ආණ්ඩුව විරෝධය දක්වන ජිනීවා යෝජනාව ඡන්දයක් නැතිවම සම්මතයි

ශ්‍රී ලංකාවේ සංහිඳියාව, වගවීම සහ මානව හිමිකම් ප්‍රවර්ධනය වෙනුවෙන් එක්සත් ජාතීන්ගේ මානව හිමිකම් මණ්ඩලයේ 57 වැනි සැසිවාරයට ඉදිරිපත් කෙරුණු යෝජනාව ඡන්ද විමසීමකින් තොරවම සම්මත කරගෙන තිබේ.

මධ්‍යම කණ්ඩායම (Core Group) නමින් හැඳින්වෙන රටවල් හයක් එක්වී මෙවර සම්පාදනය කර ඇත්තේ යුද අපරාධ ඇතුළු බරපතල මානව හිමිකම් උල්ලංඝන සම්බන්ධයෙන් ආණ්ඩුවේ වගකීම් ඉටුකිරීමට තවත් කල් දෙන යෝජනාවකි.

“මානව හිමිකම් කවුන්සිලයේ 51/1 යෝජනාවේ වරමත්, එහි දැක්වෙන මානව හිමිකම් පිළිබඳ එක්සත් ජාතීන්ගේ මහකොමසාරිස් කාර්යාලයෙන් ඉල්ලා සිටින සියලු වැඩ කටයුතුත් සඳහා කල් දීමට තීරණය කරන අතර 58 වැනි සැසිවාරයේදී වාචික වාර්තාවක් ඉදිරිපත් කිරීමටත්, ශ්‍රී ලංකාවේ මානව හිමිකම්, සංහිඳියාවේ හා වගවීමේ ප්‍රගතිය පිළිබඳ අංගසම්පුර්ණ වාර්තාවක් 60 වැනි සැසිවාරයට ඉදිරිපත් කිරීමටත් මානව හිමිකම් පිළිබඳ එක්සත් ජාතීන්ගේ මහකොමසාරිස් කාර්යාලයෙන් ඉල්ලා සිටී,” යනුවෙන් එහි සඳහන් වේ.

ශ්‍රී ලංකාවේ ආරක්ෂක හමුදා සම්බන්ධයෙන් නැගී ඇති බරපතල මානව හිමිකම් උල්ලංඝන චෝදනා සම්බන්ධයෙන් සාක්ෂි රැස් කිරීමට 2021 දී පිහිටුවන ලද යාන්ත්‍රනයේ ඉදිරි දෙවසරක කටයුතු සඳහා අවශ්‍ය ඩොලර් මිලියන තුනකට අධික මුල්‍ය ප්‍රතිපාදන සඳහාද මහකොමසාරිස් කාර්යාලයේ අනුමැතිය හිමිවී තිබේ.

එක්සත් ජාතීන්ගේ මානව හිමිකම් කවුන්සිලයට ශ්‍රී ලංකාව සම්බන්ධයෙන් ඉදිරිපත් කරනු ලබන යෝජනාව මෙතෙක් පැවති ආණ්ඩු අනුවම යමින්, ‘තරයේ ප්‍රතික්ෂේප කිරීමට’ නව ජනපති අනුර කුමාර දිසානායකගේ කැබිනට් මණ්ඩලය තීන්දු කර තිබුනි.

අලුත් ආණ්ඩුව සහභාගි වන පළමු ජිනීවා සමුළුව ඔක්තෝබර්11 වැනි සිකුරාදායින් හමාර වන එක්සත් ජාතීන්ගේ මානව හිමිකම් මණ්ඩලයේ 57 වැනි සැසි වාරයයි.

මධ්‍යම කණ්ඩායම (Core Group) නමින් හැඳින්වෙන රටවල් හයක් එක්වී මෙවර සම්පාදනය කරන ලද කෙටුම්පතින් යෝජනා කර ඇත්තේ ශ්‍රී ලංකාවේ සංහිඳියාව, වගවීම සහ මානව හිමිකම් ප්‍රවර්ධනය වෙනුවෙන් 2021 දී සම්මත කරගන්නා ලද යෝජනාව ක්‍රියාත්මක කිරීමට තවත් කල් දෙන ලෙසයි.

එම යෝජනාවට විරුද්ධ වීමට විදේශ කටයුතු අමාත්‍යතුමා ඉදිරිපත් කළ කරුණු සලකා බැලු සඳුදා (ඔක්තෝබර් 7) රැස්වූ අමාත්‍ය මණ්ඩලය තීරණය කර තිබුනි.

“මේ ඉදිරිපත් කරලා තියෙන යෝජනාවේ බොහෝ කරුණු වලට එකඟ වෙන්න බැහැ. ඒ වගේම මානව හිමිකම් ආරක්ෂා කිරීම පිළිබඳව නව රජය අලුත් ක්‍රියාමාර්ග වලට යන්න බලාපොරොත්තු වෙනවා. ඒ සඳහා අපිට යම් කාලයක් අවශ්‍ය වෙනවා,” යි විදේශ අමාත්‍ය විජිත හේරත් අඟහරුවාදා (8) කොළඹදී මාධ්‍යවේදීන්ට දැනුම් දුන්නේය.

ජිනීවා නුවර පැවැති මානව හිමිකම් කවුන්සිලයේ 57 වැනි සැසිවාරයේදී ඔක්තෝබර් 09 වැනිදා, එක්සත් ජාතීන් සඳහා වූ ශ්‍රී ලංකා නිත්‍ය නියෝජිතවරිය විසින් සදහන් කළේ අතීත ගැටලුවලට පිළියම් සෙවීම ඇතුළුව සියලුම පුරවැසියන්ගේ ප්‍රජාතන්ත්‍රවාදය සහ මානව හිමිකම් ආරක්ෂා කිරීම රජය විසින් සිදු කරනු ඇති බවයි.

“සංහිඳියාව, වගවීම සහ යුක්තිය සම්බන්ධයෙන් කටයුතු කරන දේශීය යාන්ත්‍රණ සහ ක්‍රියාවලි ව්‍යවස්ථාමය රාමුව තුළ විශ්වසනීය සහ ස්වාධීන වනු ඇති අතර ජනතා විශ්වාසය සහිත සත්‍ය සහ සංහිඳියා ක්‍රියාදාමයක් ක්‍රියාත්මක කෙරෙනු ඇත. අතිගරු ජනාධිපතිතුමා පවසා ඇති ආකාරයට “අපේ අරමුණ වන්නේ දේශීය යාන්ත්‍රණ විශ්වසනීය සහ අර්ථසම්පන්නබවට පත්කිරීමයි..” ඇය වැඩි දුරටත් සදහන් කර තිබුනි.

පහළොස් අවුරුද්දක් තිස්සේ යුක්තිය නොලැබ සිටින යුද පීඩිත දෙමළ ජනතාව ආණ්ඩුවට තවත් කල් දීම සම්බන්ධයෙන් පල කර ඇත්තේ නොසතුටකි.

යුද අපරාධ සහ මානව හිමිකම් උල්ලංඝන සම්බන්ධ තොරතුරු රැස් කිරීමට මානව හිමිකම් පිළිබඳ එක්සත් ජාතීන්ගේ මහකොමසාරිස් කාර්යාලය විසින් පිහිටුවා ඇති බාහිර සාක්ෂි එකතු කිරීමේ යාන්ත්‍රණයේ බලතල දීර්ඝ කරන කිසිදු යෝජනාවකට එකඟ නොවන බවටත් කැබිනට් මණ්ඩලය තීන්දු කර තිබේ.