මහනුවර සිට කොළඹ දක්වා ඒකාබද්ධ විපක්ෂය විසින් 29 බ්‍රහස්පතින්දා සංවිධානය කර තිබෙන පාගමන සඳහා අවහිර කිරීමෙන් වළකින ලෙසත්, සංවිධානාත්මක ලෙස බලය පෙන්වීමෙන් වළකින ලෙසත් කැෆේ සංවිධානය ‘යහපාලන රජයේ ප්‍ර‍ධාන හවුල්කාර පක්ෂ‘ වෙතින් ඉල්ලීමක් කරයි.
නිවේදනයක් නිකුත් කරමින් කැෆේ සංවිධානය සදහන් කරන්නේ ඒකාබද්ධ විපක්ෂය විසින් මහනුරව සිට කොළඹ දක්වා විරෝධතාවය පැවැත්වීමට නියමිත මාර්ගයේ ස්ථාන කිහිපයකම වෙනත් දේශපාලන පක්ෂ කණ්ඩායම් විසින් විවිධ කටයුතු හදිසියේ සංවිධානය කොට ඇති බවයි.
යම් කණ්ඩායම් විරෝධතා පාගමනක නිරත වන අවස්ථාවේ දී එයට බාධා එල්ල කිරීම ගැටුම් ඇතිවීම සදහා හේතුවක් වනු ඇති බවයි එම සංවිධානය පවසන්නේ.
පසුගිය පාලන සමයේ දී දේශපාලන ක්‍රියකාරීන් පමණක් නොව සිවිල් සංවිධාන ක්‍රියාකාරීන් ද සාමකාමී උද්ඝෝෂණයක් හෝ පැවැත්වීමට නොහැකිව පීඩාවකට ලක් වු බව පෙන්වා දෙන කැෆේ සංවිධානයේ විධායක අධ්‍යක්ෂ කීර්ති තෙන්නකෝන් සදහන් කරන්නේ සාමකාමී විරෝධතාවයක් සඳහා වන අවස්ථාව අහිමි කිරීම, කඩාකප්පල් කිරීම ශිෂ්ට ප්‍ර‍ජාතන්ත්‍ර‍වාදී සමාජ ව්‍යවහාරයක් නොවන බවයි.
ප්‍ර‍ජාතන්ත්‍ර‍වාදී සමාජයක දේශපාලන මතවාද දැරීමට මෙන්ම ඒ සඳහා ජනතාව ගොනු කිරීම සදහා ද අයිතිවාසිකමක් පුරවැසියන්ට ඇති බව ඔහු වැඩි දුරටත් එම නිවේදනය මගින් පෙන්වා දී ඇත.
Facebook Comments
