වසර ගණනාවක් තිස්සේ හමුදාව වාඩිලා සිටින තම පාරම්පරික ඉඩම් නිදහස් කරන ලෙස බල කරමින් ආරම්භ කර ඇති විරෝධයට අවුරුද්දක් ගතව ඇතත් විසඳුම් ලබා දීමට යහපාලන රජය උනන්දු නොවන බවට තම ඉඩම් අහිමිව ඇති කේපාපුලව් ජනයා චෝදනා කරති.
පසුගිය වසරේ මාර්තු 01 වනදා ඉඩම් නිදහස් කරන ලෙස බල කර ආරම්භ කරන ලද විරෝධයට වසරක් සපිරෙන දා විරෝධය පැවැත්වෙන ස්ථානයේ උද්ඝෝෂණයක් පවත්වා ඇති ඉඩම් අහිමි කේපාපුලව් ජනතාව තම මුල් ඉඩම් නිදහස් කරන තුරු අඛණ්ඩව සටන් කරන බවට අවධාරණය කර ඇත.
“අපේ විරෝධය සාමකාමී අපි ඉල්ලන්නෙ අපේ ඉඩම් අපේ ඉඩම් නැවත දෙන තුරු අපි සටන් කරනවා” යැයි විරෝධතාකරුවෝ මාධ්‍යවේදීන් වෙත කියා සිටියේය.
යුක්ති සහගත සටනක්
මේ අතර තම ඉඩම් නිදහස් කරන ලෙස ඉල්ලා කේපාපුලව් ගම් වැසියන් සිදු කරන විරෝධතාවය යුක්ති සහගත බව අධිකරණය තීන්දු කර තිබුණි.
හැත්තෑ වැනි නිදහස් සමරුව දා ඉඩමේ අයිතිය ඉල්ලා විරෝධතාවයක යෙදුන කේපාපුලව් ගම් වැසියන්ට එරෙහිව මුල්ලියවලේ පොලීසිය විසින් අධිකරණය හමුවේ ගොනුකළ පැමිණිල්ලක් විභාගයට ගත් මුලතිව් දිසා අධිකරණය උද්ඝෝෂණය සිදු කිරිම ජනතාවගේ අයිතියක් බව තහවුරු කරමින් තීන්දුව ලබා දෙන ලදී.
ජනතාවගේ ප්‍රජාතන්ත්‍රවාදී අයිතීන් වෙනුවෙන් උද්ඝෝෂණ කිරීමේ අයිතිය ජනතාව සතුව පවතින අතර සාමයට බාධා නොවන අයුරින් ඔවුන් කටයුතු කළ යුතු බවයි මුලතිව් දිසා විනිසුරු එස්. ලෙනින් කුමාර් තීන්දුව ප්‍රකාශ කරමින් කියා සිටියේය.
තමන්‍ට අයත් අක්කර 181 භූමියක් හමුදාව විසින් අත්පති කර ගෙන සිටින බවටයි කේපාපුලවි වැසියන් චෝදනා කරන්නේ.
Facebook Comments
