ජාත්‍යන්තර විරෝධයට ලක් ව ඇති නව හමුදාපතිවරයා පත් කිරීම පිළිබඳව ආණ්ඩුව තුලින්ම විවේචනයක් එල්ල වී තිබේ.
රාජපක්ෂ පාලනයේ පැවති ග්‍රාම්‍ය චින්තනය උත්කර්ෂයට නැගීම තුළින් පසුගිය සිව් වසරක් තුල අත් කරගත් ජයග්‍රහණ බොහෝමයක් රටට අහිමිවී යාමට ඉඩ තිබෙන බව මුදල් අමාත්‍යවරයා පවසයි.
“අපගේ විදේශ ප්‍රතිපත්ති නැවතත් ස්වයං හුදකලා, ගැටුම්කාරි පසුගිය යුගයට නැවත තල්ලු කළ යුතු නැතැයි,” ද යහපාලනය ආරම්භයේ විදේශ ඇමැති ධුරය දැරූ මංගල සමරවීර අවධාරණය කර ඇත.
යුද අපරාධ චෝදනා විභාග කොට යුද පීඩිතයන්ට යුක්තිය ඉටු කිරීමට මෛත්‍රී-රනිල් පාලනය 2015 දී එක්සත් ජාතීන් හමුවේ ගිවිස ගත්තේ ඔහුගේ විදේශ අමාත්‍ය ධුරය දරන විටය.
එම පොරොන්දු ඉටු නොකොට යුද අපරාධ ගැන චෝදනා එල්ලවී ඇති ලුතිනන් ජනරාල් ශවේන්ද්‍ර සිල්වා හමුදාපති ධුරයට පත් කිරීම පිළිබඳ විරෝධය තවත් තීව්ර වෙමින් පවතී.
ජාත්‍යන්තර විරෝධය නැගුනු මේජර් ජනරාල් ශවේන්ද්‍ර සිල්වා ශ්‍රී ලංකා යුද හමුදාපති ධූරයට “රාජ්‍ය නායකයාගේ ස්වෛරී තීරණයක්” යයි පවසමින් විදේශ අමාත්‍යාංශය එය හෙලා දැක තිබුනේ තිබුනේ “විදේශීය පාර්ශ්වයන් මඟින් ශ්‍රී ලංකාවේ රාජ්‍ය සේවයේ උසස්කිරීම් පිළිබඳ තීරණ හා අභ්‍යන්තරික පරිපාලනමය ක්‍රියාවලීන්ට බලපෑම් කිරීමටඋත්සාහ දැරීම යුක්ති සහගත නොවන අතර, එය පිළිගත නොහැකි ක්‍රියාවක්” ලෙසිනි.
මංගල සමරවීර අමාත්‍යවරයා ට්විටර් පණිවිඩයක් මගින් සිය ප්‍රකාශය කර නිකුත් කර තිබුනේ ඉන් අනතුරුවය.
ජාත්‍යන්තර විරෝධය
ලුතිනන් ජෙනරාල් ශවේන්ද්‍ර සිල්වා යුද හමුදාපති ධූරයට උසස් කිරීම මගින් යුක්තිය සහ වගවීම තහවුරු කිරීම සඳහා 2019 මාර්තු මාසයේදී ශ්‍රී ලංකාව එක්සත් ජාතීන්ගේ මානව හිමිකම් කවුන්සිලයට දැක්වූ සහයෝගය පිළිබඳව ගැටලු මතුවන බව ජර්මනිය, ඉතාලිය, නෙදර්ලන්ත තානාපති කාර්යාල සහ එක්සත් රාජධානියේ මහ කොමසාරිස් කාර්යාලය මෙන්ම නොර්වේ සහ ස්විස්ටර්ලන්ත තානාපති කාර්යාලවල එකඟතාව මත යුරෝපා සංගමයේ නියෝජිත මණ්ඩලය නිකුත් කළ නිවේදනයක දැක්වේ.
