රාජපක්ෂ පාලන සමයේ ශ්‍රී ලංකන් ගුවන් සමාගමේ හිටපු සභාපති නිශාන්ත වික්‍රමසිංහ ගුවන් කළමනාකරුවන්ගේ තීරණය වෙනස් කිරිම හේතුවෙන් ශ්‍රී ලංකන් ගුවන් සමාගමට රුපියල් කෝටියකට අධික පාඩුවක් දැරීමට සිදු වූ බව අනාවරණය වී තිබේ.
ශ්‍රී ලංකන් ගුවන් සමාගමේ ගුවන් කළමනාකරුවෝ ශ්‍රී ලංකන් සහ මිහින් ලංකා ආයතනවල දූෂණ සෙවීම සඳහා පත් කළ විශේෂ ජනාධිපති පරීක්‍ෂණ කොමිසම හමුවේ 15 බදාදා සාක්ෂි ලබා දෙමින් මේ බව කියා ඇතැයි වාර්තා වේ.
ප‍්‍රංශය බලා පිටත්වීමට නියමිතව තිබූ ගුවන් යානයක් සම්බන්ධයෙන් දුන් නියෝගයක් හේතුවෙන් ශ්‍රී ලංකන් ගුවන් සමාගමට මෙසේ පාඩුවක් සිදු වී ඇති බවයි ගුවන් මෙහෙයුම් කළමනාකරුවන් වන ධම්මික සේනානායක සහ ශයිලාන් නිශාන්ත හඳපාන්ගොඩ කොමිසම හමුවේ පවසා ඇත්තේ.
“2014 ජනවාරි මස 25 වැනිදා උදෑසන සිට 26 වැනිදා උදෑසන දක්වා කටුනායක ගුවන්තොටුපළේ ගුවන් මෙහෙයුම් කළමනාකරවරයා ලෙස මා කටයුතු කළා. එදින අපේ ගුවන් යානා දෙකක් කාර්මික දෝෂවලට ලක් වී තිබුණා. මේ නිසා කොළඹ සිට ප්‍රංශයේ ෆ්‍රැන්ක්පර්ට් නුවරට යන ගුවන් යානය නියමිත වේලාවට යවන්නත් කොළඹ සිට ප්‍රංශයට යන ගුවන් යානය ප්‍රමාද කිරීමටත් අපි තීරණය කොට තිබුණා. එසේ කිරීමෙන් සමාගමට කිසිදු පාඩුවක් සිදු නොවන ආකාරයට එය කළමනාකරණය කර ගැනීමට අපට හැකියාව තිබුණා.”
“එසේ තිබියදී 26 වැනිදා උදෑසන ශ්‍රී ලංකන් ගුවන් සමාගමේ සභාපති නිශාන්ත වික්‍රමසිංහ මහතා මට දුරකථනයෙන් කතාකොට කොළඹ සිට ප්‍රංශයට යන ගුවන් යානය කිසිදු ප්‍රමාදයකින් තොරව යවන ලෙස මට දැනුම් දුන්නා. එම ගුවන් යානයේ විශේෂ දූත කණ්ඩායමක් යෑමට සිටින බව ඔහු මට කීවා.” යි ඔවුන් පවසා ඇත.
මේ හේතුවෙන් ගුවන් මගීන් 128 දෙනෙකුට සිය ගමනාන්ත වැරදුණු බවත්, ඉන් ශ්‍රී ලංකන් ගුවන් සමාගමට විඳීමට සිදු වූ පාඩුවට වඩා, එහි කීර්තිනාමයට අති විශාල කැළලක් සිදු වූ බව ගුවන් කළමනාකරුවෝ කොමිසම වෙත ප්‍රකාශ කර තිබේ.
ශ්‍රී ලංකන් ගුවන් සමාගම, සීමාසහිත ශ්‍රී ලංකන් කේටරින් සමාගම හා මිහින් ලංකා පෞද්ගලික සමාගම සම්බන්ධයෙන් සිදුව ඇතැයි කියන අක්‍රමිකතා සොයා බැලීමට පංච පුද්ගල ජනාධිපති කොමිසම ජනාධිපති මෛත්‍රීපාල සිරිසේන විසින් පෙබරවාරි මාසයේදී පත් කළේය.
විශ්‍රාමලත් ශ්‍රේෂ්ඨාධිකරණ විනිසුරු අනිල් ගුණරත්න, අභියාචනාධිකරණ විනිසුරු ගාමිණී රොහාන් අමරසේකර, විශ්‍රාමික මහාධිකරණ විනිසුරු පියසේන රණසිංහ, විශ්‍රාමලත් නියෝජ්‍ය විගණකාධිපති ඇන්තනී හැරල්ඩ් සහ ශ්‍රී ලංකා ගිණුම් හා විගණන ප්‍රමිති සමීක්ෂණ මණ්ඩලයේ අධ්‍යක්ෂ ජනරාල් පියසීලි කපුගම එම කොමිසමේ සාමාජිකයින් වේ.
Facebook Comments
