ලබන ජනවාරියේ කටුනායක ගුවන්තොට වසාදමයි

කටුනායක ගුවන්තොටුපලේ ප්‍රධාන ධාවන පථය 2017 ජනවාරි 06 වැනිදා සිට අප්‍රේල් 06 වැනිදා දක්වා තුන් මසක කාලයක් ප්‍රතිසංස්කරණ සඳහා වසා දමන බව සිවිල් ගුවන් සේවා අධ්‍යක්ෂ ජනරාල් එච්.එම්.සී. නිමල්සිරි මහතා කියයි.

එහි ප්‍රධාන ගුවන් පථය පෙරවරු 8.30 සිට පස්වරු 4.30 දක්වා වසා දැමෙන බවත්, රාත්‍රී කාලයේදී එම ගුවන්තොට සුපුරුදු පරිදි ක්‍රියාත්මක බවත් පැවසේ.

ඒ අනුව දහවල් කාලයට මත්තල ගුවන් තොටුපල යොදාගන්නා ලෙස ගුවන් සේවාවලට උපදෙස් දී ඇති බවද වාර්තා වේ.

පැය 08ක කාලයක් මේ අනුව කටුනායක ගුවන්තොටට නිවාඩු ලැබෙන අතර 1986 දී විවෘත කළ මේ ගුවන්තොට වසර 30ක් තුළ කිසිදු අලුත්වැඩියාවකට ලක්වී නොමැත.

කෙසේවුවද ගුවන් තොටුපල වසා දැමීම නිසා එම ගුවන් තොටින් ජීවිතය සරිකරගන්නා ත්‍රීරෝද රථයේ සිට යටිතල පහසුකම් සපයන සියලුදෙනාට බලපෑමක් එල්ලවනු ඇතැයි ආර්ථික විශේෂඥයෝ කියා සිටිති.

එසේම ගුවන් මගීන්ට හම්බන්තොටට යාමට සිදුවීම අතිරේක කරදරයක් වනු ඇතැයිද පැවසේ.

අදාළ තත්ත්වය හේතුවෙන් සංචාරක සමාගම්වලටද විකල්ප සැලැසම් සකස් කිරීමට සිදුවනු ඇති බවද ආර්ථික විශේෂඥයෝ පෙන්වාදෙති.

මෙරට සියලුම ජාත්‍යන්තර ගුවන් ගමන් සිදුකරනු ලබන්නේ කටුනායක ගුවන් තොටුපල වන අතර එය දිනකට ගුවන් යානා 170ක් මෙහෙයවන බව වාර්තා වේ.

ගුවන් සේවා 24ක් කටුනායක ගුවන් තොටුපල භාවිතා කරනු ලබයි.

වසර 2015 දී ගුවන් යානා 63,537ක් මෙහෙයවා ඇති අතර එය මේ වසරේ ජුනිවන විට 33,347ක් බව ද වාර්තා වේ.

පසුගියවසරේ කටුනායකට පැමිණි හා ඉන් පිටවූ ගුවන් මගීන් ගණන මිලියන 8.2කි.

රනිල්ගේ ජපන් සංචාරයේ ප්‍රතිඵලයක්

අග්‍රාමාත්‍ය රනිල් වික්‍රමසිංහ මහතා පසුගියවසරේ ජපානයේ කළ සංචාරයේදී මේ ගුවන් තොටුපල ප්‍රතිසංස්කරණයට ජපන් රජය සමඟ එළඹුන ගිවිසුමකට අනුව මෙය සිදුවේ.

ගුවන්තොට සංවර්ධනයට ජපන් ජාත්‍යන්තර සහයෝගිතා ඒජන්සියෙන් රුපියල් බිලියන 74ක ණය ආධාරයක් හිමිව ඇත.