රටේ ජනතාවගේ යහපත වෙනුවෙන් ජාතික ආණ්ඩුවක් බිහිකිරීම කාලීන අවශ්‍යතාවක් බව අග්‍රාමාත්‍ය රනිල් වික්‍රමසිංහ අවධාරණය කර තිබේ.
ජනතාවට බලපාන පොදු ප්‍රශ්ණවලදී සියලු දෙනා එක්ව කටයුතු කිරීම වැදගත් බැවින් එම දේශපාලන සංස්කෘතිය රට තුල ස්ථාපිත කිරීමට නම් ජාතික ආණ්ඩුවක් බිහිකල යුතු බවයි අගමැතිවරයා පෙන්වා දෙන්නේ.
පළාත් පාලන ආයතන 93ක් සදහා යන්ත්‍රාපකරණ ඛෙදාදීම වෙනුවෙන් ගාල්ලේ 09 සෙනසුරාදා පැවති උත්සවයකට එක්වෙමින් අගමැති රනිල් වික්‍රසිංහ මෙම අදහස් පල කළේය.
2015 වසරේදී ජාතික රජයක් බිහිකලේ රට ගොඩනැගීමට බවත් එවන් වැඩපිළිවෙලක් ඉදිරියට ගෙනයාමේදී ප්‍රශ්ණ මතුවීම ස්වාභාවික බැවින් පුද්ගලික න්‍යාය පත්‍රයන් පසෙකලා රට වෙනුවෙන් එකමුතුව ඉදිරියට යායුතු බව ද අග්‍රාමාත්‍ය රනිල් වික්‍රමසිංහ පෙන්වා දුනි.
දේශපාලනඥයන් ඇතුලු සියලු දෙනා එක්වී ඉදිරියට යන්නේනම් වසර 5ක් තුල රට ගොඩනැගීමට හැකි බවටයි අගමැතිවරයා විශ්වාසය පළ කරන්නේ.
වර්තමානයේ සියලු උත්සහයන් දරන්නේ විවිධ දේශපාලන පක්ෂ නියෝජනය කරන කණ්ඩායම් එකමුතු කර ගනිමින් පොදු අරමුණක් වෙනුවෙන් එක්වීමට බවත් ඒ සදහා විපක්ෂයේ පිරිසක්ද සුබවාදී අදහස් පල කර ඇති බවත් රනිල් වික්‍රමසිංහ කියා සිටියේය.
ඒ අනුව සියලු දෙනා එක්ව රට ගොඩනැගීම වෙනුවෙන් පළමු රැස්වීම මැයි මස 1වනදා ආරම්භ කිරීමට බලාපොරොත්තු වන බවයි අග්‍රාමාත්‍ය රනිල් වික්‍රමසිංහ වැඩිදුරටත් සදහන් කරන්නේ.
Facebook Comments
