පාතාල නායකයෙකු හා මත්ද්‍රව්‍ය ඡාවාරම්කරුවෙකු ලෙස හඳුන්වනු ලබන මාකඳුරේ මධුෂ් ඩුබායි පොලිසිය විසින් අත්අඩංගුවට ගන්නා අවස්ථාවේ ඔහු සමඟ සිටියේ යැයි පැවසෙන රාජතාන්ත්‍රික ගමන් බලපත්‍රය හිමි පුද්ගලයා තමන්ගේ ලේකම්වරයෙකු යැයි පවසමින් රකාශ නිකුත්කළ පුද්ගලයන්, මාධ්‍ය ආයතන සහ පිරිස් පිලිබඳ සොයා බලා පුළුල් විමර්ශනයක් සිදුකරන ලෙසට අමාත්‍ය මංගල සමරවීර පොලිස්පතිවරයාගෙන් ඉල්ලා තිබේ.
එමෙන්ම මාකඳුරේ මධුෂ් නැමැත්තා සමග සම්බන්ධතා පවත්වා ඇති දේශපාලකයින් පිළිබඳවත් විශේෂයෙන් ඔහුව රටින් පැන්නීම සඳහා ගුවන් තොටුපළට නිරුපද්‍රිතව රැගෙන ගිය මහජන නියෝජිතයින් කවුරුන් ද යන කාරණා ද විමර්ශණය කරන ලෙස ඇමැතිවරයා ඉල්ලීමක් කර ඇත.
සමරසිංහ ආරච්චිල්ලාගේ මධුෂ් ලක්ෂිත නොහොත් මාකඳුරේ මධුෂ් පසුගිය දිනක ඩුබායි පොලිසිය විසින් අත්අඩංගුවට ගත් අතර ඔහු සමඟ ශ්‍රී ලංකාවේ රාජතාන්ත්‍රික ගමන් බලපත්‍රයක් හිමි පුද්ගලයෙකුද අත්අඩංගුවට ගත් බව ඩුබායි රාජ්‍යයේ මාධ්‍ය වාර්තාකර තිබුණි.
එම පුවත පළ වීමත් සමඟ එසේ අත්අඩංගුවට ගනු ලැබු පුද්ගලයා මුදල් හා ජනමාධ්‍ය අමාත්‍යවරයාගේ ලේකම්වරයෙකු බවට විපක්ෂයේ මන්ත්‍රීවරු කිහිදෙනෙකු විසින්ම චෝදනා කළේය.
ශ්‍රී ලංකා පොදුජන පෙරමුණ මූලස්තානයේ දී පැවති එවැනි මාධ්‍ය හමුවක් අමතමින් සන්ධාන පාර්ලිමේන්තු මන්ත්‍රී තේනුක විදානගමගේ ”පාතාල නායක මාකදුරේ මධූෂ් සමගින් ඩුබායිහි දී අත්අඩංගුවට ගෙන ඇති රාජතාන්ත්‍රීක ගමන් බලපත් හිමි පුද්ගලයා මුදල් ඇමති මංගල සමරවීර මහතාගේ ලේකම්වරයෙකු” බව පවසා තිබුණි.
අදාළ රාජතාන්ත්‍රීක හැදුනුම්පත නිකුත් කිරීම සිදුව ඇත්තේ මුදල් ඇමතිවරයා සමග සිටින ලේකම්වරයෙකු හරහා බව සහ ‘මෙම මහා මත්කුඩු ජාවාරම මෙහෙයවන අය සිටින්නේ මුදල් ඇමතිවරයාගේ ඔඩොක්කුවේ” යැයි ශ්‍රීලනිප මාධ්‍ය ප්‍රකාශක පාර්ලිමේන්තු මන්ත්‍රී ඩිලාන් පෙරේරා පසුගිය දා පැවති මාධ්‍ය හමුවක දී කියා සිටියේය.
කෙසේ වෙතත් 6 බදාදා කැඳවා තිබු මාධ්‍ය හමුවක දී මාධ්‍යවේදීන් නැඟු පැනයකට පිළිතුරු දෙමින් අදාළ චෝදනා සියලුල අමාත්‍ය මංගල සමරවීර තරයේ ප්‍රතික්ෂේප කළේය.
“මම දන්නේ නැහැ ඒ පුද්ගලයා ජිවිතේට මට සම්බන්ධව ඉඳල නම් නැහැ.” යි අමාත්‍යවරයා සිනාසී තමාට එල්ල වන චෝදනා වලට පිළිතුරු දුනි.
ඇත්ත නැත්ත හෙළි කරන්න
ඇතැම් මාධ්‍ය හා විපක්ෂයේ මහජන නියෝජිතයින් මෙවැනි අභූත ප්‍රකාශ හරහා 30 වසරකට වැඩි තමන්ගේ පාර්ලිමේන්තු ජිවිතයේ කීර්ති නාමයට හිතාමතා හානි පැමිණවීමට මෙන්ම රටේ මත්ද්‍රව්‍ය ජාවාරමට සම්බන්ධ සැබෑ පුද්ගලයින් බේරාගැනීමටත් උත්සාහ දරන බවටයි අමාත්‍ය මංගල සමරවීර චෝදනා කරන්නේ.
තමන් හට අභූත චෝදනා මාධ්‍ය ඉදිරියේ ප්‍රකාශ කළ පුද්ගලයන්ට සහ ඒවා වගකීම් විරහිතව විද්‍යුත් හා මුද්‍රිත මාධ්‍ය හරහා ප්‍රචාරය කළ මාධ්‍ය ආයතනවලට එරෙහිව ද මේ වන විට නීතිමය පියවර ගැනීමට කටයුතු කරමින් සිටින බව ද අමාත්‍යවරයා පොලිසිපතිවරයාට දන්වා තිබේ.
එබැවින් මාකඳුරේ මධුෂ් නැමැත්තා සමඟ අත්අඩංගුවට පත් අයකුට තමන්ගේ සම්බන්ධීකරණ ලේකම්වරයකු බවට හා තමන් ඔහුට රාජ්‍යතන්ත්‍රීක විදෙස් ගමන් බලපත්‍රයක් ලබාදී ඇති බවටත් පලවන වාර්තා සම්බන්ධයෙන් ඉතා ඉක්මන් විමර්ශනයක් සිදුකර, ඇත්ත නැත්ත රටට හෙළි කරන ලෙස මංගල සමරවීර අමාත්‍යවරයා වැඩි දුරටත් පොලිස්පතිවරයාගෙන් ඉල්ලා ඇත.
Facebook Comments
