කොරෝනා වෛරසය හේතුවෙන් රටේ ජනතාව සලිත වී සිටින මොහොතක ශ්‍රී පාදස්ථානය කරා රැස්වීම් ජනතාව විසින් මග හැරිය යුතු බව බොදු බල සේනා සංවිධානයේ නායක හිමියෝ පවසති.
මේ වන විට විශාල ජනතාවක් ශ්‍රී පාදස්ථානය වෙත ඇදෙමින් පවතින අතර කොරෝනා රෝගය ව්‍යාප්ත වීමට එය රුකුලක් විය හැකි බවට අනතුරු අගවන ගලගොඩඅත්තේ ඥාණසාර හිමියන් පෙන්වා දෙන්නේ මේ මොහොතේ ඉතාමත්ම කල්පනාකාරීව ආගමික ස්ථාන කරා රැස්වීම මගහැරීම සුදුසු බවයි.
ලෝකයේ වඩාත්ම සුරක්ෂිත දුපතක් ලෙස ශ්‍රී ලංකාව නම් කර තිබියදීත් රට තුලට කෝරෝනා වෛරසය ඇතුලුවීම වළක්වා ගැනීමට නොහැකි වීම සම්බන්ධයෙන් ලැජ්ජාවට පත් විය යුතු බවත් බොදු බල සේනානායකයා අවධාරණය කළේ රජයෙන් මේ වනවිට නිවාඩු ලබා දී ඇත්තේ චාරිකා හා විනෝද ගමන් යාමට නොව නිවසට වී ආරක්ෂිතව සිටිමට බව සෞඛ්‍ය ඇමැතිනි පවිත්‍රා වන්නිආරච්චි ජනතාවගෙන් ඉල්ලා සිටියදීය.
ගලගොඩඅත්තේ ඥාණසාර හිමියන් තම සිරිපා කරුණා අත්හිටුවීමේ අනුශාසනාව කළේ ඉදිරි පාර්ලිමේන්තු මැතිවරණය සදහා අපේ ජන බල පක්ෂයෙන් තරග වදින බවට ප්‍රකාශ කිරීම සදහා පසුගියදා කැදවා තිබු මාධ්‍ය හමුවකදීය.
අපේ ජන බල පක්ෂයෙන් කුරුණැගල දිස්ත්‍රික්කය සදහා තරග වදින බොදු බල සේනා සංවිධානයේ මහ ලේකම් හිමියෝ එහිදී අවධාරණය කළේ ජනාධිපතිවරණයේදී රටේ ජනතාව අපේක්ෂා කළේ රටේ ජාතික ආරක්ෂාව තහවුරු කළ හැකි නායකයකු පමණක් බවයි.
ජනාධිපතිවරයාගේ දේශපාලන භාවිතය සම්බන්ධයෙන් තමාට තර්කයක් නොමැති නමුත් ඔහුට රටේ නීති තනියම සකස් කළ නොහැකි අතර රටේ නීති සම්පාදනය කරන්නේ පාර්ලිමේන්තු බැවින් මෙවර මැරතිවරණයේදී සියලු ජාතික බලවේග ගොනු කරමින් පාර්ලිමේන්තු බලය ලබා ගැනීම සදහා තරග වදින බව එම හිමියන් වැඩි දුරටත් සදහන් ක ර තිබුනි.
අපේ ජන බල පක්ෂය මෙවර පාර්ලිමේන්තු මැතිවරණය සදහා තරග කිරීමට තීරණය කර තිබුනේ බෞද්ධ භික්ෂුන් වහන්සේලාට ශ්‍රී ලංකා පොදු ජන පෙරමුණ නාම යෝජනා ලබා නොදීමට ගෙන තිබු තීරණයෙන් පසුවය.
මේ වන විට වාර්තා වන පරිදි අතුරලියේ රතන හිමියන් නායකත්වය ලබා දෙන ‘අපේ ජන බල පක්ෂයේ’ කොළඹ,කුරුණෑගල හා මොනරාගල දිස්ත්‍රික්ක වලින් ඉදිරිපත් කළ නාමයෝජනා ප්‍රතික්ෂේප වී තිබේ.
Facebook Comments
