ලංකාවෙන් මෙතෙක් ඇල්ලු විශාලතම හොර මෝර මාළු තොගය මීගමුවෙන්

0

වඳ විමේ තර්ජනයට ලක්ව සිටින නිසා ඇල්ලීම තහනම් කර ඇති කස මෝර මාළු කිලෝග්‍රෑම් හයසීයකට වැඩි ප්‍රමාණයක් ශ්‍රී ලංකාවේ ප්‍රකටම ධීවර වෙළෙඳ සලකින් අත් අඩංගුවට ගෙන තිබේ.

ශ්‍රී ලංකාවෙන් මෙතෙක් අල්ලා ගන්නා ලද විශාලතම කස මෝරුන් තොගය මෙය බව පරිසරවේදීහු පවසති.

මීගමුව, ලෙල්ලම මාළු වෙළඳපොලේ මාර්තු 16 දින සිදු කරන ලද හදිසි පරීක්‍ෂා කිරීමකදී නීති විරෝධී ලෙස අල්ලන ලද වරල් කැපු කස මෝරුන් කිලෝග්‍රෑම් 660කට ආසන්න ප්‍රමාණයක් සමඟ පුද්ගලයකු තමන් භාරයට ගත් බව ශ්‍රී ලංකා නාවික හමුදාව පවසයි.

එම පුද්ගලයා වයස අවුරුදු 46ක් වන මීගමුව ප්‍රදේශයේම පදිංචි කරුවකු බවට හදුනාගෙන තිබේ.

කස මෝරුන් ආරක්ෂා කිරීම වෙනුවෙන් ශ්‍රී ලංකාවේ නීති සම්පාදනය කිරීමෙන් පසු සිදු කරන ලද විශාලතම වැටලීම මීගමුව, ලෙල්ලම මාළු වෙළඳපොලේ නාවික හමුදාව විසින් සිදු කර ඇති වැටලීම බව ජ්‍යෙෂ්ඨ පරිසරවේදී නීතිඥ ජගත් ගුණවර්ධන පවසයි.

සොයා ගන්නා ලද කස මෝර මත්ස්‍ය ප්‍රමාණය ඉදිරි නීතීමය කටයුතු සඳහා වෙරළාරක්‍ෂක දෙපාර්තමේන්තුව හරහා මීගමුව, ධීවර පරීක්ෂක කාර්යාලය වෙත භාර දුන් බව නාවික හමුදාව පවසයි.

“ඇලෝපිඩේ” කුලයට අයත් කස මෝරා (thresher shark) ධීවර හා ජලජ සම්පත් පනත යටතේ, ධීවරයන්ට හෝ විනෝදයට හා ක්‍රීඩාවක්‌ ලෙස මසුන් අල්ලන කිසිම අයකුට ඇල්ලීම තහනම් කර ඇත.

තවද, යම්කිසි බෝට්‌ටු හිමියකු හෝ නියමුවකු මියගිය කස මෝරකුගේ සිරුරක්‌ හෝ සිරුරක යම් කොටසක්‌ හෝ බෝට්‌ටුව තුළ තබා ගැනීම මෙන්ම වෙනත් බෝට්‌ටුවකට මාරු කිරීම, ගොඩබෑම, ගබඩා කිරීම, විකිණීම හෝ විකිණීම සඳහා ඉදිරිපත් කිරීමට ද අවසර ලබා දී නොමැති බව නාවික හමුදාව පවසයි.

ලෝකයේ ජීවත් වන කස මෝර වර්ග තුනම ශ්‍රී ලංකාවට අයත් මුහුදු සීමාවේ ජීවත් වේ.

එම වර්ග තුනම වඳ විමේ තර්ජනයට ලක්ව සිටින දුර්ලභ ගණයේ මත්ස්‍ය ‍විශේෂයන් බව පරිසර වේදී නීතිඥ ජගත් ගුණවර්ධන පෙන්වා දෙයි.

ඉතා සෙමින් ප්‍රජනනය කරන, ඉතා සෙමින් වර්ධනය වන කස මෝරුන් වසරකට එක් පැටියකු පමණක් බිහි කරන බව ජ්‍යෙෂ්ඨ පරිසරවේදියා පෙන්වා දෙයි.

කස මෝරුන්ට එම නම ලැබී ඇත්තේ ඔවුන්ගේ වල්ගයේ (වරලේ) ඉහළ කොටස ශරීර දිගට ආසන්න තරම් දිගකට විශාලවන නිසා බැවිනි.

මේ වන විට කස මෝරන් අන්තර්ජාතික රතු දත්ත ලේඛනයේ වඳවී යාමට ලක් වූ වර්ගීකරණයට අයත් කර ඇති බව පරිසරවේදී නීතිඥ ජගත් ගුණවර්ධන වැඩි දුරටත් පෙන්වා දෙයි.

නීතිය හා අවනීතිය

ධීවර හා ජලජ සම්පත් ආඥා පනතේ 29 වැනි වගන්තිය යටතේ පනවා ඇති නියෝගයක් මගින්, කස මෝරුන්ට පළමුවරට ආරක්ෂාව සලසා ඇත්තේ 2012 වසරේදීය.

නැවතත් 2015.10.26 දිනැති අංක 1938/2 දරන අතිවිශේෂ ගැසට් පත්‍රය හරහා කස මෝරා සුරක්ෂිත කර තිබේ.

“2015 මෝර මත්ස්‍ය කළමනාකරණ නියෝග මගින් මේ සතුන්ට ආරක්ෂාව සැලසුණා. එම නියෝගවලට අනුව, කස මෝරකු පර්යේෂණ කාර්යයක් සඳහා හෝ කෞතුකාගාරයට එකතු කිරීම සඳහා හැරුණු විට අල්ලා ගැනීම තහනම් ”

කෙසේ නමුත් මෙම නියෝගයද අව භාවිතයට ගන්නා අවස්ථා ඇති බව පෙන්වා දෙන ඔහු සදහන් කරන්නේ පර්යේෂණයක මුවාවෙන් විදේශීය සංචාරකයන්ට කසමෝරුන් අල්වා ගැනීමේ වාණිජ ව්‍යාපාරයක් ක්‍රියාවට නැංවීමේ ප්‍රයත්නයක 2019 වසරේදී වාර්තා වු බවයි.

පර්යේෂණයක් සදහා මෙම සතුන් අල්ලාගෙන නැවත මුහුදට දැමුවද ඔවුන්ගෙන් 90% ක් පමණ මිය යා හැකි බව පරිසරවේදීන්ගේ මතය වී තිබේ.

Facebook Comments

wedding people