පස් හැවිරිදි ළදරුවකු ඇතුළු දෙමළ අට දෙනකුගේ සමූහ ඝාතනයට එල්ලුම් ගසට නියම වී සිටි ගජබා රෙජිමේන්තුවේ හමුදා නිලධාරියකු නිදහස් කර යැවීමට ජනාධිපතිවරයා කටයුතු කර තිබේ.
අසීමිත තදබදයක් පවතින බන්ධනාගාරවල කොරෝනා වයිරසය පැතිරී යාම වැලැක්වීම සඳහා සුළු වැරදිකරුවන් සහ වැඩිහිටියන් නිදහස් කරන ලෙස ඉල්ලා අනුරාධපුර උද්ඝෝෂණයේ යෙදුනු රැඳවියන් දෙදෙනකු වෙඩි තබා මරා දමා තිබියදී ජනාධිපති ගෝඨාභය රාජපක්ෂ විසින් මිරුසුවිල් සමූහ ඝාතනයට වරදකරු වී සිටි මාණ්ඩලික සැරයන් සුනිල් රත්නායක නිදහස් කොට යවා ඇත.
අලුත් අවුරුද්දට පෙර ඔහු නිදහස් කරන බවට ජනවාරියේ දුන් පොරොන්දුවක් ඉටු කරමින් ආරක්ෂක ලේකම්වරයා විසින් තමන්ට පුද්ගලිකවම එම තොරතුර දැනුම් දුන් බව ඝාතනයට වරදකරු වූ හමුදා නිලධාරියා නිදහස් කරගැනීම වෙනුවෙන් උද්ඝෝෂණ දියත් කළ සිංහල ජාතිකවාදී භික්ෂුන් වහන්සේ නමක් ප්‍රකාශ කර සිටි සේක.
“එතුමා අද උදෑසන කතා කරලා ඔබවහන්සේට සතුටු දායක ප්‍රවෘත්තියක් කියන්න තියනවා කියලා මේ ප්‍රවෘත්තිය එතුමා ප්‍රකාශ කළා,” යි සිංහලේ සංවිධානයේ නායක මැඩිල්ලේ පඤ්ඤාලෝක හිමියන් සමාජ මාධ්‍ය වෙත නිකුත් කළ වීඩියෝ නිවේදනයකින් දැනුම් දී තිබේ.
ඥානපාලන් රවිවීරන්, සෙල්ලමුත්තු දේවකුලසිංහම්, විල්වරාජා ප්‍රදීපන්, සින්නයියා විල්වරාජා, නඩේසු ජෙයචන්ද්‍රන්, කදීරන් ඥානචන්ද්‍රන්, ඥානචන්ද්‍රන් ශාන්තන් සහ පස් හැවිරිදි විල්වරාජා යාපනයේ මිරුසුවිල් හිදී 2000 දෙසැම්බර් 19 දා ඝාතනය කිරීම සම්බන්ධයෙන් දඬුවම් ලැබූ එකම හමුදා නිලධාරියා රත්නායක මුදියන්සේලාගේ සුනිල් රත්නායකයි.
ඔහු රාජකාරි කළේ ජනාධිපති මෙන්ම ආරක්ෂක ලේකම්ද අණදෙන නිලධාරීන් ලෙස සේවය කළ ගජබා රෙජිමේන්තුවේයි.
ජනාධිපතිවරයා විසින් ඔහු නිදහස් කර හරින ලද්දේ කොරෝනා වයිරස් අවදානමෙන් ජීවිත බේරාගැනීම සඳහා හිරගෙදර තදබදය අඩුකිරීමට සුළු වැරදිකරුවන් කවර කොන්දේසි යටතේ හෝ නිදහස් කරන මෙන් ඉල්ලා අනුරාධපුර රැඳවියන් දියත් කළ උද්ඝෝෂණයකට බන්ධනාගාර නිලධාරීන් විසින් වෙඩිතබා ඉපලෝගම කලාකරඹෑව පූගොල්ලාගම කේ. එම්. ඒ. සමන් කුමාර සහ ගල්ගමුව උස්ගල සියඹලන්ගමුව කේ. එල්. ඩී. අසංක පුෂ්ප කුමාර මරුමුවට පත් වී තවත් හයක් තුවාල ලබා රෝහල් ගතවීමෙන් දින පහක් ගතවීමත් සමගය.
Facebook Comments
