ජාතික සංහිඳියාව ගොඩනැගීමේ දී සහ බලය බෙදීමේ දී, කිසිවිටෙකත් රට බෙදෙන්නේ නැති බව පවසන ජනාධිපතිවරයා ඒකීය රටක බලය බෙදීමේ දේශපාලන විද්‍යාත්මක ක‍්‍රමවේදයකට යොමු විය යුතු බව අවධාරණය කරයි.
රටේ ඒකීයභාවය පිළිබඳ ආණ්ඩුක‍්‍රම ව්‍යවස්ථාවේ තිබෙන කරුණුවල කිසිදු වෙනසක් සිදු නොකරන අතරම 1972 ව්‍යවස්ථාවේ බෞද්ධාගම සම්බන්ධයෙන් තිබෙන ඡේදයෙහි ද කිසිදු වෙනසක් සිදු කිරීමට පලාපොරොත්තු නොවන බවයි ජනාධිපති මෛත්‍රීපාල සිරිසේන පෙන්වා දෙන්නේ.
නව ආණ්ඩුක‍්‍රම ව්‍යවස්ථාව පිළිබඳ රටේ ජනතාවගේ පැත්තෙන් ඇති උනන්දුව පවතින මැතිවරණ ක‍්‍රමය වෙනස් කර කොට්ඨාස ඡන්ද ක‍්‍රමයක් පිළිබඳ තිබෙන ඉල්ලීම බව ජනාධිපතිවරයා කියා සිටියේ නැගෙනහිර පළාත හා තමන්කඩුව එගොඩපත්තුව යන දෙපළාතේ ප‍්‍රධාන සංඝනායක පදවියෙන් පිදුම් ලද පූජ්‍ය මකුරුප්පේ පඤ්ඤාසේකර නායක ස්වාමින් වහන්සේ වෙත ශී‍්‍ර සන්නස් පත‍්‍ර පිළිගැන්වීම වෙනුවෙන් 10 සඳුදා දෙහිඅත්තකණ්ඩිය මහවැලි ශාලිකා ශාලාවේ පැවති උත්සවය අමතමිනි.
රටේ ඒකීයභාවය හා බෞද්ධාගම සම්බන්ධයෙන් ආණ්ඩුක‍්‍රම ව්‍යවස්ථාව අනුව පැවරී තිබෙන වගකීම් කිසිලෙසකින්වත් පැහැර නොහරින බවයි ජනාධිපති සිරිසේන මෙහිදි සපථ කර සිටියේ.
නව ආණ්ඩුක‍්‍රම ව්‍යවස්ථාවක් පිළිබඳ තවමත් දළ කෙටුම්පතක් හෝ සකසා නොමැති බව පෙන්වා දුන් ජනාධිපතිවරයා එවැන්නක් සකස් කරන්නේනම් එය පාර්ලිමේන්තුවට සහ රටට ඉදිරිපත් කර සියලු යෝජනා මෙන්ම චෝදනා ද සැලකිල්ලට ගනිමින් අදාළ සංශෝධන සහිතව එම දළ කෙටුම්පත සැකසීමට බලාපොරාත්තුවන බවයි වැඩිදුරටත් ප්‍රකාශ කළේ.
Facebook Comments
