අවුරුදු උදාවේ රටටම කොරෝනා බෝවීමේ අවදානමක්

0
895
Ivory Agency Sri Lanka
wedding people

කොරෝනා වෛරසය ආසාදිත බවට ශ්‍රී ලංකාවෙන් හදුනාගෙන ඇති රෝගීන් සමග ස්පර්ශක සබඳතා පැවැති පුරවැසියන් 19000 ක් හදුනාගෙන ඇති බැවින් සිංහල දෙමළ අවුරුදු උදාවේ මුළු රටේම රෝගය පැතිරීමේ අවදානමක් පවතින බවට රජයේ වෛද්‍යවරු අනතුරු අඟවති.

එම පිරිස සෞඛ්‍ය ආරක්ෂක හා පරිපාලන අංශ වල නිරෝධායන, නිරීක්ෂණය යටතේ සිටින නමුත් මෙම පිරිස රට පුරා ව්‍යාප්තව සිටිය හැකි බැවින් අවදානම මුළු රටටම බලපා ඇති බවයි රජයේ වෛද්‍ය නිලධාරීන්ගේ සංගමය පෙන්වා දෙන්නේ .

මේ වනවිට වැඩිම රෝගීන් ප්‍රමාණයක් වාර්තා වු කොළඹ, ගම්පහ, කලුතර සහ පුත්තලම යන දිස්ත්‍රික්ක දැඩි අවධානම් කලාප ලෙස නම් කර තිබේ.

රජයේ වෛද්‍ය නිලධාරීන්ගේ සංගමය විසින් 2020 මාර්තු මස 24 දින නිකුත් කළ වාර්තාවේ දක්වා ඇති පරිදි සමාජ දුරස්ථකරණයක් සිදු නොවීම හේතුවෙන් මාර්තු 15 දින දක්වා රට පුරා රෝගීන්ගේ සම්පුර්ණ සංවරණයක් සිදුවුවා බවට අනුමාන කර තිබේ.

මාර්තු 16 සිට මාර්තු 19 දක්වා කාලය තුළ ගුවන් තොටුපල වසා දැමීම, නිවාඩු දීම, පාසල් වසා දැමීම වැනි ක්‍රියාමාර්ග හේතු කොට ගෙන සමාජය තුල සීයයට පනහක පමන ශාරීරික දුරස්වීමක් සිදු වු බවට අනුමාන කරන රජයේ වෛද්‍ය නිලධාරීන්ගේ සංගමයේ තක්සේරුව වන්නේ මාර්තු 20 දින සිට රට තුළ ඇදිරිනීතිය පැනවීමත් සමග සමාජ දුරස්ථකරණය සියයට හැත්තෑවක් පමණ දක්වා වර්ධනය වු බවයි.

සමාජ දුරස්ථකරණයක් නොමැති අවස්ථාවක සිදුවන නිදහස් සංචරණයකදී එක් පුද්ගලයකු නිසා දින 30 කදී අනුමාන වශයෙන් තවත් පුද්ගලයන් 500 දෙනෙකුට රෝගය පැතිරවීමට හැකිමුත් සීයයට පනහක දුරස්ථකරණයේදී එක් පුද්ගලයකුට දින 30 කදී අනුමාන වශයෙන් තවත් පුද්ගලයන් 15 කටද, සියයට හැත්තෑවක දුරස්ථකරණයේදී එක් රෝගියකුගෙන් රෝගය පැතිරයෑම රෝගීන් 2.5 ට සීමා කිරීමට හැකි බව තාක්ෂණිකව අනුමාන කළ හැකි බව රජයේ වෛද්‍ය නිලධාරීන්ගේ සංගමය පෙන්වා දෙයි.

සමාජ දුරස්ථකරණය අසාර්ථකව සිදු කළ බටහිර රටවල දත්ත සමග සසදා බලන විට ශ්‍රී ලංකාවේ මාර්තු මස 25 සිට අප්‍රේල් 07 දක්වා කාලය තුළ රෝගීන් සංඛ්‍යාවේ විශාල වැඩි වීමක් බලාපොරොත්තු විය හැකි බවට එම සංගමය අනතුරු අගවා තිබේ.

Facebook Comments