පුද්ගලයින් පැහැරගෙන ගොස් අතුරුහන් කරවීම පිළිබඳ කුප්‍රකට සුදු වෑන් අපරාධය ගැන සොයා නොබලා ඒ සම්බන්ධව හෙළිදරව් කළ පුද්ගලයා අත් අඩංගුවට ගැනීමට යාම ගැටලු සහගත බව දෙමළ ජාතික සන්ධානයේ මන්ත්‍රීවරයෙකු ප්‍රකාශ කර තිබේ.
සුදු වෑන් භිතිකාව වසර 10ක පමණ කාලයක් තිස්සේ පවතින බැවින් විමර්ශන සිදු කල යුත්තේ ඒ සම්බන්ධව බව පාර්ලිමේන්තු මන්ත්‍රී එම්. ඒ. සුමන්තිරන් 26 බ්‍රහස්පතින්දා පැවති මාධ්‍ය හමුවක දී කියා සිටියේය.
“සුදු වෑන් කතාව ඊයේ පෙරේදා ආපු එකක් නෙවෙයි..ඒක අපේ සමාජේ අවුරුදු 10ක විතර ඉදලා තියෙන කතාවක්. කවුරු හරි ඇවිල්ලා මම ඒ ක්‍රියාවට සම්බන්ධයි, මමයි ඒක කළේ කිව්වහම ඒ සිද්ධිය ගැන හොයලා බලන්න ඕනේ. නැතුව සාකච්ඡාව සංවිධානය කරපු මන්ත්‍රීවරයාව අත්අඩංගුවට අරන් වැඩක් නෑ.”
මේ අතර සුදු වෑන් සිද්ධි සම්බන්ධයෙන් විමර්ශන සිදුනොකර, එම මාධ්‍ය හමුව කැඳවූ රාජිත සේනාරත්න සම්බන්ධයෙන් විමර්ශන සිදුකිරීම භාෂණයේ නිදහස සීමා කිරීමක් බව එක්සත් ජාතික පක්ෂ මහලේකම් අකිල විරාජ් කාරියවසම් පෙන්වා දී ඇත.
“මේ සුදුවෑන් සම්බන්ධ මාධ්‍ය සාකච්ඡාවට පැමිණි දෙපළ කියනවා, ඒ සිද්ධිය ගැන රටට කියන්න රාජිත සේනාරත්න මහතාව සම්බන්ධ කර දෙන්න කියලා.. ඒ අනුව තමයි අපේ සංවිධායකවරයා රාජිත සේනාරත්න මහතාව හමුවෙලා මේ පිළිබඳව තොරතුරු ලබා දෙන්නේ. මේ සම්බන්ධයෙන් මීට පෙර පොලීසියට පැමිණිලි කළා, පොලීසිය ඒ සම්බන්ධයෙන් ක්‍රියාමාර්ගයක් ගත්තේ නෑ කියලා. ආණ්ඩුක්‍රම ව්‍යවස්ථාවේ 14 වන වගන්තිය අනුව භාෂණයේ නිදහස තියෙනවා. ඒ අනුව කතා කිරීමේ අයිතිය ඕනේ කෙනෙකුට තියෙනවා.”
රාජිත සේනාරත්ත මෙම මාධ්‍ය හමුව පවත්වනු ලැබුවේ සමාජයේ පොදු යහපත උදෙසා කරුණු ගෙන හැර දැක්වීමට බව අකිල විරාජ් කාරියවසම් වැඩි දුරටත් සඳහන් කළේය.
Facebook Comments
