යුද සමයේත්, ඉන් පසුවත් බලහත්කාරයෙන් අතුරුදහන් කරන ලද සිය සමීපතමයන් සොයා ගැනීම සදහා ජාත්‍යන්තර සහාය ඉල්ලා ශ්‍රී ලංකාවේ අඛණ්ඩ පවත්වාගෙන යන යුද වින්දිත මව්වරුන්ගේ දීර්ඝතම අරලගය දින 2700 ක් පසුකර තිබේ.
සිය සමීපතමයන්ට යුක්තිය ඉල්ලා 2017 වසරේ පෙබරවාරි මාසයේ ආරම්භ කළ විරෝධතාවයට දින 2700 ක් සම්පුර්ණ වු 2024 ජුලි 13 වැනිදා වව්නියාවේ පැවැති විරෝධයට එක්වෙමින් දෙමළ නිජ භුමියේ අතුරුදහන් කළවුන්ගේ ඥාතීන්ගේ සංගමයේ ලේකම් සඳහන් කළේ අනාගත වර්ග සංහාරයකින් දෙමළ ජනතාව බේරා ගැනීමත් මෙම අරගලයේ අරමුණක් බවයි.
“අතුරුදහන් කළ දෙමළ දරුවන් සොයා ගැනීමටත්, අනාගත වර්ග සංහාරයෙන් දෙමළ ජනතාව බේරා ගැනීමටත්, දෙමළ ස්වෛරීභාවය සඳහා ඇමරිකා හා යුරෝපීය රටවලින් යුක්තිය ඉල්ලා කරන අරගලයට දින 2700 ක් පිරුනා,” යනුවෙන් ලේකම් එම්.රාජ් කුමාර් පැවසීය.
බලහත්කාරයෙන් අතුරුදහන් කළවුන්ගේ ප්‍රශ්නය දෙමළ මව්වරුන්ගේ ප්‍රශ්නයක් පමණක් නොව දෙමළ ජනතාවගේ ජීවත්වීමේ අයිතිය පිළිබඳ ප්‍රශ්නයක් බව පැවසු එම්.රාජ් කුමාර් එහිදී තව දුරටත් අවධාරණය කළේ දෙමළ ජනයාට ජීවත් විය හැක්කේ සටන් කළහොත් පමණක් බවයි.
“අතුරුදහන් වූවන්ගේ ප්‍රශ්නය දෙමළ මව්වරුන්ගේ ප්‍රශ්නයක් පමණක් නෙමෙයි. ඒක දෙමළ ජනතාවගේ ජීවත්වීමේ අයිතිය පිළිබඳ ප්‍රශ්නයක්. මේක ජනවාර්ගික ප්‍රශ්නයේ තුරුම්පුවයි. අපි මෙය නිවැරදිව හැසිරවිය යුතුයි. ස්වෛරීභාවය විතරයි ජාතික ගැටලුවට ඇති එකම විසඳුම. ඒක ලබා ගන්නට තමයි දෙමළ ජනතාව සියලු කටයුතු කළ යුත්තේ. දෙමළ මිනිස්සුන්ට ජීවත් වෙන්න පුළුවන් සටන් කළොත් විතරයි.”
යුද්ධයේ අවසාන දින වලදී ආරක්ෂක අංශ භාරයට පත් වීමෙන් පසුව හා යුද්ධයේ අවසන් මොහොතේ අතුරුදහන් වු තමන්ගේ ආදරණීයයන්ට අත්වූ ඉරණම හෙළි කරන ලෙස රජයට බල කරමින් 2017 වසරේ පෙබරවාරි සහ මාර්තු මාසවලදී වව්නියාව, කිලිනොච්චිය, යාපනය, මුලතිව්, ත්‍රිකුණාමලය සහ අම්පාර දිස්ත්‍රික්ක වල සත්‍යග්‍රහ ව්‍යාපාර ආරම්භ විය.
ඔවුන්ට අත්වු ඉරණම සෙවීම සදහා මෛත්‍රී රනිල් ආන්ඩුව විසින් තමන්ගේ නායකත්වයෙන් 2018 පෙබරවාරි 28 දා අතුරුදහන් වූ තැනැත්තන් පිළිබඳ කාර්යාලය (OMP) පිහිටුවන ලද නමුත් ඥාතීන්ට එකම සමීපතමයකු හෝ සොයා දීමට එම කාර්යාලයට මේ තාක් හැකිවී නැත.
