රට පුරා සිටින පාතාල, මත්ද්‍රව්‍ය ජාවාරම් සිදුකරන පුද්ගලයින් පිළිබඳව වාර්තාවක් ලබා දෙන ලෙස ඉල්ලා දෙමාසයක වැඩි කලක් ගතවී ඇතත් මෙතෙක් එම වාර්තාව නොලැබීම ගැන පොලිස් ප්‍රධානීන් ආරක්ෂක ලේකම්වරයාගේ දෝෂ දර්ශණයට ලක්ව තිබේ.
ඒ ඒ පොලිස් බල ප්‍රදේශ වලට අනුව ඒ ඒ පොලිස් බල ප්‍රදේශ වලට අනුව හරහා වාර්තාවක් සකස් කර පොලිස්පති වෙත ලබාදෙන ලෙස දන්වා සිටියත් මාස දෙකහමාරක් ගතවුවත් තවමත් එම වාර්තා නැති බව ආරක්ෂක ලේකම් (විශ්‍රාමික) මේජර් ජෙනරාල් කමල් ගුණරත්න කියා සිටියේ වැඩබලන පොලිස්පති චන්දන වික්‍රමරත්නද සහභාගී වී සිටි පොලිස් ප්‍රධානින්ගේ සාකච්ඡාවකදීය.
“ඒ ලිපිය ක්‍රියාත්මක වීමට මාස දෙකහමාරක කාලයක් ගන්නේ නම් අපි කොහොමද වරදකරුවන් නීතිය ඉදිරියට ගෙනයන්නේ,” යැයි ආරක්ෂක ලේකම් ප්‍රශ්න කර සිටියේ ශ්‍රී ලංකා පොලිසියේ සියළුම පළාත් නියෝජනය කරමින් පැමිණි ජ්‍යෙෂ්ඨ නියෝජ්‍ය පොලිස්පතිවරුන් හා නියෝජ්‍ය පොලිස්පතිවරුන් කැඳවා පැවති විශේෂ සාකච්ඡාවකදීය.
ආරක්ෂක අමාත්‍යාංශයෙන් හෝ පොලිස්පතිතුමාගෙන් යම් උපදෙසක් ලැබූ විට එය යම් සංස්ථාවක් හෝ රජයේ අනිකුත් ආයතනයකින් ලැබුණු උපදෙසක් ලෙස නොසලකන ලෙසත්, එම නිලධාරීන් ජාතික ආරක්‍ෂාවට වගකිව යුතු බවත්, පොලිස් නිලධාරීන් මහජනතාව නිදහසේ ජීවත්වීමට හැකි පරිසරයක් සැදීමට දායක වන ප්‍රධානතම නිලධාරීන් බවත් මතක තබාගන්නා ලෙසද ලේකම්වරයා අවවාද කලේය.
කොරෝනා වසංගතය ව්‍යාප්තිය වැළැක්වීමට රට පුරා ඇඳිරි නීතිය ඉතාම තදින් ක්‍රියාත්මක වන අවස්ථාවේදී මත්කුඩු ඡාවාරම පවත්වාගෙන යන්නේද ඇතැම් පොලිස් නිලධාරින්ගේ දැනුවත්භාවය සහිතව බවටද ආරක්ෂක ලේකම්වරයා මෙහිදි චෝදනා කර තිබේ.
මත්කුඩු ජාවාරම්, කප්පම් ගැනීම්, පාතාල ක්‍රියාකාරකම්, ගස් කැපීම්, ගණිකා මඩම්, වැලි ගොඩ දැමීම් සහ අනෙකුත් නීති විරෝධී ක්‍රියා මහා පරිමාණයෙන් සිදුවනවා නම් එම පළාත් භාර උසස් පොලිස් නිලධාරීන් නිල ඇඳුමක් ඇඳ සිටීම පිලිබඳව ලැජ්ජාවිය යුතු බවද ආරක්ෂක ලේකම් (විශ්‍රාමික) මේජර් ජෙනරාල් කමල් ගුණරත්න වැඩි දුරටත් ප්‍රකාශ කර ඇත.
Facebook Comments
