තේ කම්කරුවන් ඇතුළු වැඩ කරන ජනතාවගේ අයීතීන් ආරක්ෂා කරන ලෙස රජයට බල කරමින් කදුකරයේ විරෝධතාවයක් දියත් කර තිබේ.
මස්කෙළිය නගරයේ දී ජුලි 25 ඉරිදා හවස් යාමයේ දියත් කළ උද්ඝෝෂණය සංවිධානය කර ඇත්තේ ජාතික කම්කරු සංගමය විසිනි.
වැඩ කරන ජනතාවගේ අයිතින් ආරක්ෂා කරන ලෙසත්, තේ වතු හාම්පුතුන් විසින් සිදු කරන නීති විරෝධි ක්‍රියා නතර කිරීමට මැදිහත් වන ලෙසත් රජයට බල කළ උද්ඝෝෂකයන් වැඩි දුරටත් ඉල්ලා ඇත්තේ පඩිපාලක සභාව මගින් ඉහළ දැමු වතු කම්කරුවන්ගේ රුපියල් දහසේ දෛනික වැටුප හාම් පුතුන් විසින් නොගෙවන බැවින් එය ලබා දීමට මැදිහත් වන ලෙසයි.
කොන්දේසි විරහිතව දෙනවා කිව්ව 1000 කෝ, තේ වගාවට දාන රසායනික පොහොර නැවැත්තුවේ ඇයි , අන්තිමට තිබ්බ පඩියත් නෑ, ශ්‍රමය සුරා නොකනු, අඩු පඩි එපා, අපි තමයි හොදටම කරේ ආදී සටන් පාඨ ප්‍රදර්ශනය කරමින් කම්කරුවන් විරෝධතා දියත් කර තිබේ.
පලනි දිගම්බරන්, එම්. උදයකුමාර් යන ජනතා නියෝජිතයන්ද උද්ඝෝෂණයට එක්ව සිටි බව පළාත් බද වාර්තාකරුවෝ වැඩි දුරටත් පවසති.
රුපියල් දහස දක්වා ඉහළ දැමු වතු කම්කරුවන්ගේ දෛනික වැටුප වතු හාම්පුතුන් විසින් කප්පාදු කරන බවට දිගින් දිගටම චෝදනා එල්ල වෙමින් පවති.
වතු කම්කරුවන්ගේ දිනක මුලික වැටුප රුපියල් දහසක් ලෙස පඩිපාලක සභාව මගින් නියම කොට එය ගැසට් නිවේදනයක් මගින් ප්‍රකාශයට පත් කර ඇතත් වතු සමාගම් විසින් විවිධ අසාධාරණ කොන්දේසි පනවමින් මූලික වැටුප රුපියල් දහස කප්පාදු කිරීමට විරෝධය දක්වමින් පසුගිය මාස කිහිපය තුලදී වතු කරයේ විරෝධතා රැසක් දියත් කර තිබුනි.
Facebook Comments
