කොරෝනා: රාජ්‍ය නිලධාරීන් මුහුණ දී සිටින අවදානම ගැන රජයට අනතුරු ඇඟවීමක්

0

කොරෝනා වෛරසය පාලනය කිරීම සදහා රජය විසින් ප්‍රකාශයට පත් කර තිබෙන දින තුනක විශේෂ නිරෝධායන කාලය තුලදීත් අත්‍යාවශ්‍ය සේවාවන්හි නිරතව සිටින නිලධාරීන් සඳහා අවශ්‍ය කළමනා නැති කමින් ඔවුන්ගේ සෞඛ්‍ය ආරක්ෂාව පිළිබදව දැඩි අවදානමක් මතුව තිබෙන බව රාජ්‍ය සේවක නියෝජිතයෝ අනතුරු අඟවා සිටිති.

රාජ්‍ය සේවකයන්ගේ මෙම ඉල්ලීම ඉදිරිපත් වී ඇත්තේ කොරෝනා ව්‍යසනයේ ආර්ථික බර දරා ගැනීමට ව්‍යාපාරිකයන් සඳහා මුල්‍ය සහන සලසා දෙන බවට ජනාධිපති ගෝඨාභය රාජපක්ෂ ප්‍රකාශ කළ දාට පසු දාය.

එම සේවකයන්ට අවශ්‍ය මුඛ ආවරණ, අත්වැසුම් සහ විෂබීජ නාශක මේ වන විටත් ප්‍රාදේශිය වශයෙන් උග්‍ර හියයක් බවතින බව දිවයිනේ පුමුඛතම වෘත්තිය සමිති 20 ක් ඒකාබද්ධව නිකුත් කළ මාධ්‍ය නිවේදනයක දැක්වේ.

එමෙන්ම, කොරෝනා ව්‍යසනයට මුහුණ දීම සඳහා ආපදා කළමනාකරණ මධ්‍යස්ථානය යටතේ ජාතික මෙහෙයුම් මධ්‍යස්ථානයක් පිහිටුවන ලෙස එම වෘත්තීය සමිති රජයෙන් ඉල්ලා සිටී.

අත්‍යාවශ්‍ය සේවා සපයන සේවකයන්ගේ සනීපාරක්ෂාව උදෙසා මුඛ ආවරණ, අත් වැසුම් සහ විෂබීජ නාශක රජය විසින් වහාම සැපයිය යුතු බවට එම සංගම් අවධාරණය කර තිබේ.

අත්‍යාවශ්‍ය සේවා සපයන ආයතනයන්හි සේවා සැපයීම සදහා අවශ්‍ය කාර්ය මණ්ඩල පමණක් සේවා ස්ථානයට කැදවා අනෙකුත් සේවකයන් අවශ්‍ය වු විටකදී පමණක් කැදවීමේ පදනම යටතේ පවත්වා ගත යුතු බව පෙන්වා දෙන වෘත්තීය සමිති මාධ්‍ය නිවේදනය මගින් අවධාරණය කර ඇත්තේ එම කාර්ය මණ්ඩල වල සිටින ගර්භනී සහ ඌණ ප්‍රතිශක්තිකරන සහිත සේවකයන් වෙතොත් ඔවුන් සේවය සදහා නොකැදවිය යුතු බවයි.

මෙවන් ජාතික ආපදා තත්වයකදී විශේෂ පුහුණුව ලත් රාජ්‍ය නියාමන අධිකාරිය වන ආපදා කළමනාකරණ මධ්‍යස්ථානය යටතේ ජාතික මෙහෙයුම් මධ්‍යස්ථානයක් ස්ථාපිත කළ යුතු අතර එම මධ්‍යස්ථානය යටතේ සියළුම රාජ්‍ය සේවාවන් පෙළ ගස්වා විධිමත්ව කොරෝනා වෛරසය ව්‍යාප්තිය වළක්වා ගැනීම සදහා කටයුතු කිරීමේ වැදගත් කම එම නිවේදනය මගින් වැඩි දුරටත් රජයට පෙන්වා දී තිබේ.

