පොලීසිය බාරයේ සිටි සිරකරුවන් මරා දැමීම ගැන වාර්තා වන අතරේ මානව හිමිකම් සංවිධාන වලට පොලිස් විමර්ශන සඳහා මැදිහත් වීමට රාජපක්‍ෂ ආණ්ඩුවට පක්‍ෂපාති ජාතික සංවිධාන විරෝධය දක්වා තිබේ.
රට තුල මානව හිමිකම් ශක්තිමත් කිරීමේ අරමුණින් සමගි බලවේගයේ පාර්ලිමේන්තු මන්ත්‍රී තිස්ස අත්තනායක විසින් ඉකුත් 03 වැනිදා `මානව හිමිකම් සංවිධාන කෙටුම් පත` ලෙස ඉදිරිපත් කෙරුණු පෞද්ගලික මන්ත්‍රී යෝජනාවට එරෙහිව ඊයේ [12] ශ්‍රේෂ්ඨාධිකරණයට පෙත්සමක් ගොනු කෙරිණි.
අත්තනායක මන්ත්‍රීවරයාගේ යෝජනාව තුලින් මානව හිමිකම් සංවිධාන වලට පොලිස් ස්ථානවලට ඇතුල්වී විමර්ශන වලට මැදිහත්වීමේ ඉඩ සැලසෙන බව ජාතික සංවිධාන එකමුතුවේ මාධ්‍ය ලේකම් වසන්ත බණ්ඩාර, නීතිඥවරුන් වන රාජා ධර්මසිරි ගුණරත්න සහ නුවන් චාමර ඉඳුනිල් නම් පෙත්සම්කරුවෝ පවසති.
පෙත්සම මගින් ඔවුන් කියා සිටින්නේ මෙම යෝජනාවෙන් මෙරට නීතිය කප්පාදු වන අතරම ආණ්ඩුක්‍රම ව්‍යවස්ථාව ද උල්ලංඝනය වන බවයි.
“මානව හිමිකම් සංවිධාන වලට පොලිසියට හෝ හමුදාවට ආයතන වශයෙන් මෙන්ම පුද්ගලයන් ලෙසද මැදිහත් වීමේ බලයක් මෙම පනත මගින් හිමි වෙනවා.විශේෂයෙන් ත්‍රස්තවාදය වැළක්වීමේ පනත යටතේ අත්අඩංගුවේ සිටින සැකකරුවන් ගැන මැදිහත් වෙන්න බලයක් ලැබෙනවා“ යැයි පවසන ජාතික සංවිධාන එකමුතුවේ මාධ්‍ය ලේකම් වසන්ත බණ්ඩාර කියා සිටින්නේ වසර අටක වෑයමකින් පසු මෙවර පනත ඉදිරිපත් කර ඇත්තේ
“තිස්ස අත්තනායක මන්ත්‍රීත් අධිකරණ ඇමති අලි සබ්රිත් එකඟතාවයකින් මේක ගේන්නේ. නැත්නම් මෙතරම් ධෛර්ය සම්පන්නව ගෙන්න විදිහක් නැහැ“ යනුවෙන් ඔහු මාධ්‍ය වෙත ප්‍රකාශ කර තිබිණි.
මෙම මානව හිමිකම් පනත 2013 දී වන්නි දිස්ත්‍රික් මන්ත්‍රී යුනිස් පාරුක් විසින් මුලින්ම පාර්ලිමේන්තුවට ඉදිරිපත් කළ විට එවකට ජනාධිපති මහින්ද රාජපක්‍ෂයාත්, 2015 දී අලි සහිර් මව්ලානා මන්ත්‍රීවරයා විසින් යළි පනත ඉදිරිපත් කිරීමේදී එවකට අධිකරණ ඇමති විජේදාස රාජපක්‍ෂයාත් මැදිහත්ව එය වලක්වා ගත් බවද වසන්ත බණ්ඩාර වැඩි දුරටත් සඳහන් කරයි.
අදාළ මන්ත්‍රී යෝජනාව සම්මත කිරීමට අවශ්‍යනම් පාර්ලිමේන්තුවේ තුනෙන් දෙකක බහුතරයකින් හා ජනමත විමසුමකින් අනුමත විය යුතු යැයි ප්‍රකාශ කරන ලෙස පෙත්සම්කරුවන් අධිකරණයෙන් ඉල්ලා සිටී.
ත්‍රස්ත පනත යටතේ අත්අඩංගුවට ගෙන රඳවා සිටින සිරකරුවන් කිසිදු චෝදනාවක් හෝ නඩු විභාගයක් දීර්ඝ කාලයක් සිරගෙවල් තුල රඳවා ගෙන සිටින බවට මානව හිමිකම් සංවිධාන පෙන්වා දී තිබේ.
ගතවූ වසර දෙකක කාලය තුල පොලිසිය බාරයේ සිටියදී මරා දැමුණු සිරකරුවන් රැසකි.
Facebook Comments
