අසල්වැසි ඉන්දියාවේ චෙන්නායි නුවර, මුළුදුන් ඉහල පෙලේ ජාත්‍යන්තර දෙමළ සමුළුවකට සහභාගී වීම සදහා යන අතරතුර කටුනායක ගුවන් තොටුපලේදී දෙමළ ජනතා නියෝජිතයකුට ආගමන විගමන නිලධාරීන් බාධා කිරීම සම්බන්ධයෙන් ආණ්ඩුව කණගාටුව ප්‍රකාශ කර තිබේ.
පාර්ලිමේන්තුවේ සභානායක, අමාත්‍ය බිමල් රත්නායක පාර්ලිමේන්තුවේදී පොරොන්දු වී ඇත්තේ උතුරේ මන්ත්‍රීවරයාගේ වරප්‍රසාද ආරක්ෂා කිරීමට පෙනී සිටින බවටයි.
තමිල්නාඩු මහ ඇමැති එම් කේ ස්ටාලින්ගේ ප්‍රධානත්වයෙන් චෙන්නායි නුවර මුළුදුන් දෙමළ ඩයස්පෝරා සමුළුවට පිටත්ව යන මොහොතේ කටුනායක ගුවන් තොටුපලේදී ආගමන විගමන දෙපාර්තමේන්තුවේ නිලධාරීන් ජනවාරි 11 වැනිදා ඉලංගෙයි තමිල් අරසු කච්චි (ITAK) මන්ත්‍රී සිවඥානම් ශ්‍රීධරන්ට බාධා පමුණුවා තිබුනි.
ඒ සම්බන්ධයෙන් ජනවාරි 21 වැනිදා පාර්ලිමේන්තුව හමුවේ කරුණු ගෙන හැර දක්වමින් මන්ත්‍රීවරයා සඳහන් කළේ එම නිලධාරීන් සිය විදේශ ගමන් බලපත්‍රය ත්‍රස්ත මර්දන හා විමර්ශන කොට්ඨාශයේ (CTID) නිලධාරීන්ගේ පරීක්ෂාවට ලක් කළ යුතු යැයි තමන්ට දැනුම් දුන් බවයි.
“මගේ විදේශ ගමන් බලපත්‍රය දෝෂ සහිත බවත්, ත්‍රස්තවාදය වැළැක්වීමේ හා විමර්ශන දෙපාර්තමේන්තුවේ පරීක්ෂණයකට ලක් කිරීමට අවශ්‍ය බවත්, ගුවන් තොටුපළ නිලධාරීන් මට දැනුම් දුන්නා. දීර්ඝ ප්‍රශ්න කිරීමකින් අනතුරුව, මා සමඟ ගුවන් තොටුපළට පැමිණි මගේ සහෝදර පාර්ලිමේන්තු මන්ත්‍රී රවුෆ් හකීම් මහතාගේ මැදිහත්වීම මත ගුවන් යානය පිටත්ව යෑමට සුදානම් වන අවසන් මොහොතේ ඉන්දියාවට යාමට මට අවසර ලැබුනා.”
ඉන්දියාවට ගොස් ආපිට පැමිණිමේදී තමන් කළ විමසීමේදී සංචාරක තහනමක් පනවා නොමැති බව එම නිලධාරීන් විසින් තහවුරු කරන ලද නමුත් ජනතා නියෝජිතයකු ලෙස සිය වරප්‍රසාද කඩවීම සම්බන්ධයෙන් දෙමළ ජනතා නියෝජිතයා පාර්ලිමේන්තුවේදී ප්‍රශ්න කර තිබුනි.
“කිසිදු අධිකරණ නියෝගයක් හෝ කථානායකවරයාගේ උපදෙස් නොමැතිව මට විදේශ ගමන් තහනමක් ඇති බව ආගමන විගමන බලධාරීන් මට ප්‍රකාශ කිරීම සැලසුම් සහගත වරප්‍රසාද කඩ කිරීමක් ලෙස මම දකිනවා. මහජන නියෝජිතයකු ලෙස මට හිමි වරප්‍රසාද කඩ කරමින් සිදු කර ඇති පරීක්ෂණවල පසුබිම ගැන මම පාර්ලිමේන්තුවේදී ප්‍රශ්න කරනවා.”