වෛරසය පාලනය සඳහා පිහිටුවා ඇති ජාතික මෙහෙයුම් මධ්‍යස්ථානයේ ප්‍රධානියා ලෙස ජනාධිපතිවරයා විසින් පත් කර ඇත්තේ හමුදාපති ලුතිනන් ජනරාල් ශවේන්ද්‍ර සිල්වාය.

“මහජන සුබසිද්ධිය සහතික කිරීම සඳහා පොදු සෞඛ්‍ය හා සෙසු සේවාහි මනා සම්බන්ධීකරණයකින් යුත් නිවාරණ හා කළමනාකරණ පියවර ගන්නා බවට සහතික කිරීමේ අරමුණෙන් මධ්‍යස්ථානය ස්ථාපනය කරනු ලැබීය,” යි රජය එම තනතුර ප්‍රකාශයට පත් කරමින් පවසා තිබුනි.

ජාතික ආපදා තත්වය මැඩ පැවැත්වීම සදහා දැනට විවිධ වැඩ පිළිවෙළ ක්‍රියාත්මක වුවද සියළු අත්‍යාවශ්‍ය සේවා ජාතික වැඩ පිළිවෙලක් සදහා දායක වී නොමැති බවට චෝදනා කරන වෘත්තිය සමිති නිවේදනය මගින් අවධාරණය කරන්නේ මෙම අවිධිමත් තත්වය යටතේ කොවිඩ් 19 වෛරසය ක්‍රමයෙන් රට පුරා ව්‍යාප්ත වන බව විවිධ ස්ථාන වලින් වාර්තා වී ඇති වෛරසය ආසාදනය වු පුද්ගලයන්ගේ සංඛ්‍යාලේඛන මගින් තහවුරු වන බවයි.

මෙම නිවේදනය සමස්ත ලංකා රාජ්‍ය කළමනාකරණ නිලධාරීන්ගේ සංගමය, ලංකා වෙළද කාර්මික හා පොදු සේවක සංගමය,ලංකා බැංකු සේවක සංගමය, ලංකා ගුරු සංගමය, ශ්‍රී ලංකා තැපැල් හා විදුලි සංදේශ සේවා සංගමය, වර් මාර්ග පොදු සේවක සංගමය, ආණ්ඩුවේ කම්මකරු සමිති සම්මේලනය, පළාත් කළමනාකරණ සේවා නිලධාරීන්ගේ සංගමය, ජාතික තැපැල් හා විදුලි සංදේශ සේවක සංගමය, දුම්රිය ඒකාබද්ධ පෙරමුණ,තොරතුරු හා විදුලි සංදේශ සියලු සේවක සංගමය, රජයේ කර්මාන්ත ශාලා සේවක සංගමය, එක්සත් ජාතික තැපැල් සේවක සංගමය, එක්සත් තැපැල් හා විදුලි සංදේශ සේවක සංගමය, ශ්‍රී ලංකා නිදහස් තැපැල් වෘත්තිය වේදීන්ගේ සංගමය, ලංකා වෘත්තිය සමිති සම්මේලනය, රජයේ ආහාර නිරීක්ෂිකා සංගමය, එක්සත් ලංකා පවුල් සෞඛ්‍ය සේවා නිලධාරීන්ගේ සංගමය, ජාතික නිදහස් වෘත්තිය සමිති සම්මේලනය, ආපදා කළමනාකරණ මධ්‍යස්ථානයේ සේවක වෘත්තිය සමිතිය ඒකාබද්ධව නිවේදනය කර තිබේ.

රජය විසින් නිරෝධායනය සඳහා දින තුනක නිවාඩුවක් ලබා දුන්නේ කලින් දුන් එක්දින නිවාඩුව ප්‍රමාණවත් නොවන බව වෘත්තීය සමිති විසන් පෙන්වා දීමෙන් අනතුරුවයි.

Facebook Comments

wedding people