සමාජවාදී සමානතා පක්ෂය විසින් මැයි දිනය සැමරීම සඳහා මුදල් ගෙවා වෙන් කර ගන්නා ලද කොළඹ නව නගර ශාලාව ලබා නොදීමට එරෙහිව එම පක්ෂය ශ්‍රේෂ්ඨාධිකරණයට මූලික අයිතිවාසිකම් පෙත්සමක් ගොනු කර තිබේ.
මැයි මස පළවන දින ලෝක කම්කරු දිනය සැමරීම සඳහා කොළඹ නව නගර ශාලාව තම පක්ෂය වෙත ලබාදීමට කොළඹ මහ නගර සභාව මුලින් තීන්දු කර තිබූණ ද පසුව ලෝක කම්කරු දිනය සැමරීම අවලංගු කිරීමට රජය තීරණය කිරීමත් සමඟ එම ශාලාව ලබාදීම කොළඹ මහ නගර සභාව විසින් ප්‍රතික්ෂේප කිරිම හරහා මුලික අයිතිවාසිකම් කඩ වී ඇති බව සිය පෙත්සම හරහා එම පක්ෂය පෙන්වා දෙයි.
කෙසේ වෙතත් මැයි මස පළමුවන දින කම්කරු දිනය සැමරීම සඳහා ශ්‍රි ලංකා නිදහස් සේවක සංගමය වෙත කොළඹ මහජන පුස්තකාල ශ්‍රවණාගාරය ලබාදී තිබූ බව ද පෙත්සම්කාර පාර්ශව සිය පෙත්සම හරහා කියා සිටී.
එම පක්ෂයේ ලේකම් විජය ඩයස් විසින් ගොණු කර ඇති පෙත්සමේ වග උත්තරකරුවන් ලෙස කොළඹ මහ නගර සභාව, එහි නගරාධිපතිනී රෝසි සේනානායක ඇතුළු පිරිසක් නම් කර ඇත.
Facebook Comments
