හදා වඩා ගැනීමට පිටරටට දරුවන් දුන් මව්වරුන්ට තම දරුවන් සොයා ගැනීම වෙනුවෙන් මෙරට ඉපිද පිටරට හැදී වැඩුනු දැරියක් විසින් වැඩසටහනක් ආරම්භ කර තිබේ.
රුවන්වැල්ලේ මවක විසින් බිහිකර නෙදර්ලන්තයේ හැදී වැඩුන සදමාලී නොහොත් සන ෆන් රොසන් විසින් මෙම වැඩ සටහන ආරම්භ කර ඇත.
නෙදර්ලන්තයේ ඇතුලු යුරෝපා රටවල හදා ගැනීමට දුන් දරුවන්ගේ මව්වරුන් සොයා ගැනීමට එම දරුවන් වෙනුවෙන් මෙරටට පැමිණි ඇය අම්මාවරුන් සොයා ගැනීමට මහත් සේ වෙහෙස විය.
එම මව්වරුන් සොයා ගැනීමෙන් අනතුරුව තම දරුවන් සොයා ගැනීමට අම්මාවරුන් දක්වන උනන්දුව නෙදර්ලන්තය ඇතුලු දරුවන් හැදී වැඩුන යුරෝපා රට වලට දන්වා ඔවුන්ගේ සහාය ඇතිව ජාන බැංකුවක් (DNA Bank) පිහිටුවීමට පිහිට වීම තම අරමුණ බවයි සන ෆන් රොසන් පෙන්වා දෙන්නේ.
ඒ වෙනුවෙන් ඇය දරුවන් දුන් අම්මාවරු සමග 03 ඉරිදා විහාර මහා දේවි උයනේදී හමුවක් පැවැත්වු අතර තම දරුවන් පිටරටට දුන් අම්මාවරුන් ඇතොත් ඒ පිළිබඳව දන්වන ලෙස ඉල්ලා 04 සදුදා පතිකා බෙදා දීමක්ද සිදු කළාය.
“අපි දරුවෝ දුන්න අම්මලාගේ කතා එකතු කරල නෙදර්ලන්ත රජයට දෙනවා. අපි හිතනවා නෙදර්ලන්ත රජය අපිට උදව් කරයි කියල ඩී එන් ඒ බැංකුවක් හදා ගන්න. ඩී එන් එ් පරික්ෂාවකින් තමයි අපිට අපේ දෙමාව්පියන් හරියටම හොයා ගන්න පුලුවන් එහෙම දරුවො දුන්න අම්මලා ඉන්නවා නම් අපිට කතා කරලා විස්තර දෙන්න.” යි සන ෆන් රොසන් මාධ්‍ය වෙත කියා සිටියාය.
එසේ තම දරුවන් පිටරටට දුන් මව්වරුන් පිළිබඳව යම් තොරතුරක් දන්නේ නම් 077 4289289 දුරකතන අංකයට විස්තර ලබා දෙන ලෙසට ඇය ඉල්ලා සිටි.
බේබි ෆාම්
ශ්‍රී ලංකාවේ ළදරුවන් දසදහස් ගණනක් හොර රහසේ විදේශ වලට අලෙවි කිරීමේ ජාවාරමක් පවත්වාගෙන යන ලද බව රජය විසින් පිළිගෙන තිබුණි.
1980 ගණන්වල ශ්‍රී ලංකාව තුල නීති විරෝධී “ළමා ගොවිපොළවල්” පැවති බව අමාත්‍ය රාජිත සේනාරත්න සෙම්බ්ලා නෙදර්ලන්ත රූපවාහිනී වාර්තාමය වැඩසටහනකට හෙළි කර තිබු අතර එම කාල වකවානුවේ උපත ලැබූ බිලිඳුන් එකොලොස් දහසක් පමණ දරුකමට හදාවඩා ගැනීම සඳහා වංචනික ලෙස යුරෝපා රටවලට අලෙවි කිරීම සම්බන්ධයෙන් එම රූපවාහනි නාළිකාව කළ හෙලිදරව්වකින් පසුව විමර්ශනයක් ආරම්භ කිරීමට ශ්‍රී ලංකා රජය කටයුතු කරන බවද ඔහු ප්‍රකාශ කළේය.
ජේ.ආර් ජයවර්ධන පාලනය පැවති ඒ වකවානුව තුල “බේබි ෆාම්” පවත්වාගෙන ගිය බවට රජයේ ඉහල පෙලේ බලවතුන්ට චෝදනා එල්ල වී තිබුනි.
ඒ සම්බන්ධයෙන් මේතාක් කිසිදු පරීක්ෂණයක් සිදු කර නොමැත.
Facebook Comments
