යෝජිත නව ආණ්ඩුකුම ව්‍යවස්ථාව හරහා උතුරු නැගෙනහිරට දේශපාලන විසඳුමක් සෙවීමේ දී ජනපති බලතල තවදුරටත් ආරක්ෂා වන පරිදි හා මධ්‍යම රජයට බැදීමක් ඇති විසඳුමක් ලබා දෙන ලෙසට මල්වතු හා අස්ගිරි පාර්ශවයේ හිමිවරුන් ලිපියක් මඟින් ජනපතිට දන්වා ඇත.
උභය මහාවිහාරයන්හ හි ලේඛකාධිකාරී ස්වාමින් වහන්සේලාගේ අත්සනින් යුතුව සැකැසූ මෙම ලියැවිල්ල ඉදිරිපත් කර ඇත්තේ ජනාධිපතිවරයා හදිසියේම මහනුවරට පැමිණ ජනාධිපති නිල නිවෙසේදී ජ්‍යෙෂ්ඨ කාරක සංඝ සභික හිමිවරුන් හමු වූ අවස්ථාවේදීය.
නව ආණ්ඩු ක්‍රම ව්‍යවස්ථාවක් හෝ පවතින ව්‍යවස්ථාවට සංශෝධන ගෙන එන්නේ නම් හෝ ඒවායෙහි සිදු කිරීමට අවශ්‍ය ව්‍යුහමය වෙනස පිළිබද කරුණු පිළිබඳව තමන් වහන්සේලා දැනුවත් කරන මෙන්ද මෙම ලිපිය මඟින් ඉල්ලා සිටින බවයි අස්ගිරි මහා විහාරපාර්ශවයේ ලේඛකාධිකාරී ආචාර්ය මැදගම ශ්‍රී ධම්මානන්ද හිමි කියා සිටියේ.
රාජ්‍ය ආරක්ෂාව හා භූමියේ ආරක්ෂාව පිළිබද පවතින ගැටළු සම්බන්ධයෙන් මෙන්ම සම්බුද්ධ ශාසනය ,විහාරස්ථාන ,පුරා විද්‍යාව ,මාතෘ භූමියේ පැවැත්ම රාජ්‍ය පාලනය ඇතුළත් කරුණු රැසක් පිළිබද ජනාධිපතිවරයා සමඟ සාකච්ඡා කළ බව ද උන්වහන්සේ වැඩිදුරටත් පැවසීය.
Facebook Comments
