ශ්‍රී ලංකාව අපරාධ රාජ්‍යයක්: ජනාධිපති

පාතාලය වෙනුවෙන් කුලියට මිනීමරන වෙඩික්කාරයන් පිරිසක් ශ්‍රී ලංකා යුද හමුදාවේ සිටින බව ත්‍රිවිධ හමුදාවේ සේනාධිනායකයාද වන ජනාධිපතිවරයා විසින් හෙලි කර තිබේ.

කිලි පොලා යන එම හෙලිදරව්ව සිදු කිරීමට තුන් දිනකට පෙර මන්නාරමේ ද්විත්ව මිනිස් ඝාතනයේ ප්‍රධාන සැකකරු ශ්‍රී ලංකා පොලීසිය ප්‍රකාශ කොට ඇති පරිදි රාජකාරියේ නිරත හමුදා සෙබලෙකි.

ඔහුට ආධාර අනුබල දුන් ප්‍රධාන සැකකරු 2023 වසරේද සිදු කළ ද්විත්ව ඝාතනයක ද ප්‍රධාන සැකකරුවකු වන විශ්‍රාමික හමුදා සාමාජිකයෙකි.

මැතිවරණ ජය සමරන ජන හමුවකට එක්වෙමින්, ශ්‍රී ලංකාව ‘අපරාධ රාජ්‍යයක්’ ලෙස හැඳින්වූ ජනාධිපති අනුර කුමාර දිසානායක රටේ පවත්නා භයංකර තත්වය රට වැසියාට පැහැදිලි කරදී තිබුනේ යුද හමුදාවේ ස්වංයක්‍රීය ගිනි අවි 73 ක් පාතාලය අතට පත්ව ඇති බව දැනුම් දෙමිනි.

එම ගිනි අවි ප්‍රමාණයෙන් අඩකට ආසන්න ගණනක් අත්අඩංගුවට ගෙන ඇති බවත් ඔහු එහිදී පවසා තිබුනි.

“මා විටෙක කියන්නම් මේ රටේ තියෙන්නේ කොච්චර භයංකාර තත්වයක්ද කියලා. හමුදා කදවුරු වල තියන ආයුධ එළියට ඇවිල්ලා තියනවා. එක්තරා හමුදා කදවුරක T56, හැත්තෑ තුනක් පාතාලේ ගාවට ඇවිල්ලා තියනවා. දැනට අපි 38 ක් අත්අඩංගුවට අරන් තියනවා. තව35 ක් හොයනවා. මෙහෙමයි වෙලා තියෙන්නේ. ඊයේ අත්අඩංගුවට ගත් එක්කෙනෙක් T56 එක්ක අත්අඩංගුවට ගන්නවා, ඔහු සිවිල් ආරක්ෂක බලකායේ සාමාජිකයෙක්. ”

ජනාධිපති අනුර කුමාර දිසානායක එහිදී වැඩි දුරටත් අවධාරණය කර තිබුනේ පාතාල හමුදා සාමාජිකයන් 13 දෙනෙක් මේ වන විටත් අත්අඩංගුවට ගෙන ඇති බවයි.

“විශාල කීර්තිමත් හමුදාවක් අපිට තියනවා. ඔවුන් හමුදාවේ ගෞරවය ආරක්ෂා කරන විශාල පිරිසක් ඉන්නවා. ඒ පිරිසක් ඉන්නා අතර හමුදාව සතුව තිබෙන ආයුද පාතාලයට ඇවිල්ලා තියනවා. එහෙමයි තත්වය රටේ. කීප දෙනෙක් ඉන්නවා හමුදාව ඇතුලේ, පාතාලේ කුලියට වෙඩි තියලා, ආපහු කදවුරට ගිහින් දෙනවා. 13 දෙනෙක් අත්අඩංගුවට ගත්තා. මෙහෙම අපරාධ රාජ්‍යයක් අපි ඉස්සරහා තියෙන්නේ. කවුද විශ්වාස කරන්නේ, කොතනද විශ්වාස කරන්නේ? මෙහෙම තත්වයකට රටක් පත් වෙලා තියනවා. ”

තුන් මසකට ඉහතදී ශ්‍රී ලංකාවේ විධායක ජනාධිපති ලෙස දිවුරුම් දුන් අනුර කුමාර දිසානායක තමන් යටතේ පාලනය වන ‘අපරාධ රාජ්‍යය’ පිරිසිදු කිරීමට 19 වැනිදා කටුකුරුන්දේදී ජනතාව හමුවේ පොරොන්දු දෙමින් තව දුරටත් අවධාරණය කළේ එම පාතාලයට දේශපාලන පිටුබලය ලැබෙන බවයි.

“දේශපාලන රැකවරණය සහිත, කදවුරුවල ආයුද පාතාලයට එනවානම්, පාතාලයේ කුලියට, ලක්ෂ ගණනක් ඉන්න හමුදාවේ, විශාල ප්‍රමාණයක් නෙමෙයි, අතේ ඇඟිලි ගානට ටිකක් වැඩි කණ්ඩායමක්, කුලියට එළියට ගිහිල්ලා ඝාතනය කරලා ආපසු කදවුරට එනවා. අත් අඩංගුවට අරන් තියනවා 13 දෙනෙක්. මේකයි රටේ තත්වය, ඒ නිසා මේක අපරාධ රාජ්‍යයක්. කිසි තැනක කිසිවක් විශ්වාස කළ නොහැකි පන්නයේ රාජ්‍යයක් තමයි තියෙන්නේ. අපි එහෙම රාජ්‍යක් උඩ තමයි ඉන්නේ. අපි මේක එකින්එක පිරිසිදු කරනවා.”

