ඉල් මහ පෝදා හින්දු උත්සවයට උතුරේ පොලිස් බාධා

0

දෙමළ මහවිරු සමරු සාමුහික ලෙස පැවැත්වීම වලක්වා ලමින් උසාවි නියෝග ලබා ගැනීමට පියවර ගත් උතුරේ පොලිසිය හින්දු භක්තිකයන් වාර්ෂිකව පවත්වන ආගමික උත්සවයකට බාධා පමුණුවමින් විශ්වවිද්‍යාල ශිෂ්‍යයකු ද අත්අඩංගුවට ගෙන තිබේ.

සෑම ඉල් පුර පසලොස්වක පෝය දිනයකම හින්දු භක්තිකයන් විසින් පහන් දල්වා සමරනු ලබන “කාර්තික මංගල්‍ය” වෙනුවෙන් යාපනයේ විශ්වවිද්‍යාල දොරටුව අසල ඉටි පහන් දල්වමින් සිටි සිසුවකු නොවැම්බර් 29 ඉරිදා හවස පොලීසිය විසින් අත්අඩංගුවට ගන්නා අයුරු සමාජ මාධ්‍ය ජාල වලට මුදා හැර ඇති වීඩියෝවක දැක්වේ.

ඒ සමගම යාපනයේ හින්දු දේවාලයකට කඩා වැදුනු පොලිසිය කාර්තික මංගල්‍යය සඳහා කර තිබූ සැරසිලි කඩා බිඳ දමා තිබේ.

වසරක් පාසා සිදුකරන ආකාරයට යාපනය සරසවි භූමිය තුල ආගමික වතාවත් පැවැත්වීම සඳහා ගේට්ටු විවෘත කරවා ගැනීමට බලධාරීන් අමතා ගන්නා ලද උත්සාහය අසාර්ථක වීම නිසා ගේට්ටුවෙන් පිටත පහන් දල්වන බව විද්‍යා පීඨ සිසුවකු වන එම් දර්ශිකන් පොලිස් නිලධාරීන් ඉදිරියේ පවසනු සමාජ මාධ්‍ය ජාල ඔස්සේ පලවන වීඩියෝවක දැක්වේ.

ඔහු සමගම ගේට්ටුව දක්වා ඇවිද යන පොලිස් නිලධාරියකු දරශිකන් පහන දල්වන තුරු කල් මරා “මෙයාව ගන්නවා”යි අණදී අත් අඩංගුවට ගෙන රථයක පසුපස නංවාගෙන රැගෙන යන ආකාරය එම දර්ශන වල දැක්වේ.

පහන් දැල්වීම සිදුකරන තෙක්ම එය නවතා දැමීමට හෝ කරුණු විමසීමට පොලිසිය කිසිදු උත්සාහයක් ගන්නා බවක් පෙනෙන්නට නැත.

කිසිදු හේතු දැක්වීමකින් තොරව දර්ශිකන් සිසුවා අත් අඩංගුවට ගැනීමෙන් අනතුරුව සමාජ මාධ්‍ය ජාලා ඔස්සේ දෙමළ ජනතාව විසින් විරෝධය පෑමෙන් අනතුරුව සරසවි සිසුවා පොලිසිය විසින් නිදහස් කර යවා තිබේ.

එම නිදහස් කර යැවීම තමන්ගේ මැදිහත් වීමකින් සිදුවූ බව සිය මුහුණු පොතේ සටහනකින් දැනුම් දී ඇති යාපනය දිස්ත්‍රික් පාර්ලිමේන්තු මන්ත්‍රී අංගජන් රාමනාදන් පවසන්නේ විශ්වවිද්‍යාල සිසුවා අත්අඩංගුවට ගෙන ඇත්තේ “වරදවා වටහා ගැනීමකින්” බවයි.

ඒ සම්බන්ධයෙන් තමන් උතුරු පළාත් බාර නියෝජ්‍ය පොලිස්පතිවරයාගෙන් විමසා සිටි අතර හින්දු භක්තිකයන්ගේ කාර්තික මංගල්‍ය ගැන උසස් පොලිස් නිලධාරියා දැන සිට නොමැති බව ආණ්ඩු පක්ෂයේ මන්ත්‍රීවරයා පවසයි.

සිසුවා අත්අඩංගුවට ගැනීම කරුණු වරදවා තේරුම් ගැනීමක් නිසා සිදුවුවක් බවත් වහාම ඔහු නිදහස් කිරීමට කටයුතු කරන බවත් නියෝජ්‍ය පොලිස්පතිවරයා මන්ත්‍රීවරයාට දැනුම් දී තිබේ.

දෙමළ බහුතරයක් ජීවත් වන පලාතක සංස්කෘතික උත්සවයක් පිළිබඳව පලාත බාර ඉහලම පොලිස් නිලධරියා නොදැන සිටියේ කෙසේදැයි රාමනාදන් මන්ත්‍රීවරයා පැහැදිලි කර නැත.

එදිනම කාර්තික මංගල්‍ය සැමරීම සදහා යාපනය නගරබද මල්ලාකම්, කෝට්ටෙයිකාඩුහි පිහිටි මුරුගන් කෝවිල ඉදිරිපිට සරසමින් සිටි හින්දු භක්තිකයන්ට ද පොලිසිය බාධා පමුණුවා තිබේ.

එම පිරිස මහාවිරු සැමරුමක් කරන බවට 119 දුරකථන අංකයට ලැබුන පනිවිඩයක් මත පොලීසිය එම ස්ථානයට ගොස් ඇති බවයි පලාත් බද වාර්තාකරුවන් පවසන්නේ.

මුලතිව්, මුල්ලිවයික්කාල් ගම්වැසියන් “කාර්තික මංගල්‍ය” සැමරීම වෙනුවෙන් සිය නිවාස ඉදිරිපිට කෙසෙල් කදන් මත පහන් දැල්වීමට කටයුතු සුදානම් කර තිබියදී ගම් වැදුන ආරක්ෂක අංශ නිලධාරීන් ඒවා කඩා විනාශ කර දමමින් සැමරුම් සිදු නොකරන ලෙස තර්ජනය කර ඇති බවත් මුලතිව් දිස්ත්‍රික් වාර්තාකරුවන් සදහන් කරති.

සිංහලෙන් ඉල් මස යනුවෙන් හැඳින්වෙන කාර්තික මාසයේ පුර පසලොස්වක පෝදායින් ඇරැඹෙන කාර්තික මංගල්‍යය සඳහා මසක් පුරා දීප පූජා පැවැත්වීම හින්දු සංස්කෘතික චාරිත්‍රයකි.

Facebook Comments

wedding people