බැඳුම්කර ජනාධිපති කොමිසමේ ඉදිරිපත් කළ බැඳුම්කර වාර්තාව පිළිබඳව විවාදය පැවැත්වීම සඳහා පාර්ලිමේන්තුව රැස් කරන ලෙසට කතානායක කරු ජයසූරිය වෙත දැනුම් දෙන බව අග්‍රාමාත්‍ය පවසයි.
පාර්ලිමේන්තුව කැඳවා අදාළ වාර්තාව පිළිබඳ විවාද කල යුතු බව මෙන්ම තමන් ඒ පිළිබඳ මේ වන විටත් කතානායකවරයා දැනුවත් කර ඇති බවයි 07 ඉරිදා කැම්බල් පිටියේ පැවති එජාප විශේෂ සමුළුවේදී අගමැති රනිල් වික්‍රමසිංහ ප්‍රකාශ කර සිටියේ.
“අපි විනිවිදභාවයෙන් වැඩකර තිබෙනවා. කිසිම ප්‍රශ්නයක් නැහැ. සඟවන්න කිසිවක් නැහැ” යි ඔහු සඳහන් කළේය.
මාධ්‍යට අභියෝගයක්
2008 වසරේ සිටම බැඳුම්කර වංචාවන් සිදුව ඇති බවට කොමිසම හෙළිදරව් කර ඇති බව පෙන්වා දුන් අගමැතිවරයා ඒ පිළිබඳවත් ක්‍රීයාත්මක වීමට සුදානම් විය යුතු බව කියා සිටියේය.
එම කාලයේදී රුපියල් බිලියන 4000ක මුදලක් අනුමැතියෙන් තොරව වෙන්දේසි කර තිබෙන බව පැවැසූ අගමැතිවරයා බැඳුම්කර කොමිෂන් වාර්තාව පිළිබඳව මාධ්‍යයෙන් ඔහුගෙන් ප්‍රශ්න කරන්නා සේම මහින්ද රාජපක්ෂගෙනුත් ප්‍රශ්න කර සිටින්නැයිද මාධ්‍යයට අභියෝග කළේය.
ජනතා විමුක්ති පෙරමුණ, ශ්‍රී ලංකා නිදහස් පක්ෂයේ පාර්ශව මෙන්ම ඒකාබද්ධ විපක්ෂය නියෝජනය කරන පාර්ශව ගණනාවක් මෙම වාර්තාව සම්බන්ද්ව විවාදයක් ඉල්ලා සිටි අතර පාර්ලිමේන්තුව කැඳවීමත් සමඟ අග්‍රාමාත්‍යවරයාට එරෙහිව විශ්වාසභංගයක් ගෙන එන බව විමල් වීරවංශ මන්ත්‍රීවරයා මාධ්‍යයට කියා තිබුණි.
Facebook Comments