ඉලංගෙයි තමිල් අරසු කච්චි මන්ත්‍රී සිවඥානම් ශ්‍රීධරන්ට ගුවන් තොටුපලේදී මුහුණ දීමට සිදු වු හිරිහැරය ශ්‍රී ලංකා මුස්ලිම් කොංග්‍රසයේ නායක, සමගි ජන බලවේගයේ පාර්ලිමේන්තු මන්ත්‍රී නීතිඥ රවුෆ් හකීම් ද පාර්ලිමේන්තුව හමුවේ තහවුරු කර තිබුනි.
“මෙම සිද්ධිය සිදු වෙද්දී, මාත් ප්‍රභු පර්යන්තයේ මෙතුමත් එක්ක ඉන්දියාවේ, තමිල්නාඩුවේ මහ ඇමතිතුමාගේ ඇරයුමක් පිට යෑමට සිදු වෙද්දි තමයි මේ සිද්ධිය සිදු උනේ. ආගමන විගමන දෙපාර්තමේන්තුවේ නිලධාරීන්, ඒ ප්‍රභු පර්යන්නයේ ඉන්න නිලධාරීන් මෙතුමාට විරුද්ධව ගමන් තහනමක් තියන බව කියද්දී, මං එතුමන්ලා එක්ක සාකච්ඡා කරලා ඉල්ලුවේ, යම් ගුවන් තහනමක් තියනවානම් ඒ පිළිබදව නඩුවක් තියෙන්න ඕන.”
ත්‍රස්තවාදය වැළැක්විමේ පනත අහෝසි කරන බවට පොරොන්දු ලබා දෙමින් බලයට පත් ජාතික ජන බලවේග ආණ්ඩුව එම පනත තව දුරටත් පවත්වාගෙන යෑම සම්බන්ධයෙන්ද ශ්‍රී ලංකා මුස්ලිම් කොංග්‍රසයේ නායකයා පාර්ලිමේන්තුවේදී තව දුරටත් ප්‍රශ්න කර තිබුනි.
“ඒ විතරක් නෙමෙයි දැන් ඔබ තුමන්ලගේ ආණ්ඩුව තාමත් අර ත්‍රස්ත විරෝධි පනත ක්‍රියාත්මක කරගෙන යනවා. ඒ පනත යටතේ තමන්ට හිතා මතා අවශ්‍ය පරිදි ත්‍රස්ත විරෝධි අංශය මෙවැනි කටයුතු කරන්නත් බෑ. මොකද උසාවි නියෝගයක් තිබිය යුතුමයි. නමුත් එහෙම ප්‍රශ්න කරද්දී, උසාවි නියෝගයක් පිළිබදව සටහන් කරේ නෑ. ඉතින් මේක ඇත්තටම මන්ත්‍රීවරුන්ගේ අයිතිවාසිකමක් උල්ලංඝණය කිරීම විතරක් නෙමයි, එතුමන්ට වෙච්ච විශාල අසාධාරණයක්. ඉතින් අපි සාකච්ඡා කරලා ඒක නිරාකරණය කර ගත්තට මේ පිළිබදව හරි විමර්ශනයක් කරලා දැනුම්දීමක් කළ යුතුයි කියලා මම ඉල්ලා සිටිනවා.”
PTA පරිස්සමින් පරිහරණය කිරීම
එයට ප්‍රතිචාර දක්වමින් පාර්ලිමේන්තුවේ සභානායක, අමාත්‍ය බිමල් රත්නායක පවසා තිබුනේ ත්‍රස්තවාදය වැලැක්විමේ පනත ඉතාම පරිස්සමෙන් පාවිච්චි කරන්නට සිදු වන බවයි.
