දසක ගණනාවක් යුද්ධය හේතුවෙන් දැඩි පීඩනයට මුහුණ දුන් උතුරේ ජනයාට යුද්ධය නිවා වීමෙන් පසුවත් ඔවුන්ගේ අයිතීන් හිමි වී නොමැති බව විපක්ෂ නායකයා පිළිගෙන තිබේ.
“යුද්ධයෙන් පසුවත් ඔබ සියළුදෙනාට ඔබගේ ආර්ථික, සමාජීය, දේශපාලනික, ආගමික, සංස්කෘතික අයිතීන් තහවුරු කරගන්නට බැරිවෙලා තිබෙනවා.”
ආණ්ඩුවේ ජනප්‍රිය භාවය ගිලිහෙමින් පවතින වකවානුවක දෙමළ ඡන්ද දිනා ගැනීමේ වෑයමක් බව දිස්වන සංචාරයක උතුරේ නිරතව සිටින මෛත්‍රී, රනිල් පාලනයේ නිවාස, ඉදිකිරීම් සහ සංස්කෘතික කටයුතු අමාත්‍යවරයා වු වත්මන් විපක්ෂ නායක සජිත් ප්‍රේමදාස ඒ බව සදහන් කළේ මුලතිව්, පුදුකුඩිඉරිප්පු ප්‍රදේශයේ ජනතාව අමතමිනි.
තමන් විසින් අදියර කිහිපයක් යටතේ සාදා නිමකිරීමට ආරම්භ කළ නිවාස ව්‍යාපෘති නවතා දැමීම සම්බන්ධයෙන්ද ඔහු එහිදී වත්මන් රජයට චෝදනා කළේය.
උතුරුකරයේ පමණක් නොව මුළු රටේම ජනතාවගේ ආර්ථික, සමාජීය, දේශපාලනික, ආගමික, සංස්කෘතික අයිතීන් ආරක්ෂා කරමින් රටේ සියළුම ජන කොට්ඨාස හා සියළුම ආගම්වලට සම්බන්ධ පුරවැසියන් එක හා සමානව සලකන යුගය මේ රටේ බිහිකරන්නට අනිවාර්යෙන්ම කටයුතු කරන බවත් සමගි ජන බලවේගයේ නායකයා එහිදී සදහන් කළේය.
කෙසේ වෙතත්, දෙමළ ජනතාව පසුගිය දොළොස් අවුරුද්දකට වැඩි කාලයක් තිස්සේ මුහුණපා සිටින යුද්ධයේ අනිටු පල විපාක සහ හමුදාකරණය ගැන කතා නොකර සිටීමට ඔහු ප්‍රවේසම් විය.
පුදුකුඩිඉරිප්පු ප්‍රදේශයේ ජනයා උත්සවාකාරයෙන් විපක්ෂ නායකයා පිළිගත් ආකාරය පහත වීඩියෝවෙන් නරඹන්න,
Facebook Comments
