බලය බෙදීමකින් තොරව ප්‍රජාතන්ත්‍රවාදය ශක්තිමත් කළ හැකි බව ශ්‍රී ලංකා පොදු ජන පෙරමුණේ මහලේකම්වරයා පවසයි.
මේ අවස්ථාවේ ජනාධිපතිවරයාගෙන් බලය බෙදීමක් රටේ ජනතාව බලාපොරොත්තු නොවන බව නීතිඥ සාගර කාරියවසම් සදහන් කළේ ශ්‍රී ලංකා පොදු ජන පෙරමුණ පක්ෂ කාර්යාලයේදී අගෝස්තු 14 වැනි සදුදා මාධ්‍ය හමුවක් පවත්වමිනි.
ඔහු තවදුරටත් සදහන් කළේ රටේ ආර්ථිකය ස්ථාවර කර රටේ ප්‍රජාතන්ත්‍රවාදය ශක්තිමත් කරනු ඇතැයි රටවැසියන් ජනාධිපතිවරයාගෙන් බලාපොරොත්තු වන බවයි.
“මේ රටේ ජනතාව බලාපොරොත්තු වෙන්නේ ඔබතුමාගෙන් මේ අවස්ථාවේදී බලය බේදීම කරයි කියන දේ නෙමෙයි. මේ රටේ ජනතාව ඔබතුමාගෙන් බලාපොරොත්තු වෙන්නේ එක දෙයයි. ඒ මේ රටේ ආර්ථිකය ස්ථාවර කරලා මේ රටේ ප්‍රජාතන්ත්‍රවාදය ශක්තිමත් කරයි කියන කාරණය විතරයි. ”
රටේ ආර්ථිකය ශක්තිමත් කළ පමනින් රටේ ප්‍රජාතන්ත්‍රවාදය ශක්තිමත් වන්නේ කෙසේදැයි මන්ත්‍රීවරයා එහිදී පැහැදිලි කර නැත.
අගෝස්තු 9 වැනිදා පාර්ලිමේන්තුව අමතමින් ජනාධිපති රනිල් වික්‍රමසිංහ අභියෝග කර තිබුනේ හිටපු ජනාධිපති මහින්ද රාජපක්ෂ සමග රැස්වී බලය බෙදීම ගැන තීන්දුවක් ගන්නා ලෙසයි.
“මේ ප්‍රශ්නේ ගැන ශ්‍රී ලංකා පොදුජන පෙරමුණේ ඉන්න සියලු දෙනාම – මේ පැත්තේ ඉන්න අය විතරක් නෙවෙයි, ඒ ලයිස්තුවේ ඒ පැත්තේ ඉන්න අයත් මහින්ද රාජපක්ෂ මැතිතුමාගේ ප්‍රධානත්වයෙන් මුණගැහිලා තීරණයක් අරගන්න”
රට ආර්ථික වශයෙන් කඩා වැටුන තත්වයක පවතින මොහොතක බලය බෙදීම වැනි මාතෘකා සාකච්ඡාවට නොගන්නා ලෙස ශ්‍රී ලංකා පොදු ජන පෙරමුණේ මහ ලේකම් නීතිඥ සාගර කාරියවසම් එහිදී වැඩි දුරටත් ජනාධිපතිවරයාගෙන් ඉල්ලා සිටියේය.
“අපි ඒවා සාකච්ඡා කරමු කලින් ආර්ථි්කව ශක්තිමත් වෙලා ස්ථාවර රටක් හැටියට රට ශක්තිමත් උනාට පස්සේ අපිට පුළුවන් වෙයි රටක් හැටියට අනිකුත් කාරනා ගැන සාකච්ඡා කරන්න.”
Facebook Comments
