කෝවිඩ් 19 පැතිරීම වැළැක්වීම වෙනුවෙන් විෂබීජ නාශක ඇඟට ඉසීම කිසිදු ප්‍රයෝජනයක් නොමැති ක්‍රියාවක් බව රජයේ ඉහළම සෞඛ්‍ය බලධාරියා විසින් ද ප්‍රසිද්ධියේ පිළිගෙන තිබේ.
ජනතාව ගැවසෙන ස්ථාන වල විෂබීජහරන කුටි භාවිත කරන ලෙස කිසිදු නිර්දේශයක් ලබා දී නැති බවයි සෞඛ්‍ය අධ්‍යක්ෂ ජනරාල් විශේෂඥ වෛද්‍ය අනිල් ජාසිංහ පවසන්නේ.
“ඇතැම් අය නවෝත්පාදන උනන්දු තියන අය මේ කටයුත්තේ නියැලිලා තියනවා. මෙහිදී ඇත්ත වශයෙන්ම සියයට හැත්තෑවේ ඇල්කොහොල් විදීමක් සිද්ද වෙනවා බොහෝ විට. පෘෂ්ඨීය ආවරණයක් තමයි මේකෙන් ලබා දෙන්නේ. ඒකෙන් ප්‍රයෝජනයක් ඇති බවක් ඔප්පු වෙලා නැහැ.”
පිරිසිදු කිරීමේ කුටි භාවිතය සහ ප්‍රසිද්ධ ස්ථාන වල විශබීජ නාශක ඉසීම මිනිස් සිරුරට හානිදායක බවට ශ්‍රී ලංකාවේ දී පළමු වරට අනතුරු අඟවා තිබුනේ ශ්‍රී ලංකා ක්ෂුද්‍රජීව විද්‍යා විද්‍යාලය විසිනි.
මහජනයා ගැවසෙන බොහෝ ස්ථාන වල ඇතුල්වීමේ හා පිටවීමේදී මෙම විෂබීජහරන කුටි ගමන් කිරීම අනිවාර්ය කර ඇති බවත් පෙන්වා දෙන ශ්‍රී ලංකා ක්ෂුද්‍රජීව විද්‍යා විද්‍යාලය, මෙහිදී ජනයා මත ස්ප්‍රේ කරනු ලබන්නේ මධ්‍යසාර, ක්ලෝරීන් සංයෝග, ඕසෝනිකාරක ජලය, සබන් වතුර හා පාරජම්බූල කිරණ ආදිය බව හෙළි කර තිබේ.
මෙම ක්‍රියාවලිය ජාත්‍යන්තර වශයෙන් සම්මත වුවක් නොවන බව ලෝක සෞඛ්‍ය සංවිධානය උපුටා දක්වමින් ඔවුන් පෙන්වා දී ඇත.
සෞඛ්‍ය අධ්‍යක්ෂ ජනරාල් විශේෂඤ වෛද්‍ය අනිල් ජාසිංහ පෙන්වා දෙන්නේ විෂබීජ නාශක ඇඟට ඉසීමෙන් පසු කොරෝනා වෛරස් අනතුර පහව ගිය බවට ව්‍යාජ සිතිවිල්ලක් ඇතැමුන්ට ඇතිවීමේ අවදානමක් තිබෙන බවයි.
” සමහර විට කෙනෙක්ට හිතෙන්න පුළුවන් මේක ඇතුලට ගිහිල්ලා කාර්යාලය ඇතුලට ගියාම ඔක්කොම හරි කියලා.”
විශේෂඥ වෛද්‍ය අනිල් ජාසිංහ අවධාරණය කරන්නේ කොවිඩ් සහ අනෙතුක් වෛරස් පාලනය සදහා වැදගත් වන්නේ පුද්ගල දුරස්ථභාවය, සහ අනෙකුත් සනීපාරක්ෂක ක්‍රම භාවිත කිරීම බවයි.
විශාල වශයෙන් විෂබීජනාශක පරිසරයට මුදාහැරීම පරිසර දූෂණයට හා රසායනික ද්‍රව්‍ය නාස්තියට හේතු වනවා සේම මිනිසුන්ට මෙන්ම සතුන්ට හා මත්ස්‍යයන් හටද හානිකාරක බව ශ්‍රී ලංකා ක්ෂුද්‍රජීව විද්‍යා විද්‍යාලය අනාවරණය කර තිබුණි.
Facebook Comments
