මාධ්‍ය නිදහස, කතාකිරීමේ නිදහස, ලිවීමේ නිදහස, පමණක් නොව ජනාධිපතිවරයාට අසැබි වචනයෙන් බැනීමට හා රූප විකෘති කරන පුද්ගලයන්ට පවා නිදහස සහතික කර ඇති බව ජනාධිපතිවරයා පවසයි.
සමාජ ජාලා වලින් තමන්ට පහර ගසනවා සේ පෙර පැවති රාජපක්ෂ පාලන සමයේ පහර දුන්නා නම් “ඒ මිනිස්සු හොයාගන්නත් නැහැ, ඉන්න තැන් හොයාගන්නත් නැහැ,” යි ජනාධිපති මෛත්‍රීපාල සිරිසේන ප්‍රකාශ කළේය.
“මට දැන් අද සමාජ වෙබ් අඩවිවලින් කරන දේවල් එදා කළා නම් ඒ මිනිස්සු හොයාගන්නත් නැහැ, ඉන්න තැන් හොයාගන්නත් නැහැ. ඒවා හදන අය ඒක තේරුම්ගන්න ඕනෑ,” යි ජනපති 9 බ්‍රහස්පතින්දා කොළඹ විහාරමහා දේවි උද්‍යානයේ පැවති වැඩසටහනක දී කියා සිටියේය.
වෘත්තිය සමිති විසින් දියත් කරන වැඩ වර්ජන පිළිබඳව අදහස් දැක්වු ජනාධිපතිවරයා වර්ජන හරහා පීඩාවට පත් වන්නේ අහිංසක දුප්පත් ජනතාව මිස ආණ්ඩුව නොවන බව සඳහන් කළේය.
“නිතර වැඩවර්ජනය කරන දුම්රිය සේවක මණ්ඩලය වේවා, දොස්තර මහත්වරු වේවා මේ කවුරු හරි සිතනවා නම් මේ වැඩවර්ජනවලින් ආණ්ඩුවට රිදෙනවා කියලා එය මිථ්‍යාවක්. වැඩවර්ජනවලින් අපිට රිදෙන්නේ නැහැ. මේ වැඩවර්ජනවලින් රිදෙන්නේ අහිංසක දුප්පත් පොදු මහජනතාවටයි.”
වත්මන් රජය 2015 සිට වැඩ වර්ජන හෝ උද්ඝෝණ මැඩලීමට ගිනි අවි භාවිතා නොකළ බව පෙන්වා දුන් ජනාධිපති මෛත්‍රීපාල සිරිසේන ඒ පිළිබඳව සිය සතුට පල කළේය.
වෘත්තිය සමිති අයිතිවාසිකම් සම්බන්ධව සාකච්ඡා කීරිමට හා කන් දීමට හැකි පරිදි ආණ්ඩුව ප්‍රජාතන්ත්‍රවාදය ශක්තිමත් කර ඇති බවත් සමහර පුද්ගලයන් එම නිදහස පිළිබඳව නොදන්නා බවයි ජනාධිපතිවරයා වැඩි දුරටත් කියා සිටියේ.
Facebook Comments
