ඒකාබද්ධ විපක්ෂය විසින් පැවැත්වු විරෝධතාවය නාඩගමක් පමණක් වීම හරහා සැබෑ ජනතා විරෝධය හෑල්ලුවට ලක් වු බවට ජනතා විමුක්ති පෙරමුණ චෝදනා කරයි.
එම විරෝධය අසාර්ථක බව පවසන ජනතා විමුක්ති පෙරමුණේ ප්‍රචාරක ලේකම් විජිත හේරත් සංවිධායකයින් පවා එය පිළිගෙන තිබු බවයි කොළඹ පැවති මාධ්‍ය හමුවකදී කියා සිටියේ.
“විරෝධයකට වඩා නාඩගමක්. කාලා බීලා පාරේ නටන එක ඇත්ත ජනතා විරෝධයක් නොවෙයි. අපි දැක්කේ විකාරරූපී රංගනයක් විතරයි. එවැනි දේවල්වලින් සිදුවන්නේ ඇත්ත ජනතා විරෝධය හෑල්ලුවට ලක්වීම පමණයි.”
ජනාතා විරෝධී ආණ්ඩුවකට එරෙහිව පාරට බැසීමේ අයිතියක් මෙන්ම ජනතාව පාරට බැස්සවීමේ අයිතියක් දේශපාලන පක්ෂ වලට ඇති බව පෙන්වා දෙන පාර්ලිමේන්තු මන්ත්‍රීවරයා එහෙත් මෙවැනි නාඩගම් හරහා ජනතා හඬ හෑල්ලු වන බවයි අවධාරණය කරන්නේ.
ආණ්ඩුවේ ජනතා ද්‍රෝහී ක්‍රියා ප‍්‍රතික්ෂේප කරනවා සේම ඒවා පරාජය කිරීමට ක්‍රියාමාර්ග ගන්නා නමුත් “මේ හොරු පන්නලා තවත් හොරු කණ්ඩායමකට ආණ්ඩු හදන්න අපි කිසි සේත්ම ඉඩ තබන්නේ නැහැ.” යි ජනතා විමුක්ති පෙරමුණේ ප්‍රචාරක ලේකම් විජිත හේරත් වැඩි දුරටත් කියා සිටියේය.
Facebook Comments