වසරකට ඉහත දී අහඔු ලෙස හමුවු කොක්කුතොඩුවායි සමූහ සුසානයේ ඇති සිරුරු යුද්ධාවසානයේ අතුරුදහන් වුවන්ගේ දැයි අතුරුදහන් වූ තැනැත්තන් පිළිබඳ කාර්යාලයේ (OMP) වත්මන් සභාපති මහේෂ් කටුලන්ද කැනීම් ආරම්භ වී වසරකට ආසන්න කාලයක් ගතවූ පසු වන්නියේදී සැක පල කර තිබුණි.
“ඉහලම ප්‍රමිතියට අනුකූල වෙලා අතුරුදහන් පුද්ගලයන්ගේ ඉරණමත්, මේ වනවිට පැමිණිලි ලැබී තිබෙන අතුරුදහන් පුද්ගලයන් සහ සොයාගන්නා ලද සිරුරු අතර කිසියම් සම්බන්ධයක් වේ ද යන්නත් සොයාගැනීමට අපේ අපේක්ෂාවයි,” යනුවෙන් නීතිඥ මහේෂ් කටුලන්ද
2024 ජුලි 05 වැනිදා කොක්කුතොඩුවායි වල අසලදී මාධ්‍යවේදීන්ට සදහන් කළේය.
කැනීම් සිදුකෙරෙමින් පවතින කොක්කුතොඩුවායි සමූහ සුසානයේ මිහිදන් කර ඇත්තේ බලහත්කාරයෙන් අතුරුදහන් කරන ලද්දවුන්ගේ සිරුරු දැයි සැකහැර දැනගැනීම සඳහා අවශ්‍ය ජීව විද්‍යාත්මක දත්ත රැස්කොටගෙන තිබෙන බව පවසන සිරුරු ගොඩගැනීම මෙහෙයවන මුලතිව් දිස්ත්‍රික් රෝහලේ අධිකරණ වෛද්‍ය නිලධාරි වෛද්‍ය කනගසභාපති වාසුදේව ප්‍රකාශ කරන්නේ ජුලි මස මුල් සතියේ නැවත කැනීම් ආරම්භ කිරීමෙන් අනතුරුව ගොඩගන්නා ලද හිස්කබල්වලින් DNA විශ්ලේෂණ සඳහා යොදා ගත හැකි පරිදි දත් ගලවා ගබඩා කරන ලද බවයි.
සමූහ සුසානයේ මිහිදන් කර තිබෙන්නේ තම සමීපතමයන්ගේ සිරුරු දැයි සැකයෙන්, ඒවා පරීක්ෂා කරන ලෙස අතුරුදහන් වුවන්ගේ ඥාතීන්ගෙන් ඉල්ලීමක් කෙරුනොත් ඒ සදහා ඩී.එන්.ඒ පරීක්ෂණ සිදු කිරීමේ හැකියාවක් ඇති බව අධිකරණ වෛද්‍ය නිලධාරීවරයා මාධ්‍යවේදීන් හමුවේ පවසා තිබේ.
“මේ සම්බන්ධයෙන් අතුරුදන් වූවන්ගේ ඥාතීන් තමන්ගේ ඥාතීන් තමයි මේ විදිහට මිහිදන් කරලා තියෙන්නේ කියලා සැක කරනවා නම් ඔවුන්ගේ රුධිර සාම්පල ආදිය ලබාගෙන මේ ඩී.එන්.ඒ සමඟ සංසන්දනය කරනවා.”
මුලතිව් සමූහ සුසානයේ සිරුරු ගොඩගැනීමේ කටයුතු විමර්ශනයට පුරෝගාමී වී සිටි වෝහාරික පුරාවිද්‍යාඥ මහාචාර්ය රාජ් සෝමදේව ජුලි 10 වැනිදා වන්නි මාධ්‍යවේදීන්ට කියා තිබුනේ අතුරුදහන් වු අය අදුනාගැනීම සදහා දිවුරුම් පෙත්සම් කීපයක් ඉදිරිපත් වී ඇතැයි මුලතිව් මහේස්ත්‍රාත්වරයා දැනුම් දී ඇති බවයි.
Facebook Comments
