කඳුකර දෙමළ ජනයාගේ දරුවන් වෙනුවෙන් ඇරඹීමට සැලසුම් කළ සරසවියකට වෙන් කළ ඉඩමෙන් කොටසක් හමුදාව අත්පත් කර ගැනීමට එරෙහිව ලංකා කම්කරු කොංග්‍රසය ආණ්ඩුවට විරෝධය දක්වා තිබේ.
“කොටගල රොසිටා වත්තේ අක්කර සීයයක විතර ෆාම් එකක් තිබ්බා. ඒත් එක අවුරුදු ගානක් අත්හැර දමා තිබුනේ.අපේ සැලසුම වෙලා තිබුනේ මේ ඉඩමේ වතු කම්කරුවන්ගේ දරුවන් වෙනුවෙන් කෘෂිකර්ම විශ්ව විද්‍යාලයක් පටන් ගන්න. ඒකෙ ප්‍රායෝගික පුහුණුව වෙනුවෙන් ෆාම් එකත් නැවත පටන්ගන්න.ඒත් ආණ්ඩුව ඒකෙන් අක්කර දහයක් හමුදාවට දීලා,” යැයි ලංකා කම්කරු කොංග්‍රස් (CWC) ලේකම් ජීවන් තොණ්ඩමාන් පවසයි.
පසුගිය දිනවල දිවයිනට පැමිණි ඉන්දීය විදේශ ඇමැති සුබ්‍රමානියම් ජෙයශන්කර් හමුවූ CWC නියෝජිත පිරිස ඉල්ලා සිටියේ ඉන්දීය සම්භවයක් සහිත වතු කම්කරු ජනයාගේ දරුවන් වෙනුවන් විශ්ව විද්‍යාලයක් ඇරඹීමට සහයෝගය ලබා දෙන ලෙසයි.
රාජපක්‍ෂ ආණ්ඩුවේ හවුල්කාර පක්ෂයක් ලෙස කටයුතු කළ ලංකා කම්කරු කොංග්‍රසය පසුගිය දින ඉන් ඉවත් වුයේ වතු කම්කරුවන්ට ලබා දුන් පොරොන්දු ඉටුකිරීමට ආණ්ඩුව අසමත් වූ බවට චෝදනා නගමිනි.
“අනෙකුත් කාරනා අතර වතුකරයේ ඉඩම් හමුදාවට ලබා දීමත් අපි ආණ්ඩුවෙන් වෙන් වෙන්න ප්‍රධාන හේතුවක්. මේකට අපි විරෝධය දැක්වුවා. ඒත් ආණ්ඩුවේ තීන්දුව වෙනස් වුනේ නැහැ.”
ආණ්ඩුවේ හවුල්කාර පක්ෂයක් වුණත් ලංකා කම්කරු කොංග්‍රසයේ මූලික අරමුණ ජනතාව ආරක්ෂා කිරීම බව කොටගල දී කඳුරට මාධ්‍යවේදීන් පසුගිය දිනෙක හමුවූ ජීවන් තොණ්ඩමාන් පවසා තිබිණි.
`ජනාධිපතිගේ ගෙදර තිබුණු මිරිහානේ පැවති විරෝධතාවයේදී විශේෂ කාර්ය බලකාය සහ යුද හමුදාව මාධ්‍යවේදීන්ට හා ජනතාවට කළ පහරදීම අපි තරයේ හෙළා දකිනවා.“
“මෙය වැරදි වැඩක්. මොන කතා කිව්වත් නිසි පරීක්‍ෂණයකින් තොරව පුද්ගලයන් අත්අඩංගුවට ගෙන හිරිහැර කරන්න බැහැ.“
මිරිහානේ විරෝධතාකරුවන් වෙනුවෙන් පෙනී සිටී නීතිඥයන්ට ස්තුතිය පළ කරන ලංකා කම්කරු කොංග්‍රස් ලේකම් පෙන්වා දුන්නේ ජනාධිපතිවරයා කැඳවූ සර්ව පාක්ෂික සමුළුව වර්ජනය කිරීම මගින්ද තමන් ආණ්ඩුවට ඇති විරෝධය දක්වා ඇති බවයි.
දෙමළ ප්‍රගතිශීලි පෙරමුණ තලවාකැලේ නගරයට කැඳවා ඇති විරෝධතා උද්ඝෝෂණයට ලංකා කම්කරු කොංග්‍රසයේ විරෝධයක් නොමැති බවද තොණ්ඩමාන් පවසයි.
“අද මිනිස්සු ඉවුම් පිහුම් කරගන්න ගෑස්, ඉන්ධන නැතිව දුක් විඳිනවා. බඩු මිල ඉහල ගිහින්. මේකට විරුද්ධව කොහොමත් ජනතාව පාරට බහිනවා.ඒක පිටුපස්සේ කුමන පක්ෂයක් සිටියත් අපි සහාය දෙනවා.”
Facebook Comments
