රාජ්‍ය සම්මාන දිනු ලේඛකයාට පොලිසිය වද දී පාපොච්චාරණය කරවලා

ත්‍රස්ත නීතිය යොදා ගනිමින් වසර දහසයකට වැඩි කාලයක් රදවාගෙන සිටින රාජ්‍ය සම්මානලාභී දෙමළ ලේඛකයකුගෙන් පොලීසිය පාපොච්චාරණයක් ලබා ගෙන ඇත්තේ ඔහුට වධ හිංසා පැමිණවීමෙන් බවට අධිකරණය හමුවේ කරුණු ඉදිරිපත් වී තිබේ.

සාහිත්‍යකරණයේ නියැලෙන විශිෂ්ටයන් වාර්ෂිකව ඇගයීමට ලක් කෙරෙන රාජ්‍ය සාහිත්‍ය උළෙලේදී හොඳම ස්වතන්ත්‍ර දෙමළ භාෂා නවකථාකරු ලෙස පසුගිය ඔක්තෝබර් මාසයේදී ඇගයීමට පාත්‍ර වු සිවලිංගම් අරූරන් ගේ නීතිඥයා කොළඹ මහාධිකරණය හමුවේ පවසා ඇත්තේ හිටපු ජනාධිපති ගෝඨාභය රාජපක්ෂ ආරක්ෂක අමාත්‍යාංශයේ ලේකම්වරයාව සිටියදී ඝාතනය කිරීමට තැත් කිරීමේ චෝදනාව මත අත්අඩංගුවට ගත් සැකකරුට පොලිසිය විසින් වධහිංසා පමුණුවා පාපොච්චාරණයක් ලබා ගෙන ඇති බවයි.

සැකකරුගේ පාර්ශ්වයෙන් පෙනී සිටි ජනාධිපති නීතීඥ කේ.වී තවරාසා අධිකරණයට කරුණු දක්වමින් වැඩි දුරටත් පෙන්වා දී ඇත්තේ නඩුවේ දෙවැනි සැකකරු වන මොරටු සරසවියේ ඉංජිනේරු උපාධිධාරියෙකු ද වන සාහිත්‍යවේදී සිවලිංගම් ආරුරන්ට පොලීසිය වධ හිංසා පමුණුවා බරපතළ තුවාල ද සිදු කර එම පාපොච්චාරණය ලබා ගෙන ඇති බවයි.

සැකකරු දෙමළ බසින් ප්‍රකාශ කළ බවට රජය ඉදිරිපත් කළ ප්‍රධාන සාක්ෂිය තම පාර්ශ්වයේ කරුණු දැක්වීමෙන් පසු කොළඹ මහාධිකරණ විනිසුරුවරයා විසින් ප්‍රතික්ෂේප කළ බව නීතිඥ කේ.වී.තවරාසා කොළඹදී මාධ්‍යවේදීන් හමුවේ කියා සිටියේය.

මාර්තු 2 වැනි බ්‍රහස්පතින්දා කොළඹ මහාධිකරණ විනිසුරු නවරත්න මාරසිංහ වසර 14ක විමර්ශනයකින් පසු සැකකරුගේ පාපොච්චාරණයක් බවට රජයේ පාර්ශවයෙන් දෙමළ බසින් ඉදිරිපත් කළ පාපොච්චාරණය ප්‍රතික්ෂේප කර තිබේ.

2006 දෙසැම්බර් 01 වැනිදා ආරක්‍ෂක ලේකම් ගෝඨාභය රාජපක්‍ෂ ඝාතනය කිරීමේ අරමුණින් කොළඹ කොල්ලුපිටිය පිත්තල හන්දියේදී මරාගෙන මැරෙන බෝම්බකරුවකු විසින් එල්ල කරන ලද ප්‍රහාරයකින් හමුදා ආරක්‍ෂක නිලධාරීන් තිදෙනකු මිය ගියේය.

ත්‍රස්තවාදය වැලැක්වීමේ පනත යටතේ 2013 දෙසැම්බර් 04 වැනිදා එම ප්‍රහාරයට අදාලව සැකකරුවන් පස් දෙනෙකුට එරෙහිව කොළඹ මහාධිකරණයේ නඩුවක් පවරා තිබුනි.

