ජීවත් වීම උදෙසා මසුන් මැරීමේ රැකියාවේ නිතර ව සිටින තමන්ට ධීවර දෙපාර්තමේන්තුව සිදු කරන හිරිහැර නවතාලීමට මැදිහත් වන ලෙස ඉල්ලමින් මන්නාරමේ ධීවරයන් විරෝධයක් දියත් කර තිබේ.
මන්නාරම පල්ලිමුනේ ග්‍රාමයේ ධීවරයන් ඔක්තෝබර් 12 වැනි බ්‍රහස්පතින්දා දිස්ත්‍රික් ලේකම් කාර්යාලය ඉදිරිපිට දී විරෝධතා දියත් කරමින් අවධාරණය කළේ සුළු පරිමාණ ධීවරයන් සදහා හදුන්වා දී තිබෙන අවසර පත් ක්‍රමය නිසා තමන් මහත් දුෂ්කරතාවයන්ට පත්ව ඇති බවයි.
‘ජීවනෝපාය මාර්ගයක් නොමැතිව ධීවර කර්මාන්තයේ යෙදෙන අපට මුහුදට යෑම තහනම් කරන්නේ ඇයි?, උතුරු මුහුදේ නිදහසේ රස්සාව කළ අපිට දැන් මුහුද තහනම් ඇයි?,’ආදී සටන් පාඨ පෙරටු කරගනිමින් විරෝධතා දියත් කළ ඔවුන් දිස්ත්‍රික් ලේකම් කාර්යාලයට ඇතුළු වන ගෙට්ටුව අසල බිම වාඩි වී තමන් මුහුණ දී සිටින ගැටළු නිරාකරණය කර දෙන ලෙස දිස්ත්‍රික් ලේකම් කාර්යාලයෙන් ඉල්ලා තිබේ.
විරෝධතාවයට එක්ව සිටි ධීවරයකු අවධාරණය කළේ වර්ගී කරණය කරමින් ධීවර අමාත්‍යාංශය බල පත්‍ර හදුන්වා දීම නිසා ධීවරයන් දැඩි දුෂ්කරතාවයකට පත්ව ඇති බවයි, ඔවුන් ඉල්ලා සිටින්නේ මුහුදු සම්පත නෙලා ගැනීම සදහා පොදු බලපත්‍ර ක්‍රමයක් හදුන්වා දෙන ලෙසයි.
” මේ රස්සාව කරගෙන යන්න දෙන්නේ නැතුව පාස් ක්‍රමයක් ගෙනල්ලා, මුහුදේ කුඩැල්ලෝ එනවා, ඉස්සෝ එනවා, මාළු එනවා. දැල්ලෝ එනවා. මේ ඔක්කෝටම පාස් දෙන්න කියලා තමයි අපි කියන්නේ. මාළුන්ට එක පාස් එකක්, ඉස්සන්ට එක පාස් එකක්, කකුළුවන්ට එක පාස් එකක් එහෙම තියෙන්න බෑ. අපි රස්සාවට යන්න ලැස්ති වෙනකොට නාවික හමුදාව අපිව නවත්තන්නේ ධීවර දෙපාර්තමේන්තුවේ උපදෙස් මත. ඉන්දියානු ට්‍රෝලර් යාත්‍රාවට බලපත්‍ර තිබේද? මෙහෙ ඇවිත් රස්සාව කරනවා. නමුත් අපිට බලපත්‍ර අවශ්‍යයි. මොකක්ද මේ අසාධාරණය.”
තවත් ධීවරයකු අවධාරණය කළේ බලපත්‍රයක්දා නොමැතිව හෝ බල පත්‍රයට පිටින් මසුන් මැරීමේ නිරත වන්නන් අත්අඩංගුවට ගැනීම සදහා ධීවර අමාත්‍යාංශය නාවික හමුදාවට බලය පවරා ඇති බවයි.
“අපිට නිදහසේ රස්සාව කරන්න බැරි වෙලා තියෙන්නේ. අපි මුහුදට ගියොත් නාවික හමුදාව අපිව අත්අඩංගුවට ගන්නවා. ධීවර දෙපාර්තමේන්තුව තමයි අපිව අත්අඩංගුවට ගන්න කිව්වේ කියලා නාවික හමුදාව කියනවා. අපි සීමාව ඉක්මවා යනවා කියලා කියනවා. කිලිනොච්චි, යාපනය පැත්තේ අපිට රස්සාව කරන්න බෑ. ඒ උනත් අපි පරම්පරා ගණනක් මේ වගේ තමයි රස්සාව කරන්නේ.”
Facebook Comments
