ඉන්න හිටින්න ඉඩමක් නැති පවුල් දහස් ගණනක් ඉන්න දිස්ත්‍රික්කයක්

යුද්ධයෙන් වැඩිම හානියට පත් වන්නියේ ඉඩම් බලහත්කාරයෙන් අත්පත්කරගන්නා බවට රාජ්‍ය ආයතන වෙත චෝදනා එල්ල වෙද්දී, මුලතිව් දිස්ත්‍රික්කයේ ජීවත් වීමට ඉඩමක් නොමැති පවුල් 3389ක් සිටින බව දෙමළ ජනතා නියෝජිතයෙක් හෙළි කර තිබේ.

ප්‍රදේශයේ තරුණ තරුණියන් 28626 දෙනකුට ජීවනෝපායක් කරගැනීම සදහා එක් අයකුට ඉඩම් අක්කරය බැගින් ලබා දෙන ලෙස දිස්ත්‍රික් ලේකම් කාර්යාලයෙන් 2022 වසරේ මුලදී ඉල්ලීම් කළත් මේ දක්වා එයට නිසි පිළිතුරක් ලැබී නොමැති බවයි හිටපු උතුරු පළාත් සභා මන්ත්‍රී තුරෙයිරාසා රවිහරන් පවසන්නේ.

මුලතිව් දිස්ත්‍රික්කයේ ජීවත් වන රැකියා විරහිත තරුණ තරුණියන් එම ඉල්ලීම කර තිබුනේ ද දිස්ත්‍රික් ලේකම් කාර්යාලයෙන් කර තිබු දැනුම් දීමකට අනුව බව තුරෙයිරාසා රවිහරන් පෙන්වා දී ඇත්තේ මුලතිව් දිස්ත්‍රික්කයේ පවතින ඉඩම් ගැටළු සම්බන්ධයෙන් අගෝස්තු 26 වැනිදා නිකුත් කළ මාධ්‍ය නිවේදනයක් මගිනි.

හිටපු පළාත් සභිකයා පවසන පරිදි යුද්ධය නිමා වන විට වන සංරක්ෂණ දෙපාර්තමේන්තුව යටතේ පැවැතියේ මුලතිව් දිස්ත්‍රික්කයේ මුළු ඉඩම් ප්‍රමාණයෙන් 36.27% කි. එය අක්කර 222006 ක ප්‍රමාණයකි.

යුද්ධය නිමා වීමෙන් පසු තවත් ඉඩම් අක්කර 167484 ක් වන සංරක්ෂණ දෙපාර්තමේන්තුව තමන් භාරයට ගෙන තිබේ.

වනාන්තර ආරක්ෂා කළ යුතු බව පවසමින් තවත් ඉඩම් අක්කර 42631 ක් වන සංරක්ෂණ දෙපාර්තමේන්තුව විසින් මුලතිව් දිස්ත්‍රික් ලේකම් කාර්යාලයෙන් ඉල්ලා ඇති බව පවසන තුරෙයිරාසා රවිහරන් හිටපු පළාත් සභා මන්ත්‍රීවරයා අවධාරණය කරන්නේ මේ වන විට මුලතිව් දිස්ත්‍රික්කයේ මුළු ඉඩම් ප්‍රමාණයෙන් 74.24% ක් වන සංරක්ෂණ දෙපාර්තමේන්තුව යටතේ පවතින බවයි.

මහවැලි සංවර්ධන අධිකාරිය, පුරා විද්‍යා දෙපාර්තමේන්තුව, වන ජීවි දෙපාර්තමේන්තුව හා රජයේ ආරක්ෂක අංශ විසින් ද මුලතිව් දිස්ත්‍රික්කයේ විශාල ප්‍රමාණයෙන් ඉඩම් අත්පත්කරගෙන සිටියත් ප්‍රදේශයේ පවුල් 3389 ක් ජීවත් වීමට ඉඩමක් නොමැතිව සිටින බවයි තුරෙයිරාසා රවිහරන් පවසන්නේ.

ශ්‍රී ලංකාවේ වැඩිම හමුදා ගහනයක් සිටින මුලතිව් දිස්ත්‍රික්කයේ පුද්ගලික ඉඩම්වල වාඩිලාගෙන සිටින යුද හමුදාව ඉවත් කරගන්නා ලෙස රජයට බලකරන උද්ඝෝෂණ නිතර පැවැත්වේ.

ආණ්ඩුක්‍රම ව්‍යවස්ථාවේ 13 වැනි සංශෝධනය සහ බලය බෙදීම පිළිබඳ සිය යෝජනා සහ ඉදිරි ක්‍රියාමාර්ග පාර්ලිමේන්තුවට ඉදිරිපත් කරමින් අගෝස්තු 9 වැනිදා පාර්ලිමේන්තුවේ කළ විශේෂ ප්‍රකාශයේදී ජනාධිපති රනිල් වික්‍රමසිංහ සදහන් කර තිබුනේ උතුරු නැඟෙනහිර සෑම දිස්ත්‍රික්කයකම වන සංරක්ෂණ දෙපාර්තමේන්තුව මගින් පාලනය වන ඉඩම්වලට අදාළව ඉඩම් භාවිත සිතියම්, වත්මන් ඉඩම් භාවිත රටා සහ ප්‍රාදේශීය ලේකම්වරුන්ගේ යෝජනා පිළිබඳ අවධානය යොමු කරමින් දත්ත පද්ධතියක් සකස් කර ඇති බවයි.

ජනාධිපති ලේකම්වරයාගේ ප්‍රධානත්වයෙන් යුත් කමිටුවක් මගින් ඉඩම් සම්බන්ධ කටයුතු පරීක්ෂා කර ඒ සඳහා අවශ්‍ය පහසුකම් සලසන බව ජනාධිපතිවරයා එහිදී වැඩි දුරටත් පවසා තිබුනි.

මුලතිව් දිස්ත්‍රික්කයේ කිරි ගොවීන්ට අයත් කිරි ගවයන් 89000 ක් පමණ වාසය කරන අතර එම සතුන්ට තණ කෑම සදහා තණ භුමි වෙන් කර දෙන ලෙස දිස්ත්‍රික් ලේකම් කාර්යාලයෙන් කළ ඉල්ලීමටද මේ දක්වා පිළිතුරක් ලැබී නොමැති බවයි තුරෙයිරාසා රවිහරන් නිකුත් කළ මාධ්‍ය නිවේදනයේ වැඩි දුරටත් සදහන්ව ඇත්තේ.