ව්‍යවස්ථා සංශෝධන හරහා රටේ ප්‍රශ්න විසඳිය නොහැකි බැවින් නව ව්‍යවස්ථාවක් වහා ගෙන එන ලෙස යහපාලන රජය බිහි කිරීමට මුල් වු සිවිල් සංවිධාන බල කර සිටී.
හිටපු ජනපතිනි චන්ද්‍රිකා බණ්ඩාරනායක පාලන සමයේදී නව ව්‍යවස්ථාවක් ගෙන ඒමට එක්සත් ජාතික පක්ෂය විරුද්ධ වුවා සේ මෙවර යෝජිත නව ව්‍යවස්ථාවට ශ්‍රී ලංකා නිදහස් පක්ෂය විරුද්ධ වනු ඇති බවට සැක පල කරන සාධාරණ සාමාජයක් උදෙසා ජනතා ව්‍යාපාරයේ කැඳවුම්කාර මහාචාර්ය සරත් විජේසුරිය එය සිදු නොවිය යුත්තක් බව අවධාරණය කරයි.
“චන්ද්‍රිකා බණ්ඩාරනායක මැතිණියට අලුත් ව්‍යවස්ථාවක් සම්මත කර ගන්න බැරිව ගියේ එදා එක්සත් ජාතික පක්ෂය විරුද්ධ වෙච්ච නිසා. අද දෛවෝපගතව එක්සත් ජාතික පක්ෂය කැමැත්ත පල කරල තියෙනවා අලුත් ව්‍යවස්ථාවක් වෙනුවෙන් සිවිල් සමාජය නියෝජනය කරන අප තුල කිසියම් විචිකිච්ඡාවක් ඇති වෙලා තියෙනවා මොකක් හෝ අවාසනාවකට ශ්‍රී ලංකා නිදහස් පක්ෂය අවසාන මොහොතේදී එදා එක්සත් ජාතික පක්ෂය කරපු දේ කරයි ද කියලා.”
“මේක සිදු නොවිය යුතු දෙයක්. ඒ තත්ත්වයට පත් නොවීමට වග බලා ගැනීම ජනාධිපතිවරයාගේ පරම යුතුකම වෙනවා.” යැයි මහාචාර්යවරයා නව ව්‍යවස්ථාවක් උදෙසා ජනතා ව්‍යාපරයේ මාධ්‍ය හමුවක දී කියා සිටියේය.
ජනවාරි 08 පැවති ජනාධිපතිවරණය මෙරට අවසන් ජනාධිපති ඡන්දය බවට මාඳුළුාවාවෝ සෝභිත හිමියන් සිදු කළ ප්‍රකාශය සිහිපත් කළ සරත් විජේසුරිය මහාචාර්යවරයා 2020 දී ජනාධිපතිවරණයක් බලපොරොත්තු නොවන බව පැවසීය.
නව ව්‍යවස්ථාවක් ජනමත විචාරණයට ඉදිරිපත් කිරීමට පෙර යහපාලන රජය බලයට පත්වීමේ දී පොරොන්දු වු පරිදි දුෂිතයන් හා අපරාධකරුවන් නීතිය හමුවට ඉදිරිපත් කර ජනතාව දිනා ගැනීම රජයේ පරම යුතුකම බව මහාචාර්යවරයා පෙන්වා දුනි.
දේශපාලන ප්‍රතිසංස්කරණ වෙනුවෙන් කැපවීම යහපාලන රජයේ නායකයන් දෙදෙනාගේ වගකීම බව මහාචාර්ය සරත් විජේසුරිය වැඩි දුරටත් අවධාරණය කළේය.
Facebook Comments