එම නඩුවේ දෙවැනි සැකකරු වන සිවලිංගම් ආරුරන් එරෙහිව පවරා ඇති නඩුවේදී නීතිපතිවරයා වෙනුවෙන් පෙනී සිටි නියෝජ්‍ය සොලිසිටර් ජනරාල් ජනාධිපති නීතිඥ රොකාන්ත අබේසූරිය සැකකරුගේ පාපොච්චාරණය සම්බන්ධයෙන් රජයේ ස්ථාවරය පැහැදිලි කර තිබේ.

එහිදී ඔහු සදහන් කර ඇත්තේ ත්‍රස්ත මර්දන ඒකකය සිවලිංගම් ආරුරන්ගෙන් ප්‍රශ්න කිරීමේදී ඔහුට පහරදීමක් හෝ වධහිංසා පැමිණවීමක් සිදු කර නොමැති බවයි.

ඝාතනයට තැත් කිරීමේ ප්‍රහාරයේ සතුරු කුමන්ත්‍රණයට තමා සම්බන්ධ බවත් එම ඝාතනයට අනුබල දුන් බවත් ඔහු දෙමළ භාෂාවෙන් පාපොච්චාරණ ප්‍රකාශයක් සහකාර පොලිස් අධිකාරීවරයා වෙත ඉදිරිපත් කළ බව නියෝජ්‍ය සොලිසිටර් ජනරාල් ජනාධිපති නීතිඥ රොකාන්ත අබේසූරිය අධිකරණය හමුවේ වැඩි දුරටත් පවසා තිබේ.

එබැවින් සැකකරු දුන් පාපොච්චාරණය සැකකරුට එරෙහිව සාක්ෂි වශයෙන් පිළිගැනීමට අධිකරණය නියෝග කළ යුතු බවට ඔහු තර්ක කර ඇත.

රජයේ තර්කයෙන් අනතුරුව සැකකාර සිවලිංගම් ආරුරන් වෙනුවෙන් පෙනී සිටි ජනාධිපති නීතිඥ කේ.වී.තවරාසා සිය තර්කයේදී කියා ඇත්තේ 2009 වසරේ ත්‍රස්ත විමර්ශන කොට්ඨාශය විසින් සිවලිංගම් අරුරන් අත්අඩංගුවට ගෙන හුදකලා සිරකඳවුරේ රඳවා තබාගෙන වධහිංසා පමුණුවා පාපොච්චාරණයක් ලබාගත් බවයි.

රජයේ සාක්ෂිකාර සහකාර පොලිස් අධිකාරී සිල්වාගේ සාක්ෂිය හරස් ප්‍රශ්න කරමින් සිටියදී සාක්‍ෂියේ පරස්පරතා කිහිපයක් අධිකරණයේ අවධානයට යොමු වූ බවද ජනාධිපති නීතීඥ කේ.වී.තවරාසා පෙන්වා දෙයි.

සිවලිංගම් අරුරන් පොලිස් අත්අඩංගුවේ සිටියදී ඔහුගේ සිරුරේ තුවාල සිදු වු බවට අධිකරණ වෛද්‍ය නිලධාරියා ලබාදුන් වාර්තාවද නීතිඥවරයා විසින් අධිකරණයට ඉදිරිපත් කර තිබේ.

එබැවින්, පැමිණිල්ල විසින් ප්‍රධාන සාක්ෂියක් ලෙස ඉදිරිපත් කරන ලද වරද පිළිබඳ පාපොච්චාරණය ප්‍රතික්ෂේප කරන ලෙස ජනාධිපති නීතීඥ කේ.වී.තවරාසා අධිකරණයෙන් ඉල්ලා ඇත.

රජයේ පාර්ශවයේ සහ සැකකාර පාර්ශවයේ කරුණු දැක්වීමෙන් අනතුරුව ශ්‍රේෂ්ඨාධිකරණ විනිසුරු නවරත්න මාරසිංහ සැකකර සිවලිංගම් ආරුරන්ගේ බවට රජයේ පාර්ශවය ඉදිරිපත් කළ පාපොච්චාරණය ප්‍රතික්ෂේප කර තිබේ.

නඩුව යළි 2023 අප්‍රේල් 3 වැනිදා කැදවීමට නියමිත බව ජනාධිපති නීතීඥ කේ.වී.තවරාසා වැඩි දුරටත් සදහන් කරයි.