“ඒ වගේම ත්‍රස්ත විරෝධි පනත ගැන කියන්න තියන එකම දේ තමයි ඒක අපේ අභිලාෂයවත්, ප්‍රතිපත්තියවත් නෙමෙයි, නමුත් අළුත් පනත සකස් කරගන්නකං රටේ තියන නීති අපිට ඉතාම පරිස්සමෙන් පාවිච්චි කරන්න වෙනවා. මොකද අපි ආණ්ඩුවක් කරන්න ඕන පනත් සම්මත වෙනකං.”
ඉලංගෙයි තමිල් අරසු කච්චි මන්ත්‍රී සිවඥානම් ශ්‍රීධරන්ගේ විදේශ ගමනට ගුවන් තොටුපලේදී සිදු කර ඇති බාධා කිරීම සම්බන්ධයෙන් නියෝජ්‍ය ආරක්ෂක ඇමතිවරයා ඇතුළු බලධාරීන්ගෙන් වාර්තා කැදවා ඇතැයි ද පාර්ලිමේන්තුවේ සභානායක, අමාත්‍ය බිමල් රත්නායක පාර්ලිමේන්තුවට දැනූම් දී තිබුනි.
“මම ගුවන් තොටුපල සභාපතිතුමාට මේක ඝෘජුව සම්බන්ධ නැති උනත් මේ සිද්ධිය සිදු උනේ ගුවන් තොටුපලේදී නිසා මම එතුමාට කිව්වා මේ පිළිබදව වාර්තාවක් ලබා දෙන්න කියලා. ඒ වගේම මම නියෝජ්‍ය ආරක්ෂක ඇමති මේජර් ජෙනරාල් අරුණ ජයසේකරටත් දැනුම් දුන්නා. මේ ප්‍රශ්නේ පිළිබදව සොයා බලන්න කියලා. ඒ වගේම අපි හිතනවා මේකට ඉමිග්‍රේෂන් එක සම්බන්ධ නිසා අපි බලාපොරොත්තු වෙනවා මේ ප්‍රශ්නය ඉමිග්‍රේෂන් එකට යොමු කරලා ඔබතුමාගෙන් වරප්‍රසාද කමිටුවට ලැබිච්ච ලිපිය අපිට ලබා දුන්නොත් ඒ ඇමතිතුමා මගින්ම අපිට යොමු කරන්න පුළුවන්. ”
කටුනායක ගුවන් තොටුපලේදී දෙමළ ජනතා නියෝජිතයාාට ආගමන විගමන දෙපාර්තමේන්තුවේ නිලධාරීන් සිදු කළ බාධා කිරීම සම්බන්ධයෙන් ආණ්ඩුවේ කණගාටුව ප්‍රකාශ කළ අමාත්‍ය බිමල් රත්නායක එම බාධා කිරීම රජයේ මග පෙන්වීම යටතේ සිදු නොවුවක් බවත් එහිදී අවධාරණය කර තිබුනි.
“ඉතින් අවසාන වශයෙන් අපි කණගාටුවෙනවා ශ්‍රී ධරන් මන්ත්‍රීතුමාට ඇතිවෙච්ච අපහසුතාවය පිළිබදව. නමුත් ඉතා පැහැදිලියි මේක ත්‍රස්ත විරෝධි පනත භාවිතා කිරීමක් කියන එක පැහැදිලි නැ. එක එතුමා කියන්නෙත් නෑ. ඒ වගේම තමයි එතුමා එනකොට එතුමා මෙහෙම දෙයකට ලක් වෙලත් නැහැ. ඒ නිසා අපි අනිවාර්ය වශයෙන්ම මේක රජයේ ප්‍රතිපත්තියක්වත්, රජයේ මග පෙන්වීමක් මතවත් කරන දෙයක් නෙමයි.”
කෙසේ නමුත් මන්ත්‍රීවරයාගේ වරප්‍රසාද ආරක්ෂා කිරීම වෙනුවෙන් පෙනී සිටින බව සභානායකවරයා පාර්ලිමේන්තුවට පොරොන්දු වී තිබුනි.
Facebook Comments
