකියාවක් නොමැති බව ද මන්ත්‍රීවරයා වැඩි දුරටත් සඳහන් කළේය.
විශ්වාස භංග ජන්දය
මේ අතර සර්ව පාක්ෂික හමුවේදී පාර්ලිමේන්තුව තුළ ක්‍රියා කළයුතු ආකාරය සම්බන්ධයෙන් පක්ෂ නායක රැස්වීමේ දී සුදුසු තීරණයක් ගැනීමටත්, පාර්ලිමේන්තුව තුළ ඉතා සාමකාමී අන්දමින් ගැටුම්වලින් තොරව කටයුතු කිරීමටත් මෙහිදී සියලු දෙනා එකඟ වු බවයි ජනාධිපති මාධ්‍ය අංශය පවසයි.
විශ්වාස භංග යෝජනාව පිළිබඳව තමාට තීරණයක් ගැනීමට නම් පාර්ලිමේන්තු මන්ත්‍රී වරුන්ගේ නමින් හෝ ඉලෙක්ට්‍රෝනික ක‍්‍රමය භාවිතයෙන් ඡන්ද ගණනය කිරීම අත්‍යවශ්‍ය බව ජනාධිපතිවරයා මෙහිදී පෙන්වා දුන් බවද ජනපති මාධ්‍ය අංශය නිවේදනය කරයි.
ජනතා විමුක්ති පෙරමුණ විසින් සර්ව පාක්ෂික හමුවකට පැමිණීම ප්‍රතික්ෂේප කල තිබු අතර එම හමුවට සහභාගී වන ලෙස ජනාධිපතිවරයා විසින් කතානායක කරූ ජයසුරියට කරන ලද ආරාධනාවද ඔහු විසින් බැහැර කර තිබුණි.
ජනාධිපති කාර්යාලයේ පැවති සර්ව පාක්ෂික හමුවෙන් අනතුරුව ජනාධිපති මෛත්‍රීපාල සිරිසේන සහ ඔවුන්ගේ මන්ත්‍රීවරුන් හා එක්ව හිටපු ජනපති මහින්ද රාජපක්ෂගේ 73 වන උපන් දිනය සමරමින් කේක් කපා ඇත.
Facebook Comments
