සටන් වැදී මියගිය මලයහ අරගලකරුවන් වෙනුවෙන් විරු දිනයක් ඉල්ලයි

මලයහ ජනතාවගේ උරුමය වෙනුවෙන් සටන් වැදී දිවි දුන් විරුවන්ගේ දිනයක් ප්‍රකාශයට පත් කරන ලෙස පාර්ලිමේන්තුවට පුද්ගලික මන්ත්‍රී යෝජනාවක් ඉදිරිපත්ව තිබේ.

සමගි ජන බලවේගයේ නුවර දිස්ත්‍රික් පාර්ලිමේන්තු මන්ත්‍රී වේලු කුමාර් ජුලි 12 වැනිදා පාර්ලිමේන්තුවෙන් ඉල්ලා සිටියේ වතු කම්කරුවන්ගේ වැටුප් අරගලය වෙනුවෙන් සටන් වැද සිටියදී පොලිස් සැරයන් සුරවීරගේ රයිෆල් උණ්ඩය මුල්ඔය ගෝවින්දන්ගේ ජීවිතය බිලිගත් දිනය ඒ වෙනුවෙන් ප්‍රකාශයට පත් කරන ලෙසයි.

“වතුකරයේ කම්කරුවන්ගේ වැටුප් ඇතුළු කම්කරුවන්ගේ අයිතීන්, ඒ වගේම වතු කළමනාකරුවන්ගෙන් එල්ල වන පීඩනයට එරෙහිව ජනතාවගේ භාෂා අයිතිය වෙනුවෙන් අපේ මලයහ ප්‍රජාව විවිධ අරගලවල නිරතව සිටිනවා. එවැනි අරගල වලදී අපේ ප්‍රජාවේ අනාගතය වෙනුවෙන් දිවිපිදුවන්ව අපි මලයහ විරුවන් කියලා හදුනාගන්නවා. 1939 දෙසැම්බර් මාසයේ දි වැටුප් වැඩිවීමක් ඉල්ලා මුල්ඔය වත්තේ උද්ඝෝෂණයක් පටන් ගත්තා. ඒ උද්ඝෝෂණය 1940 ජනවාරි දක්වා දියත් උනා. මේ අතරතුර ජනවාරි 10 වැනිදා මුල්ඔය වත්තේ මර්දනය දියත් උනා. පොලීසියේ වෙඩි ප්‍රහාරයට ගොදුරුව මලයහ දිවි පිදුවන්ගේ ඉතිහාසය මුල්ඔය ගෝවින්දන් ආරම්භ කරනවා. අපි මේ මහා සභාවේදී ඉල්ලා සිටිනවා මලයහ, කම්කරු ජනතාවගේ දිවිපිදුවන්ගේ ඉතිහාසය පටන් ගත්ත, මුල්ඔය ගෝවින්දන්ගේ ඒ වීර මරණය සිදුවු ජනවාරි 10 වැනිදා මේ රටේ මලයහ දිවිපිදුවන්ගේ දිනය ලෙස ප්‍රකාශයට පත් කළ යුතු බවට මම යෝජනාව ඉදිරිපත් කරනවා.”

එවැනි සමරු දිනයක් ප්‍රකාශයට පත් කිරීමේ ප්‍රශ්නයක් නොමැති බව පාර්ලිමේන්තුව හමුවේ කියා සිටි අධ්‍යාපන අමාත්‍ය සහ පාර්ලිමේන්තුවේ සභානායක ආචාර්ය සුසිල් ප්‍රේමජයන්ත සදහන් කළේ අදාල ක්‍රියාමාර්ග ගැනීම පිනිස එම යෝජනාව විෂය භාර කම්කරු අමාත්‍යාංශයට යොමු කරන බවයි.

“මේක කම්කරු අමාත්‍යාංශයට යෝජනා කරලා යෝජනාව යවමු. කම්කරු අමාත්‍යාංශය අදාල ක්‍රියාමාර්ගය ගනිවී.”

2019 වසරේ දෙසැම්බර් 15 දින මලයහ උරිමෛකුරල් සහ පිඩිතලරාතේ යන සංවිධාන දෙකේ සංවිධානත්වයෙන් පැවති වතු කම්කරු සමරු උත්සවයකදී මුල්ඔය ගෝවින්දන්ට උපහාර පිනිස සෑම වසරකම ජනවාරි 10 වැනි දින කඳුකර දිවි පිදූවන්ගේ දිනය ලෙස අනුස්මරණය කිරීමට යෝජනාවක් සම්මත කරගෙන තිබුනි.

පළාත් බද වාර්තාකරුවන් පවසන්නේ 2020 වසරේ සිට මලයහ උරිමෛකුරල් සහ පිඩිතලරාතේ යන සංවිධාන දෙකේ මුලිකත්වයෙන් සෑම වසරකම ජනවාරි 10 වැනිදා මලයහ දිවි පිදුවන්ගේ දිනය ලෙස සමරනු ලබන බවයි.

මලයහ දිවි පිදුවන්ගේ දිනය 2024 වසරේදී අනුස්මරණය සිදු කර තිබුනේ කොටගල කොමර්ෂල් ලේක් ප්‍රදේශයේදීය.