සිය ප්‍රථම නිල රාජකාරිය ලෙස කිලිනොච්චිය ප්‍රදේශය භාර ජ්‍යෙෂ්ඨ පොලිස් අධිකාරී පාලිත සිරිවර්ධන එල්ල වී ඇති දේශපාලන බලපෑම් මත කිලිනොච්චියෙන් මාරුකර යැවීමට සිදුවන බවට පොලිස්පති පූජිත් ජයසුන්දර කර ඇතැයි කියන ප්‍රකාශය නීතියට පටහැනි ප්‍රකාශයක් වන බවට ශ්‍රේෂ්ඨාධිකරණය තීරණය කර ඇත.
පොලිස්පති ධුරයේ රාජකාරී භාර ගැනීමෙන් පසුව පොලිස්පතිවරයා තමාව කිලිනොච්චියෙන් මාරුකර හරින ලෙස දේශපාලන බලපෑම් එල්ල වී ඇති බැවින් ඒ අනුව කටයුතු කිරීමට සිදු වන්නේ යැයි ප්‍රකාශ කළ බව පෙන්වා දෙමින් පාලිත සිරිවර්ධන ශ්‍රේෂ්ඨාධිකරණයට මූලික අයිතිවාසිකම් පෙත්සමක් ගොනුකර තිබු පෙත්සමකට මෙම නියෝගය ලබා දී තිබේ.
පොලිස්පතිවරයාගේ එකී වාචික ප්‍රකාශය නීතියට පටහැනි මෙන්ම එය මූලික අයිතිවාසිකම් උල්ලංඝනය කරන ප්‍රකාශයක් බැවින් එකී වාචික ප්‍රකාශය අනුව කටයුතු කිරීම වළක්වන්නැයි පෙත්සම්කරු සිය මූලික අයිතිවාසිකම් පෙත්සම මගින් ඉල්ලා තිබුණි.
පෙත්සම කැඳ වූ අවස්ථාවේ අගවිනිසුරුවරයා අධිකරණයේදී පෙන්වා දී ඇත්තේ සහකාර පොලිස් අධිකාරී ධුරයේ සිට ඉහළ ධුර හොබවන නිලධාරීන් ස්ථාන මාරු කළ හැක්කේ ජාතික පොලිස් කොමිසමට පමණක් බවයි.
නීතිපතිවරයා වෙනුවෙන් පෙනී සිටි රජයේ ජ්‍යෙෂ්ඨ අධිනීතිඥ එස්. බාරි මහත්මිය ද අධිකරණයට පෙන්වා දී ඇත්තේ සහකාර පොලිස් අධිකාරි ඉහළ නිලයක් දරන නිලධාරීන්ට ස්ථාන මාරු ලබාදීමේ බලය ඇත්තේ ජාතික පොලිස් කොමිසමට බවට නීතිපතිවරයාද පිළිගන්නා බව ප්‍රකාශ කරන ලදී.
පෙත්සමේ පළමු වගඋත්තරකරු වන පොලිස්පතිවරයා වාචික ප්‍රකාශය අනුව කටයුතු කළහොත් වහාම අධිකරණය හමුවට පැමිණීමේ අයිතිය පෙත්සම්කරුට ඇති බවද අගවිනිසුරුවරයා පෙන්වා දී ඇත.
මෙකි පෙත්සමේ පොලිස්පති පූජිත් ජයසුන්දර පළමු වගඋත්තරකරු ලෙස නම් කොට තිබූ අතර ජාතික පොලිස් කොමිෂන් සභාවේ සභාපති මහාචාර්ය සිරි හෙට්ටිගේ, ලේකම් ආරියදාස කුරේ, ජාතික පොලිස් කොමිෂන් සභාවේ සාමාජිකයින් හයදෙනා, අමාත්‍ය සාගල රත්නායක හා නීතිපතිවරයා සෙසු වගඋත්තරකරුවන් වෙති.
Facebook Comments