මන්නාරම ද්විත්ව මනුෂ්‍ය ඝාතන

මෑත කළ අත් අඩංගුවට ගැනීම් කිහිපයක් පිළිබඳව පොලිසිය පවසන තොරතුරු අනුව කුලියට සිදු කළ බවට සැකකෙරෙන උතුරේ ඝාතන මාලාවක වෙඩික්කරුවන් යුද හමුදාවට සම්බන්ධය.

ශ්‍රී ලංකා පොලීසිය 2025 ජනවාරි 20 වැනි සදුදා නිවේදනය කර ඇත්තේ දෙදෙනකුට මරු කැඳවමින් ජනවාරි 16 වැනි දින මන්නාරම මහේස්ත්‍රාත් අධිකරණය ආසන්නයේ සිදු කළ වෙඩි තැබීමේ ප්‍රධාන සැකකරු මඩු පොලිස් ස්ථානයේ නිලධාරීන් කණ්ඩායමක් විසින් ජනවාරි 18 කැලණිය ප්‍රදේශයේදී අත්අඩංගුවට ගන්නා ලද බවයි.

ඔහු වයස අවුරුදු 34 ක් වන අමන්දොළුව, සීදූව ප්‍රදේශයේ පදිංචි නාරාහේන්පිට යුද හමුදා රෝහලේ වෛද්‍ය සහයකයෙකු ලෙස සේවය කරන අයකු බව පොලීසිය වැඩි දුරටත් සඳහන් කරයි.

මෙම වෙඩි තැබීමෙන් ඝාතනය වී ඇත්තේ 2022 වසරේ ගොං කරත්ත තරගයකදී දෙපිරිසක් අතර ඇතිවු ගැටුමකදී පුද්ගලයන් දෙදෙනකු ඝාතනය කිරීම සම්බන්ධ නඩුවේ සැකකරුවන් බවයි පළාත් බද වාර්තාකරුවන් පවසන්නේ.

පළාත් බද වාර්තාකරුවන් පවසන පරිදි එලෙස ඝාතනය කොට ඇත්තේ මන්නාරම, උයිලන්කුලම,නොච්චිකුලම ප්‍රදේශයේ පදිංචි 61 හැවිරිදි සවේරියන් අරුල් හා 42 හැවිරිදි සෙල්වකුමාර් ජූඩ් නමැති දෙදෙනායි.

ඔවුන් දෙදෙනාම පිරිමින් වන නුමුත් පොලිසිය නිවේදනය කර ඇති පරිදි එක් අයකු කාන්තාවකි.

පොලිස් නිවේදනයේ සඳහන් පරිදි මහේස්ත්‍රාත් අධිකරණය ආසන්නයෙන් වාර්තා වූ වෙඩිතැබීමට ආධාර අනුබල දුන් ප්‍රධාන සැකකරුවෙක් ද ජනවාරි 18 වැනි දින පේසාලේ ප්‍රදේශයේදී අත්අඩංගුවට ගෙන තිබේ.

පේසාලේ පොලිස් ස්ථානයේ නිලධාරීන් කණ්ඩායමක් විසින් අත්අඩංගුවට ගත් එම සැකකරු වයස අවුරුදු 38 ක් වන කයිකාවල, මාතලේ ප්‍රදේශයේ පදිංචි විශ්‍රාමික යුධ හමුදා සැරයන්වරයකු වන අතර ඔහු කැලණිය ප්‍රදේශයේ තාවකාලිකව පදිංචිව සිට ඇති අයෙක් බවත් පොලීසිය සඳහන් කරයි.

පොලිස් නිවේදනය තව දුරටත් සඳහන් කර ඇත්තේ වැඩිදුර ප්‍රශ්න කිරීම් සහ විමර්ශන මගින් මේ වන විට මෙම සැකකරු 2023.08.24 වන දින අඩම්පන් පොලිස් වසමේ මොල්ලිකණ්ඩාල් ප්‍රදේශයේදී පිස්තෝලයකින් වෙඩි තබා ද්විත්ව මනුෂ්‍ය ඝාතනයක් සිදු කිරීමේ අපරාධයේ ප්‍රධාන සැකකරු බව අනාවරණය වී ඇති බවයි.

2022 වසරේ ජුලි 08 වැනිදා ගොං කරත්ත තරගයක් අතරතුරදී උයිලන්කුලම සහ නොච්චිකුලම යන ප්‍රදේශ දෙකේ දෙපිරිසක් අතර වු ගැටුමක් හේතුවෙන් එකම පවුලේ සහෝදරයන් දෙදෙනකු කපා කොටා ඝාතනය කොට තිබු අතර, ඊට පළි ගැනීමක් වශයෙන් 2023 අගෝස්තු මාසයේ දී මන්නාරම අඩම්පන් පොලිස් වසමේ දී දෙදෙනෙකු වෙඩි තබා ඝාතනය කොට තිබු බවයි පළාත් බද වාර්තාකරුවන් පවසන්නේ.