කොරෝනාවෙන් මියගිය අයගේ අවසානය දඬුවමක් කරන්න එපා

0
610
Ivory Agency Sri Lanka
wedding people

කොවිඩ් 19 වැළඳීමෙන් මියගිය අයගේ සිරුරු ඉවත් කිරීමේදී එය දඬුවමක් සේ හැඟී යන ආකාරයෙන් කටයුතු නොකරන ලෙස ශ්‍රී ලංකාවේ සියලු ජාතීන් නියෝජනය කරන සමූහයක් ජනාධිපතිවරයාගෙන් ඉල්ලා තිබේ.

කොරෝනා ව්‍යාධියෙන් මරුමුවට පත් මීගමුවේ මුස්ලිම් ජාතිකයකුගේ දේහය ජාත්‍යන්තර හා දේශීය නිර්ණායක වලට පටහැනිවත්, පවුලේ උදවියගේ කැමැත්තකින් තොරවත් ආදාහනය කිරීම සම්බන්ධයෙන් කනස්සල්ල පල කරමින් ජනාධිපති ගෝඨාභය රාජපක්ෂ වෙත සන්දේශයක් යවන පුද්ගලයන් හා සංවිධාන එකසිය අසූවකට ආසන්න සංඛ්‍යාවක් ඉල්ලා ඇත්තේ ජාත්‍යන්තර වශයෙන් පිළිගත් පිළිවෙත අනුව යමින් සිරුරු වල දැමීමට ඇති තහංචිය ඉවත් කරන ලෙසයි.

“මළ සිරුරු රෝග වාහකයක් නොවේ,” ය යනුවෙන් ලෝක සෞඛ්‍ය සංවිධානය දී ඇති විශේෂඥ  උපදේශයක්ද ශ්‍රී ලංකාවේ ජනාධිපති වරයාට සිහිපත් කර දෙන සංදේශකරුවෝ කොවිඩ්-19 න් මියයන්නවුන් වළ දැමීම හෝ පිළිස්සීම එම නිර්ණායක වලට අනුකූල බව අවධාරණය කරති.

“වර්තමානයේ, ඇතැම් වින්දිතයන්ගේ ආගමික අනන්‍යතාව ඉස්මතු කර දැක්වීම නිසා කොවිඩ්-19 වැලක්වීමට ක්‍රියා නොකිරීම හෝ ව්‍යාප්ත කිරීම හෝ සම්බන්ධයෙන් මුස්ලිම්වරුන් ක්‍රියා කිරීම හෝ නොකිරීම හෝ ගැන ප්‍රධාන ධාරාවේත්, සමාජ මාධ්‍යයේත් මුස්ලිම්වරුන්ට එරෙහිව පරුෂ වචන හා වෛරී ප්‍රකාශ වැගිරෙනු අපට දැකගන්නට හැකිවිය,” යි පුද්ගලයන් 164ක් සහ සංවිධාන 17ක් ජනාධිපතිවරයාට යවන ලද සංදේශයේ දැක්වේ.

“මේ සන්දර්භයෙහි ලා ගත් කල, භූමදානය සම්බන්ධයෙන් තීන්දු ගනු ලබන්නේ ආසාදිත පුද්ගලයන්ගේ වගකීම් විරහිතයයි පැවසෙන ක්‍රියා වලට එරෙහි දඬුවමක් ලෙස හැඟී නොයාම වැදගත්ය. ශ්‍රී ලංකාව තුල ප්‍රචලිතව පවතින මුස්ලිම් විරෝධය පසුගිය අවුරුදු කිහිපය පුරාම පැවති බවත් පිළිගත යුතුය.”

මහජන සෞඛ්‍යය සම්බන්ධයෙන් තීරණ ගැනීමේදී මුස්ලිම් ප්‍රජාව දණ්ඩනයට හෝ ආන්තීකරණයට ගොදුරු නොකර, ආගමික හා සංස්කෘතික සංවේදීතාවන්ට ගරු කරමින් කොරෝනාවෙන් මියගිය රෝගී සිරුරු වල දැමීම සම්බන්ධයෙන් ඇති සීමාව ඉවත් කරන ලෙස සංදේශය ජනාධිපතිවරයාගෙන් ඉල්ලා සිටියි.

Facebook Comments