හෙද සේවාවට බදවා ගැනීමේ සුදුසුකම් අඩු කිරීමට තීරණය කිරීම හරහා සෞඛ්‍ය බලධාරීන් එම වෘත්තියට බරපතල ප්‍රශ්නයක් ඇති කර තිබෙන බවට දිවයිනේ ප්‍රමුඛතම හෙද නිලධාරී සංගමයක් චෝදනා කරයි.
“ඒක සෞඛ්‍ය ඇමතිවරිය පසුගිය සතියේ ජනමාධ්‍ය හරහා වාර්තා කරා. එයා කිව්වේ දැනට හෙද සේවාව සදහා බදවා ගන්නේ විද්‍යා විෂයන්ගෙන් නමුත් මේක කලා විෂයන්ගෙනුත් බඳවා ගන්න අවධානය යොමු වෙලා තියනවා. ඒ ගැන එහෙම කරන්න වෙනවා කියලා. ”
සෞඛ්‍ය අමාත්‍යවරියගේ ප්‍රකාශය බරපතල බව රජයේ හෙද නිලධාරීන්ගේ සංගමයේ සභාපති හා හිටපු පාර්ලිමේන්තු මන්ත්‍රී සමන් රත්නප්‍රිය සදහන් කළේ ඔක්තෝබර් 8 බ්‍රහස්පතින්දා කොළඹදී පැවැත්වු මාධ්‍ය හමුවකදීය.
හෙද සේවාව යනු විද්‍යාවට අදාල සේවාවක් බව පවසන වෘත්තිය සමිති නායකයා අවධාරණය කරන්නේ එයට අදාල විෂයන් අධ්‍යනය කළ හැක්කේ විද්‍යාවට අදාල විෂයන් හැදැරූ අයට පමණක් බවයි.
” අනිත් අයට මේක ලේසි නෑ.ඒ අය මේකට ගත්තොත් එහෙම බරපතල ප්‍රශ්නයක් ඇති වෙනවා. ඒක රෝගීන්ටත් කරන අනතුරක්.”
ජාත්‍යන්තර හා දේශීය පිලිගැනීමක් තිබෙන හෙද වෘත්තියේ බදවා ගැනීමේ සුදුසුකම් වෙනස් කිරීමට සෞඛ්‍ය බලධාරීන්ගේ අදහසක් පවතී නම් වහාම එම අදහස ඉවත්කරගන්නා ලෙස සමන් රත්නප්‍රිය එහිදී බල කර සිටියේය.
හෙද සේවාව සදහා බදවා ගැනීමේ අයදුම්පත් කැදවීමේදී ඉල්ලුම් කරන ප්‍රමාණය අඩුවීම නිසා උසස් පෙළ කලා විෂයන් හැදැරූවන් හෙද සේවාවට බදවා ගැනීමට තීරණය කළ බව රජය පැවසුවද හෙද සේවාවට ඉල්ලුම් කරන පිරිස අඩුවීමට වග කිව යුත්තේද සෞඛ්‍ය බලධාරීන් බවයි වෘත්තිය සමිති නායකයා පවසන්නේ.
පිරිමින්ට “අසාධාරණයක්”
ඒ සදහා බලපා තිබෙන කරුණු කිහිපයක් ම සමන් රත්නප්‍රිය මාධ්‍ය හමුවේදී පැහැදිලි කළේය.
” අනිත් පැත්තෙන් මේ ගොල්ලෝ පිරිමි බඳවා ගැනීමේ ප්‍රතිශතය සියයට පහක් බවට පරිවර්තනය කරලා තියනවා.ඒක නිසා විශාල ප්‍රමාණයක අපොස උසස් පෙළ විද්‍යා විෂයන් සමත් පිරිමි දරුවන්ට මේකෙන් අසාධාරණයක් වෙනවා.” වෘත්තිය සමිති නායකයා පෙන්වා දුන්නේය.
ශ්‍රී ලංකාවේ හෙද නිලධාරීන්ට විදෙස් ගතව සිය වෘත්තියේ යෙදී රටට විදේශ විනිමය උපයා දීමට තිබූ අවස්ථාව සෞඛ්‍ය බලධාරීන් විසින් කප්පාදු කර ඇති බවටත් රජයේ හෙද නිලධාරීන්ගේ සංගමය මීට ඉහත දී රජයට චෝදනා කර තිබුනි.
Facebook Comments
