දෙමළ පුද්ගලයකුට පහර දී වධ හිංසනයට ලක් කිරීම සම්බන්ධයෙන් රජයේ නිලධාරීන් පිරිසක් චෝදනාවට ලක්ව සිටී.
පොලිසියද දැනුවත්ව තමන් බලහත්කාරයෙන් ගෙන ගිය වන ජීවි නිලධාරීන් කණ්ඩායම අධිකරණ භුමියේදී ද තවදුරටත් ගුටි බැට දෙන බවටත් බොරු නඩුවලට පටලවන බවටත් තර්ජනය කළේ යයි පවුලේ සාමාජිකයෝ පවසති.
මුලතිව්, ඔට්ටුසුඩාන් ප්‍රාදේශිය ලේකම් කාර්යාලයට අයත් කිලවන්කුලම් ප්‍රදේශයේ පදිංචි නවරත්නම් නවරූබන් චෝදනා කරන්නේ 2023 ජුලි 14 වැනිදා හවස තම නිවසට පැමිනි කිලිනොච්චි වන ජීවි දෙපාර්තමේන්තුවේ නිලධාරීන් තමන් රැගෙන ගොස් කුරිරු වධ හිංසා පැමිණවූ බවයි.
“හතරට විතර වනජීවී දෙපාර්තමේන්තුවේ නිලධාරීන් ඇවිත් ගෙදර අරක්කු තියනවා, මස් තියෙනවා කියලා රෑ මුළුල්ලේම මට ගැහුවා. මුළු රෑ පුරාම අතට මාංචු දාලා එල්ලලා ගැහුවා.”
පහර කෑමට ලක් වු නවරත්නම් නවරූබන්ගේ බිරිද වන අගලියා නවරූබන් පවසන පරිදී ඇය එදින තම සැමියා සමග වත්තේ සිටියදී වන ජීවි දෙපාර්තමේන්තුවේ පිරිසක් පැමිණ සිය නිවස පරීක්ෂා කරන බව ගම්වැසියන් විසින් දැනුම් දී තිබේ.
පළාත් බද වාර්තාකරුවන්ට අනුව එම පිරිස 11 දෙනකුගෙන් සමන්විතය. හතර දෙනකු පොලිස් විශේෂ බලකායේ සාමාජිකයන් වන අතර ඉතිරි හත් දෙනා වන ජීවි දෙපාර්තමේන්තුවේය.
ගම්වැසියන්ගේ දැනුම්දීමෙන් පසු නිවසට පැමිණි නවරත්නම් නවරූබන්ට සහ අගලියා නවරූබන් ට දැකගැනීමට හැකිව ඇත්තේ වන ජීවි දෙපාර්තමේන්තුවේ නිලධාරීන් විසින් නිවසේ තිබු බඩු බාහිරාදිය, අවුස්සමින් විසි කරමින් සිටින ආකාරයයි.
” එදා අපේ ගෙදර මස් උයලා තිබුනේ නෑ. අපේ ගෙදර පරිප්පු, මාළු, මුරුංගා උයලා තිබුනා. එයාලා ඒවා පොළවට හලලා පරීක්ෂා කරලා තියනවා. එයාලා නිසා අපේ දරුවන්ට එදා කෑම වේලත් නෑ. ”
දඩමස් තියාගෙන සිටින පිරිස් අල්ලා නොදුන්නහොත් තමාට සහ සැමියාට පහර දෙන බවට පැවසු වන ජීවි දෙපාර්තමේන්තුවේ නිලධාරීන්ට තමන් සහ සැමියා වාචිකව විරෝධතා දැක්වු ආකාරය වීඩියෝගත කරගත් ඔවුන් සැමියා අත්අඩංගුවට ගෙන, රැගෙන ගොස් රෑය පුරා පහර දී ඇති බව අගලියා නවරූබන් වැඩි දුරටත් පැවසුවාය.
වීඩියෝ සාක්කි
“උං අපේ ගෙදර කරපු කිසිම අමානුෂික ක්‍රියාවක් වීඩියෝවල සටහන් වෙලා නෑ. අපි තරහින් කතා කරපු දේවල් විතරක් එයාලා තියාගෙන මගේ මහත්තයාට රෑ පුරාම ගැහුවා. මම ඒවා වීඩියෝ කරන්න හදනකොට මගේ ෆෝන් එක ගහලා කැඩුවා.”
වන ජීවි දෙපාර්තමේන්තුවේ නිලධාරීන් විසින් පසුදා සිය සැමියා කිලිනොච්චි අධිකරණයට ඉදිරිපත් කළ බව පවසන අගලියා නවරූබන් චෝදනා කරන්නේ අධිකරණය විසින් සැමියා ඇප පිට නිදහස් කිරීමෙන් පසුවත් වන ජීවි දෙපාර්තමේන්තුවේ නිලධාරියකු තමන් දෙදෙනාට තර්ජනය කළ බවයි.
“උසාවියෙන් අපි එළියට එනකොට එයා කියනවා, මම උඹට නඩු දාන විදිහ බලා ගනින් කියලා. උඹේ ගෙදර මම හැමදාම එනවා කියලා එයා කිව්වා. ඔයා මොකටද අපේ ගෙදර එන්නේ කියලා මම ඇහුවාම, මම උඹේමිනිහා හැමදාම එක්කං ගිහිල්ලා ගහලා යවනවා කියලා උත්තර දුනන්නා.”
“මාවත් අත්අඩංගුවට ගන්නවා කියලා තර්ජනය කරනවා. ඒකට සාධාරණයක් ඕන.” ඇය වැඩි දුරටත් සදහන් කළාය.
නවරත්නම් නවරූබන් ද තහවුරු කර සිටින්නේ අධිකරණයෙන් නිදහස ලැබිමෙන් පසුවත් කිලිනොච්චි වන ජීවි දෙපාර්තමේන්තුවේ නිලධාරියෙකු තමන්ට තර්ජනය කළ බවයි.
“අධිකරණය හරහා නිදහස් කරාට පස්සේ ගංජා තියලා, කසිප්පු තියලා උඹව අල්ලා ගන්නවා කියලා තර්ජනය කළා.”
Facebook Comments