“ජාතික සංහිදියාව කෙරෙහි ශ්‍රී ලංකාව දක්වන කැපවීම පසුබෑමකට ලක්කරන අතර යුද්ධයේ ගොදුරු බවට පත් වූ සහ යුද්ධයෙන් දිවි බේරා ගත් ජනතාවට පීඩාකාරී පණිවුඩයක් ද යොමු කෙරේ” යැයි ද එම පණිවුඩයේ සඳහන්ව තිබේ.
“යුද සමයේදී මානව හිමිකම් උල්ලංඝණය කළේ යැයි පිළිගත හැකි චෝදනා” ඇති බැවින් මේජර් ජනරාල් ශවේන්ද්‍ර සිල්වා ශ්‍රී ලංකා යුද හමුදාපති ධූරයට පත්කිරීම ගැන තමන් “දැඩිලෙස සැලකිලිමත්” වන බව ට්විටර් පණිවුඩයක් නිකුත් කරමින් කොළඹ පිහිටි කැනඩා මහ කොමසාරිස් කාර්යාලය අවධාරණය කර ඇත.
ඔහුගේ පත්කිරීම නිසා “සංහිදියාව සහ වගවීම” සම්බන්ධයන් කෙරෙමින් පවතින කටයුතු යටපත් වන බවට ද කැනඩා මහ කොමසාරිස් කාර්යාලය අනතුරු අඟවා තිබේ.
ලුතිනන් ජනරාල් ශවේන්ද්‍ර සිල්වා යුද හමුදා ප්‍රධානියා ලෙස පත් කිරිම මඟින් එක්සත් ජාතීන්ගේ මානව හිමිකම් කවුන්සිලයේ ඇති ප්‍රතිසන්ධාන, වගවීම සහ මානව හිමිකම් ප්‍රවර්ධනයට අදාළ ඒකාබද්ධ යෝජනාවට අනුව ශ්‍රී ලංකාවේ කැපවීම දැඩි ලෙස බිඳ දමා ඇතැයි මානව හිමිකම් මහකොමසාරිස්වරිය නිකුත් කළ නිවේදනය දැක්වේ.
අවසන් යුද සමයේදී ජාත්‍යන්තර මානව හිමිකම් සහ මානූෂීය නීති උල්ලංඝණය කළ බවට චෝදනා ඇති බැවින් අදාළ පත්කිරීම සිදුනොකර යුත්තක් යැයි මිෂෙල් බැචෙලෙට් මහකොමසාරිස් සිය නිවේදනයේ සඳහන් කර ඇත.
එම පත් කිරීම එක්සත් ජාතීන්ගේ සාම සාධක කටයුතු සඳහා අඛණ්ඩව දායක වීමට ශ්‍රී ලංකාවට ඇති හැකියාව කෙරෙහි බලපෑම් ඇති කළ හැකි බවට අනතුරු අඟවන මහකොමසාරිස්වරිය පසුගිය මාර්තු මාසයේ දි ශවේන්ද්‍ර සිල්වා මහතා හමුදා මාණ්ඩලික ප්‍රධානී ලෙස පත්කිරීම සම්බන්ධයෙන් ද කණස්සල්ල පළ කර තිබුනි.
“විශේෂයෙන් එය යුද්ධයෙන් විශාල වශයෙන් පීඩා විඳි වින්දිතයින්ගේ සහ දිවි ගලවා ගත් අයගේ ප්‍රතිසන්ධාන ප්‍රයත්නයන් වලක්වනු ලැබේ. එය ආරක්ෂක අංශයේ ප්‍රතිසංස්කරණ ද වළක්වන අතර එක්සත් ජාතීන්ගේ සාම සාධක ප්‍රයත්නයන් සඳහා අඛණ්ඩව දායක වීමට ශ්‍රී ලංකාවට ඇති හැකියාව කෙරෙහි එය බලපානු ඇත.” යි ඇය සිය නිවේදනයෙන් වැඩි දුරටත් කියා සිටී.
Facebook Comments
