රාජ්‍ය විරෝධී ක්‍රියාවල නිරත වන පුද්ගලයින් අත්අඩංගුවට ගැනීමට අධිකරණ නියෝග අවශ්‍ය බව කොළඹ මහේස්ත්‍රාත්වරයා පොලිසියට දැනුම් දී තිබේ.
ඒකාබද්ධ විපක්ෂය විසින් ජනාධිපතිවරයාගේ නිල නිවස වටලමින් විරෝධතාවක නිරත වීමට සුදානම් වන බව පවසමින් එය වළක්වලමින් නියෝගයක් නිකුත් කරන මෙන් කුරුඳුවත්ත පොලිසිය අධිකරණයෙන් ඉල්ලා තිබුණි.
එම ඉල්ලීම ප්‍රතික්ෂේප කරමින් කොළඹ ප්‍රධාන මහේස්ත්රාත් රංග දිසානායක පෙන්වා දුන්නේ ජනාධිපතිවරයා හෝ ඔහුගේ නිල නිවස වැටලීමට සුදානම් වන්නේ නම් එය රාජ්‍ය විරෝධී ක්‍රියාවක් බැවින් එවැනි ක්‍රියයවක් සිදු කරන පුද්ගලයින් එම මෙහොතේ හෝ ඊට පෙර අත්අඩංගුවට ගැනීමට පොලිසියට බලතල ඇති බවයි.
එවැනි රාජ්‍ය විරෝධී ක්‍රියාවන් අත්අඩංගුවට නොගෙන අධිකරණයෙන් තහනම් නියෝග ලබා ගැනීමට උත්සාහ කිරීම සම්බන්ධව සැක පල වන බව ද මහේස්ත්‍රාත්වරයා කියා සිටියේය.
මෙම ඉල්ලීමේ වග උත්තරකරුවන් ලෙස පාර්ලිමේන්තු මන්ත්‍රීවරුන් වන නාමල් රාජපක්ෂ, රෝහිත අබේගුණවර්ධන, වාසුදේව නානායක්කාර, හා දිලුම් අමුණුගම ඇතුළු එකොලොස් දෙනෙකු නම් කර තිබුණි.
පොලිස් බලතල පාවිච්චි කරන්න
මේ අතර ඒකාබද්ධ විපක්ෂය පැවැත්වීමට නියමිත උද්ඝෝණය වළක්වාලන මෙන් වැලිකඩ පොලිසිය හා කොල්ලුපිටිය පොලිසිය කරන ලද ඉල්ලීම් අධිකරණය ප්‍රතික්ෂේප කරන ලදී.
විරෝධතාකරුවන් කොල්ලුපිටිය පොලිස් බල ප්‍රදේශයට ඇතුළු වුවහොත් සාමාන්‍ය ජනතාව සහ විරෝධතාකරුවන් අතර ගැටුමක් ඇති විය හැකි බව පොලසිය අධිකරණයට දැනුම් දුන් අතර යම්කිසි ආකාරයක ගැටුමක් ඇති වුවහොත් පොලීසියට පවතින බලතල අනුව ක්‍රියා කිරීමේ හැකියාවක් පවතින බව කොටුව මහේස්ත්රාත් ලංකා ජයරත්න පොලිසියට පෙන්වා දුනි.
උද්ඝෝෂකයින් පාර්ලිමේන්තුව අවට රැස්වුවද එය සාමකාමිව සිදුකරන ලෙසට නියෝගයක් නිකුත් කරන්නැයි වැලිකඩ පොලීසිය කළ ඉල්ලිමක් සැළකිල්ලට ගත් කොළඹ අතිරේක මහේස්ත්රාත් නෙරංජලා ද සිල්වා සාමකාමී රැස්වීමක් පැවැත්වීමට අධිකරණයේ නියෝග අවශ්‍ය නැති බැවින් එම ඉල්ලීම ඉවත දැමීය.
උද්ඝෝෂකයින් සාමකාමී බවෙන් ඔබ්බට ගොස් පොදු දේපලවලට හානි කරමින් රාජ්‍ය ආයතනවලට අයුතු ලෙස ඇතුළු වෙමින් මහජන පීඩා ඇතිවන අයුරින් හැසිරුණ හොත් අපරාධ නඩු විධාන සංග‍්‍රහ පනත සහ පොලිස් ආඥා පනත ප‍්‍රකාරව කටයුතු කරමින් ඔවුන් අත්අඩංගුවට ගන්නා ලෙස ද මහේස්ත‍්‍රාත්වරිය වැලිකඩ පොලිසියට දැනුම් දුන්නාය.
Facebook Comments
