සබරගමුව පළාතේ දෙමළ මාධ්‍ය ගුරු පුරප්පාඩු සඳහා බදවා ගැනීමට සුදුසුකම් ලත් අයදුම්කරුවන් නොමැති බැවින් රත්නපුර හා කෑගල්ල දිස්ත්‍රික්ක දෙකෙහි රජයේ පාසැල්වලින් විශ්‍රාම ලැබූ දෙමළ මාධ්‍ය ගුරුභවතුන් යළි ගුරු සේවයට එක්කරගන්නා බව සබරගමුව ආණ්ඩුකාරවරිය පවසයි.
සබරගමු පලාතේ විදුහල්පතිවරුන් ප්‍රදේශයේ සෑම දෙමළ මාධ්‍ය පාසැලකම උග්‍ර ගුරු හිඟය පිළිබඳව ආණ්ඩුකාර නිලුකා ඒකනායක හට දන්වා ඇති අතර ඒ අනුව මෙම තීරණයට එළඹි බව 05 අඟහරුවාදා නිවිතිගල දෑල දෙමළ මහා විද්‍යාලයේ ප්‍රදේශයේ දෙමළ මාධ්‍ය පැසැල්වල විදුහල්පතිවරු සමග පැවති හමුවට එක්වෙමින් ඇය කියා සිටියාය.
සබරගමුව පළාතේ අධ්‍යාපන කලාප 9 සඳහා විද්‍යා, ගණිත, තොරතුරු තාක්ෂණ යන විෂය ධාරාවන්ගෙන් අධ්‍යාපන පොදු සහතික පත්‍ර උසස්පෙළ විභාගයට පෙනී සිටීම වෙනුවෙන් පන්ති ආරම්භ කිරීම සඳහා උපාධිධාරී ගුරුභවතුන් 81 බඳවා ගැනීමට අයඳුම්පත් කැදෙවූ නමුත් ඒ සඳහා ඉදිරිපත්වූයේ අයදුම්කරුවන් 8 දෙනකු පමණක් බව ද ඇය එහිදී සඳහන් කර ඇත.
සබරගමුව පළාතේ පවතින මෙම ගැටළුවට පිළියම් ලෙස උතුරු නැගෙනහිර පළාත්වලින් දෙමළ මාධ්‍ය ගුරුභවතුන් බඳවා ගත්ත ද ඔවුන්ගෙන් බහුතරයක් මේ වන විට මාරුවීම් ලැබ පළාතෙන් පිටව ගොස් තිබෙන බැවින් මීට පිළියමක් ලෙස සබරගමුව පළාත් සභාව මගින් විශ්‍රාම ලත් දෙමළ මාධ්‍ය ගුරුභවතුන් යළි ගුරු සේවයට එක්කර ගැනීමට තීරණය කර ඇති බවයි ආණ්ඩුකාරවරිය පෙන්වා දී ඇත්තේ.
මෙම වර්ෂයේ ජූලි අවසන් වීමට පෙර රත්නපුර හා කෑගල්ල දිස්ත්‍රික්ක දෙකේ දෙමළ මාධ්‍ය ගුරු හිඟය මුළුමනින්ම විසදීමට කටයුතු කරනවා යැයි ද සබරගමුව ආණ්ඩුකාර නිලූකා ඒකනායක විදුහල්පතිවරුන් හට පොරොන්දු වී තිබේ.
Facebook Comments
