ලාංකික ධීවරයකු ඝාතනය කළ බවට නාවික හමුදාවට චෝදනා

උතුරු මුහුදේ මසුන් අල්ලමින් සිටී ධීවරයකු ඝාතනය කළ බවට නාවික හමුදාවට චෝදනා එල්ලවී තිබේ.

“නාවික හමුදාව උවමනාවෙන්ම මේ ධීවරයාගේ බෝට්ටුව හප්පලා මුහුද මැද්දේ පෙරලා දමා තියෙනවා. එයාගේ ඔලුවත් තුවාල වෙලා තියෙනවා. මේක නාවික හමුදාව කරපු ඝාතනයක්,“යැයි දෙමළ
ජාතික පක්ෂයේ ප්‍රධාන ලේකම්, හිටපු පාර්ලිමේන්තු මන්ත්‍රී එම්.කේ.සිවාජිලිංගම් චෝදනා කරයි.

ඊයේ උදෑසන මුහුදු ගිය යාපනය මාදගල් කුමාන්තුරෙයි ප්‍රදේශයේ ධීවරයකු වූ තිස් දෙහැවිරිදි තිලිපන්ගේ මල සිරුර මාදගල් වෙරළට ගොඩ ගසා තිබියදී ප්‍රදේශවාසින් විසින් සොයා ගෙන තිබිණි.

ඔහු යාත්‍රා කළ බෝට්ටුව පෙරලී ඇත්තේ වෙරළේ සිට දියඹට මීටර 200 ක දුරක දීය.

සෙසු ධීවරයන් පවසන්නේ නාවික හමුදා බෝට්ටුවක් පැමිණ තිලිපන්ගේ බෝට්ටුව හා ගැටීමෙන් එය පෙරලුනු බවයි.

හානියට පත් බෝට්ටුව ධීවරයන් විසින් ගොඩට රැගෙන විත් තිබේ.

සාමාන්‍යයෙන් කිසියම් අයෙක් මුහුදේ දී ජිවිත හානියට පත් වුවහොත් ඔහුගේ හෝ අයගේ මල සිරුර වෙරළට ගොඩ ගසන්නේ පැය 24 කට පසුව වුවත් මොහුගේ සිරුරේ උණුසුම හොඳින් පැවති බව මියගිය ධිවරයාගේ පවුලේ ඥාතින් පවසයි.

“මේ මරණ ගැන සාක්කි දෙන්න කවුරුත් ඉදිරිපත් වෙන්නේ නැහැ. බයයි. කවුරු හරි සාක්කි දුන්නොත් ඒ අයටත් මේ ටික තමයි,“යැයි සිවාජිලිංගම් අනතුරු අඟවයි.

තම සගයාගේ මරණයේ වගකීම නාවික හමුදාව බාර ගත යුතු බව පවසමින් මාදගල් ධීවරයන් උද්ඝෝණය කරමින් එල්ල කළ චෝදනා ප්‍රදේශයේ නාවික බලධාරීන් විසින් ප්‍රතික්ෂේප කර තිබේ.

මේ අතර, ‘ලක්විදු 3’ නැමති බහු දින ධීවර යාත්‍රාවෙන් තංගල්ල මුහුදු ප්‍රදේශයේ දී 2022 ජනවාරි 08 පස්වරුවේ මුහුදට වැටුණු ධීවර‍යකු, ඒ 543 යාත්‍රාව මඟින් ජනවාරි 09 දා උදෑසන බේරා ගැනීමෙන් අනතුරුව කඩිනමින් ගාල්ල වරාය වෙත රැගෙන විත්, ඉදිරි ප්‍රතිකාර සඳහා කරාපිටිය ශික්‍ෂණ රෝහල වෙත යොමු කිරීමට කටයුතු කළ බව නාවික හමුදාව ඡායාරූප ද පල කරමින් නිවේදනය කර තිබේ.