රාජපක්ෂ පාලන සමයේදී ශ්‍රී ලන්කන් ගුවන් සේවය භාර විෂයභාර ඇමැතිවරයා ලෙස කිසිම තීන්දුවකට තීරණයකට එළඹීමට නොහැකිව ගුවන් සේවයේ කටයුතු සිදුවන ආකාරය පවා නොදැන සිටි බවට හිටපු ගුවන්සේවා ඇමැති ජනාධිපති කොමිසම ඉදිරියේ සාක්ෂි දෙමින් හෙළි කර තිබේ.
එහි ප්‍රතිඵලයක් ලෙස පාර්ලමේන්තුවේදී විපක්ෂ මන්ත්‍රීවරුන්ගේ ප්‍රශ්න හමුවේ මුනිවත රකිමින් කර කියාගත නොහැකි තත්ත්වයකට පත්ව අසරණ වීමට සිදුවුණ ආකාරය ඇතුළු අත්විඳීමට සිදුවුණ බොහෝ දෑ පිළිබඳව හිටපු ගුවන්සේවා ඇමැති වර්තමාන පාර්ලිමේන්තු මන්ත්‍රී පියංකර ජයරත්න 23 අහරුවාදා ශ්‍රී ලංකන් සහ මිහින් ලංකා ආයතනවල දූෂණ සෙවීම සඳහා පත් කළ විශේෂ ජනාධිපති පරීක්‍ෂණ කොමිසම හමුවේ පවසා ඇත.
“පාර්ලිමේන්තුවේදී විපක්ෂ මන්ත්‍රීවරු ශ්‍රීලන්කන් ගුවන්සේවය ගැන විෂයභාර ඇමැතිවරයා ලෙස මගෙන් ප්‍රශ්න ඇසුවා. එහිදී පිළිතුරු දීමට නොහැකිව අසරණ වුණා. එම නිසා සිවුපුද්ගල කමිටුවක් අමාත්‍යාංශ ලේකම්ගේ ප්‍රධානත්වයෙන් පත්කර ගුවන්සේවය පිළිබඳව සොයා බැලීමට නියම කළා. එම කමිටුවට ඉදිරියට යාමට නොහැකිවුණා. පස්අවුරුදු සැලසුමක් වසා කැපිටල් ආයතනයට ලබාදීම හා විදෙස් සහාය ලබාගැනීම, ගුවන්යානා මිලදී ගැනීමට සීබරී ආයතනයට පැවරීම මේ කිසිවක් මා දන්නේ නෑ. ම‍ාගේ මැදිහත්වීමක් සිදුවූයේ නෑ.”
මන්ත්‍රීවරයා කොමිසම හමුවේ පවසා ඇත්තේ ශ්‍රී ලන්කන් ගුවන් සේවයේ එවකට හිටපු සභාපති නිශාන්ත වික්‍රමසිංහ ඇතුළු අධ්‍යක්ෂ මණ්ඩලය ඇමැතිවරයා ලෙස තමාව නොතකා සෘජුව ක්‍රියා කෙළේ මුදල් අමාත්‍යාංශය සහ මුදල් ඇමැති හා හිටපු ජනාධිපති මහින්ද රාජපක්ෂ බලය උපයෝගී කර ගනිමින් බවයි.
ශ්‍රීලන්කන් ගුවන් සේවයට අදාළව රාජකාරි කටයුතු සිදුකරගෙන යාමට බාධා සහ ප්‍රශ්න පැනනගින බව හා පැවතුන තත්ත්වය පිළිබඳව හිටපු ජනාධිපති ජ්‍යෙෂ්ඨ අතිරේක ලේකම් ගාමිණී සෙනරත් මහතාට කිහිපවරක් දැනුම්දී පෞද්ගලිකවම දෙවරක් පැවසුවත් පැවැති තත්ත්වයේ කිසිම වෙනසක් සිදුනොවුන බව පැවසූ සාක්ෂිකරු අදාළ දැනුම්දීම්වලින් ප්‍රතිඵල නොලැබුණ බව ද ප්‍රකාශ කළේය.
“ශ්‍රීලන්කන් ගුවන් සේවයට අදාළව කිසිවක් හිටපු සභාපති නිශාන්ත වික්‍රමසිංහ මා සමඟ සාකච්ඡා කෙළේ නෑ. ඇතැම් අවස්ථාවලදී ප්‍රගති සමාලෝචන රැස්වීම්වලට ප්‍රධාන විධායක නිලධාරි කපිල චන්ද්‍රසේන මහතා සහභාගි වුණා.”
“රුපියල් බිලියන දහහතරයි දශම දෙකක් බැඳුම්කර ලෙස ශ්‍රීලන්කන් ගුවන් සේවයට ලැබුණද නොලැබුණද නොදනිමි. ඒ පිළිබඳව කිසිවකු මා දැනුවත් කෙළේ නෑ. ඒ පිළිබඳව සොයාබැලීමක්වත් කෙළේ නෑ. ඊට හේතුව ශ්‍රීලන්කන් ගුවන් සේවයේ අධ්‍යක්ෂක මණ්ඩලය රේඛීය අමාත්‍යාංශය නොතකා ක්‍රියාකිරීමයි.” මන්ත්‍රීවරයා කොමිසමට කියා ඇත.
පැවති තත්ත්වය හමුවේ ශ්‍රීලන්කන් ගුවන් සේවය මුදල් අමාත්‍යාංශයට පවරා ගන්නා ලෙසට කරන ලද ඉල්ලීමටද ප්‍රතිචාර නොලැබුණ බවට හිටපු අමාත්‍ය පාර්ලිමේන්තු මන්ත්‍රී පියංකර ජයරත්න වැඩි දුරටත් ප්‍රකාශ කර තිබේ.
Facebook Comments
