අතුරුදහන් වුවන් හට යුක්තිය ඉටු කර ගත හැක්කේ ජාත්‍යන්තර විනිශ්චය සභාවකින් නොව දේශීය වශයෙන් පිහිටුවා ගන්නා ශක්තිමත් යාන්ත්‍රණයකින් පමණක් බව අතුරුදහන් වුවන් සඳහා වන කාර්යාලයේ ප්‍රධානීයා පවසා තිබේ.
අතුරුදහන් වුවන් සඳහා වන කාර්යාලය (OMP) හරහා තමන් හට යුක්තිය ඉටු වීම ගැන සැක පල කරන අතුරුදහන් වුවන්ගේ ඥාතීන් ඒ සඳහා ජාත්‍යන්තර පරීක්ෂණයක් සිදු කර යුක්තිය ඉටු කරන ලෙස බල කරමින් වසකටත් වැඩි කාලයක් තිස්සේ උතුරේ විරෝධතාවයේ නියලේ.
වෙනත් කිසිදු රටක අතුරුදහන් වුවන් පිළිබඳ ගැටලුව විසඳීමට ජාත්‍යන්තර විනිශ්චය සභා පත් කර නොමැති බව පවසන අතුරුදහන් වුවන් සඳහා වන කාර්යාලයේ සභාපති නීතිඥ සාලිය පිරිස් ඒ සඳහා අවශ්‍ය වන්නේ ස්වාධීන දේශිය යාන්ත්‍රණයක් බව ජුනි 02 සෙනසුරාදා මුලතිව් හිදී කියා සිටියේය.
“ප්‍රයෝගිකව ගත්තොත් ජාත්‍යන්තර යාන්ත්‍රණයක් පිහිටුවලා දහස් ගාණක අතුරුදහන් වුවන්ගේ ප්‍රශ්නය විසදෙන්නේ නැහැ. අවශ්‍ය කරන්නෙ ශක්තිමත් දේශීය යාන්ත්‍රණයක්. ස්වාධීන, අපක්ෂපාතී දේශිය යාන්ත්‍රණයකින් පමණයි අතුරුදහන් වුවන්ගේ ප්‍රශ්නය විසඳන්න පුලුවන්,” යැයි සභාපති නීතිඥ සාලිය පිරිස් අවධාරණය කළේය.
මුලතිව් විරෝධතා
අතුරුදහන් වුවන් සඳහා වන කාර්යාලය සිය රැස්වීම් මාලාවේ තුන් වන සැසිවාරය මුලතිව් හි පවත්වන අතර එම කාර්යාලයට විරෝධය පල කරමින් මුලතිව් දිස්ත්‍රික්ක ලේකම් කාර්යාලය ඉදිරිපිට අතුරුදහන් වුවන්ගේ ඥාතීන් විරෝධතාවයේ නිරත වී ඇත.
කෙසේ වෙතත් එම කාර්යාලයේ ප්‍රධානියා ඇතුළු පිරිස විරෝධතාවයේ නිරත වු අතුරුදහන් වුවන්ගේ ඥාතීන් ද හමුවු බවයි සිලෝන් නිවුස් වාර්තාකරු පවසන්නේ.
අතුරුදහන් වුවන් සොයා ගැනීම සඳහා OMP කාර්යාලය කිසිදු උපකාරයක් නොවන බව පවසන ඥාතීහු එය ජාත්‍යන්තර රැවටීමට කරන ඇස් බැන්දුමක් බව අතුරුදහන්වුවන්ගේ කාර්යාලයේ නියෝජිත හමුව වර්ජනය කරමින් කියා සිටියහ.
මුලතිව් දිස්ත්‍රික්කයේ වැඩි දෙනකු අතුරුදහන් වී ඇත්තේ යුද හමුදාවට භාර දීමෙන් අනතුරුව වන අතර එසේ භාර දුන් තම සමීපතමයන් අත් අඩංගුවෙන් නිදහස් කර දෙන කාර්යාලයක් පිහිටුවන්නේ නම් ආණ්ඩුවේ අරමුණ ගැන යම් විශ්වාසයක් තැබිය හැකි බවයි අතුරුදහන් මුලතිව් ඥාතීන්ගේ ප්‍රකාශිකා මරියසුරේෂ් ඊශ්වරී පෙන්වා දෙන්නේ.
Facebook Comments
