ඇතැම් දේශපාලනඥයින්ගේ මැදිහත්වීම මත වයඹ පළාතේ සිට කලුතර දිස්ත්‍රික්කයේ මත්පැන් නිෂ්පාදනාගාරවලට රැගෙන එන කෘත්‍රීම රා වහාම අත්අඩංගුවට ගන්නා ලෙස සෞඛ්‍ය, පෝෂණ හා දේශීය වෛද්‍ය අමාත්‍ය සහ බේරුවල ප්‍රාදේශීය සම්බන්ධීකරණ කමිටුවේ සම සභාපති දොස්තර රාජිත සේනාරත්න සුරාබදූ දෙපාර්තමේන්තුවට සහ පොලීසියට නියෝග කර තිබේ.
පසුගිය රජය සමයේ කලුතර දිස්ත්‍රික්කයේ සිටි ඇතැම් දේශපාලඥයින්ට එම කෘත්‍රීම රා ප්‍රවාහනය කිරිමට සහයෝගය ලබාදීම වෙනුවෙන් මත්පැන් සමාගම් දිනකට රුපියල් 250,000 මුදල් ගෙවා ඇති බව හෙළි වී ඇතැයි සෞඛ්‍ය අමාත්‍යවරයා මෙහිදී ප්‍රකාශ කළේය.
කිසිවෙකුට බිය නොවී එම කෘත්‍රීම රා අත්අඩංගුවට ගන්නා ලෙස නියෝග කල සෞඛ්‍ය අමාත්‍යවරයා මෙම ජාවාරම පිටුපස සිටින පුද්ගලයින් පිළිබඳ ව බුද්ධි අංශ පරීක්ෂණයක් ද ක්‍රියාත්මක බවයි කියා සිටියේ.
කළුතර දිස්ත්‍රික්කයේ පොල් රා නිෂ්පාදනය කිරිම සඳහා ලියාපදිංචි කර ඇති පොල්ගස් ප්‍රමාණය හා ඉන් ලැබෙන ස්වාභාවික රා නිෂ්පාදන පිළිබඳ ව සමීක්ෂණක් සිදූ කර මීලඟ සම්බන්ධීකරණ රැස්වීමට ලබාදෙන ලෙස සෞඛ්‍ය අමාත්‍යවරයා සුරාබදූ නිලධාරින්ට උපදෙස් දෙන ලදි.
සම්බන්ධීකරණ කමිටු රැස්වීමට පැමිණ සිටි මහජන නියෝජිතයින් පෙන්වා දූන්නේ බේරුවල ආසනයේ නීතිවිරෝධී මත්පැන් සහ මත්ද්‍රව්‍ය වැඩි වී ඇති බැවින් ඊට වහාම පිළියම් යෙදිය යුතු බවයි.
එහිදී අදහස් දැක් වූ සෞඛ්‍ය අමාත්‍යවරයා සඳහන් කළේ කලුතර දිස්ත්‍රික්කයම ආවරණය වන පරිදි නීතිවිරෝධී මත්පැන් සහ මත් ද්‍රව්‍ය වැටලීම සඳහා නව වැඩපිළිවෙළක් කළුතර නව ඡ්‍යෙෂ්ඨ පොලිස් අධිකාරි රන්මල් කොඩිතුවක්කු විසින් ලබන සතියේ ආරම්භ කරන බවයි.
Facebook Comments
