යෝජිත නව ව්‍යවස්ථාව නිර්මාණය කර ගැනීමට සිවිල් සංවිධාන කැප වී කටයුතු කරනු ලැබුවද ඒ සඳහා අවශ්‍ය දේශපාලන නායකත්වය නායකත්වය නොලැබුණ බවට සාධාරණ සමාජයක් සඳහා වූ ජාතික ව්‍යාපාරය චෝදනා කර තිබේ.
දේශපාලන නායකත්වයට අවංක වුවමනාවක් කැපවීමක් නැත්නම් අළුත් ආණ්ඩුක‍්‍රම ව්‍යවසථාවක් නිර්මාණය කර එය සම්මත කරගත නොහැකි බවත් වත්මන් නායකයන් දෙදෙනාටම ඒ සඳහා අවංක වුවමනාවක් නොමති බවයි එහි කැඳවුම්කාර මහාචාර්ය සරත් විජේසූරිය පෙන්වා දෙන්නේ.
“මම මේ රටේ ජනාධිපති වෙලා ඉන්නෙත් රනිල් වික‍්‍රමසිංහ මහතා අගමැති බවට පත්වෙලා ඉන්නෙත් සෝභිත හිමියන් ගොඩනගපු ඒ ව්‍යාපාරය නිසා බවත් උන්වහන්සේට කරන ගෞරවයක් ලෙස විධායක ජනාධිපති ක‍්‍රමය අහෝසි කිරීමට කටයුතු කරන බවත් මෛත්රීපාල සිරිසේන මහතා සෝභිත හිමියන්ගේ ආදාහන උත්සවයේදී ලෝකයටම ඇහෙන්න ප‍්‍රතිඥාවක් දුන්නා.”
“ඉන්පසු සෝභිත හිමියන්ගේ ගුණසමරු දෙකේදීම මෛත්රීපාල සිරිසේන මහතා ඒ ගැන කතාකළේ නැහැ. තුන්වන ගුණ සැමරුවේදී ඔහු කුමන්ත‍්‍රණය කරලා මහින්ද රාජපක්ෂ මහතා අග‍්‍රාමාත්‍යධූරයට පත් කළා.” යැයි 08 සිකුරාදා “අළුත් ආණ්ඩුක‍්‍රම ව්‍යවස්ථාවට එරෙහිව අසත්‍ය ප‍්‍රචාරවලට පිළිතුරු” තේමාව යටතේ පැවතී සම්මන්ත්‍රණයේදී මහාචාර්යවරයා පැවසීය.
විධායක ජනාධිපති ක‍්‍රමය අහෝසි කිරීමටවත් ආණ්ඩුක‍්‍රම ව්‍යවස්ථාවක් සම්මත කර ගැනීමටවත් මෛත්රීපාල සිරිසේන ඔහුගේ ධූර කාලය තුළ ඉඩ ලබා නොදෙන බව ඉතාම පැහැදිලි බවයි හෙතෙම පෙන්වා දෙන්නේ.
ආණ්ඩුක‍්‍රම ව්‍යවසථාවක් නිර්මාණය කිරීමට මහජන අදහස් ලබා ගනු ලැ‍බුවේ ඉතිහාසයේ ප්‍රථම වතාවට බව කී මහාචාර්ය සරත් විජේසූරිය දේශපාලන නායකත්වයට අවංක වුවමනාවක් කැපවීමක් නැත්නම් අලූත් ආණ්ඩුක‍්‍රම ව්‍යවසථාවක් නිර්මාණය කර සම්මත කරගැනීමට නොහැකි බව අවධාරණය කළේය.
මෛත්රීපාල සිරිසේන ජනාධිපතිවරයාගේ ධුර කාලය තුල මොන තරම් උත්සාහ කළත් පාර්ලිමේන්තුවේ නව ව්‍යවස්ථාවක් සම්මත කර ගත නොහැකි බවත් එය ඉටු කර ගැනීමට අවශ්‍ය වතාවරණය මේ වන විට පාර්ලිමේන්තුවේ නැති බව ද කියා සිටියේය.
ජනාධිපතිවරයා විසින් සෝභිත හිමියන් මුලා කරමින් රටේ සුලූ ජාතිකයන් පවා ඉතාම නින්දිත ආකාරයට රැවටු බවට චෝදනා කරන සාධාරණ සමාජයක් සඳහා වූ ජාතික ව්‍යාපාරයේ කැඳවුම්කාර මහාචාර්ය සරත් විජේසූරිය ” දැන් අන්තවාදී කොටස් සමඟ එකතු වෙලා ඔවුන්ගේ පිහිටෙන් නැවත වරක් විධායක ජනාධිපති වීමේ සිහිනයක් දකිමින් සිටිනවා” යි චෝදනා කළේය.
Facebook Comments
