තුන් වසරකට ඉහත දී සිදුවු රිය අනතුරක් සම්බන්ධව අත් අඩංගුවට පත්වු හිටපු අමාත්‍ය පාඨලී චමිපික රණවක තව දුරටත් රක්ෂිත බන්ධනාගාර ගත කර තිබේ.
හිටපු අමාත්‍යවරයා කොළඹ අපරාධ කොට්ඨාසය විසින් 18 බදාදා අත් අඩංගුවට ගෙන අධිකරණයට ඉදිරිපත් කිරිමෙන් අනතුරුව අද දින දක්වා රිමාන්ඩ් බන්ධනාගාර ගත කිරීමට මහේස්ත්‍රාත්වරයා නියෝග කළේය.
කෙසේ වෙතත් 19 බ්‍රහස්පතින්දා චමිපික රණවක මන්ත්‍රීවරයා අධිකරණයට ඉදිරිපත් කළ අවස්ථාවේදී හෙතෙම දෙසැම්බර් 24 වනදා දක්වා රක්ෂිත බන්ධනාගාර ගත කිරීමට කොළඹ අතිරේක මහේස්ත්‍රාත් නෙරංජන් ද සිල්වා නියෝග කර ඇත.
රිය අනතුරක් සිදු කර පුද්ගලයෙකුට බරපතළ තුවාල සිදු කිරිම සහ අනතුරෙන් පසු රියදුරු මාරුකර පලායාමේ චෝදනා මත හිටපු අමාත්‍යවරයා අත් අඩංගුවට ගෙන අධිකරණයට ඉදිරිපත් කිරීමට නීතිපතිවරයා පොලිසියට උපදෙස් දී තිබුනි.
පාඨලී චම්පික රණවක වෙනුවෙන් ඉදිරිපත් වූ නීතිඥයින් ඔහුට ඇප ලබා දෙන ලෙස අධිකරණයෙන් ඉල්ලීමක් කළ අතර එහිදී අධිකරණය දැනුම්දී ඇත්තේ ඇප ඉල්ලීමට අදාල නියෝගය පසුව ලබා දෙන බවයි.
සිදු කරන පරික්ෂණ මුල් අවස්ථාවේ පවතින බැවින් සහ නීතිමය තර්ක රැසක් ඉදිරිපත්ව ඇති බැවින් පාඨලී චම්පික රණවක හිටපු ඇමැතිවරයා යලි රක්ෂිත බන්ධනාගාර ගත කිරිමට නියම කරන බවයි මහේස්ත්‍රාත්වරයා දැනුම් දී ඇත්තේ.
කතානායකවරයාට හෝ අධිකරණයට කිසිදු දැනුම් දීමකින් තොරව තමන් අත්අඩංගුවට ගැනීම “නීති විරෝධී” බව හිටපු අමාත්‍යවරයා අවධාරණය කර ඇත.
කොළඹ අපරාධ කොට්ඨාසයේ පොලිස් නිලධාරීන් පිරිස සිය නිවසට ඇතුළු වූ අවස්ථාවේ එහි රැස්ව සිටි පිරිස අමතමින් ඒ බව සඳහන් කළ මන්ත්‍රීවරයා, පොලිස් නිලධාරීන් ඒ බව නියෝජ්‍ය කතානායකවරයාට දැනුම් දුන්නේ තමන් ඒ ගැන ප්‍රශ්න කිරීමෙන් අනතුරුව බව ද කියා සිටියේය.
Facebook Comments
